| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
६-७. अन्तेवासिकसुत्तादिवण्णना
6-7. Antevāsikasuttādivaṇṇanā
१५१-१५२. अन्त-सद्दो समीपत्थे वत्तति ‘‘उदकन्तं वनन्त’’न्तिआदीसु, किलेसो पन अतिआसन्ने वसति अब्भन्तरवुत्तितायाति ‘‘अन्तेवासिक’’न्ति वुत्तो विभत्तिअलोपेन यथा ‘‘वनेकुसलो, कूलेरुक्खा’’ति। तेनाह – ‘‘अनन्तेवासिकन्ति अन्तोवसनकिलेसविरहित’’न्ति। आचरणककिलेसविरहितन्ति समुदाचरणकिलेसरहितं। अन्तो अस्स वसन्तीति अस्स पुग्गलस्स अन्तो अब्भन्तरे चित्ते वसन्ति पवत्तन्ति। ते एतं अधिभवन्तीति ते किलेसा एतं पुग्गलं अभिभवित्वा अत्तनो वसे वत्तेन्ति। तेनाह – ‘‘अज्झोत्थरन्ति सिक्खापेन्ति वा’’ति। तेहि आचरियेहीति तेहि किलेससङ्खातेहि सत्ते अत्तनो गतियं ठपेन्तेहि आचरियेहि। सत्तमं हेट्ठा कथितनयमेवाति यस्मा हेट्ठा खन्धवसेन देसना आगता, इध आयतनवसेनाति अयमेव विसेसो।
151-152. Anta-saddo samīpatthe vattati ‘‘udakantaṃ vananta’’ntiādīsu, kileso pana atiāsanne vasati abbhantaravuttitāyāti ‘‘antevāsika’’nti vutto vibhattialopena yathā ‘‘vanekusalo, kūlerukkhā’’ti. Tenāha – ‘‘anantevāsikanti antovasanakilesavirahita’’nti. Ācaraṇakakilesavirahitanti samudācaraṇakilesarahitaṃ. Antoassa vasantīti assa puggalassa anto abbhantare citte vasanti pavattanti. Te etaṃ adhibhavantīti te kilesā etaṃ puggalaṃ abhibhavitvā attano vase vattenti. Tenāha – ‘‘ajjhottharanti sikkhāpenti vā’’ti. Tehi ācariyehīti tehi kilesasaṅkhātehi satte attano gatiyaṃ ṭhapentehi ācariyehi. Sattamaṃ heṭṭhā kathitanayamevāti yasmā heṭṭhā khandhavasena desanā āgatā, idha āyatanavasenāti ayameva viseso.
अन्तेवासिकसुत्तादिवण्णना निट्ठिता।
Antevāsikasuttādivaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya
६. अन्तेवासिकसुत्तं • 6. Antevāsikasuttaṃ
७. किमत्थियब्रह्मचरियसुत्तं • 7. Kimatthiyabrahmacariyasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ६-७. अन्तेवासिकसुत्तादिवण्णना • 6-7. Antevāsikasuttādivaṇṇanā
