| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
൯. രതനവഗ്ഗോ
9. Ratanavaggo
൧. അന്തേപുരസിക്ഖാപദവണ്ണനാ
1. Antepurasikkhāpadavaṇṇanā
അനിക്ഖന്തരാജകേ അനിഗ്ഗതരതനകേതി ഏത്ഥ ‘‘സയനിഘരേ’’തി പാഠസേസോ ദട്ഠബ്ബോതി ആഹ ‘‘അനിക്ഖന്തോ രാജാ ഇതോ’’തിആദി. തത്ഥ ഇതോതി സയനിഘരതോ. സയനിഘരേതി സയനീയഘരേ. യത്ഥ രഞ്ഞോ സയനം പഞ്ഞത്തം ഹോതി, അന്തമസോ സാണിപാകാരപരിക്ഖിത്തമ്പി, തസ്മിന്തി വുത്തം ഹോതി. രതിജനനട്ഠേന രതനം, ഹത്ഥിആദി. ഇധ പന ഇത്ഥിരതനം അധിപ്പേതന്തി ആഹ ‘‘രതനം വുച്ചതി മഹേസീ’’തി.
Anikkhantarājake aniggataratanaketi ettha ‘‘sayanighare’’ti pāṭhaseso daṭṭhabboti āha ‘‘anikkhanto rājā ito’’tiādi. Tattha itoti sayanigharato. Sayanighareti sayanīyaghare. Yattha rañño sayanaṃ paññattaṃ hoti, antamaso sāṇipākāraparikkhittampi, tasminti vuttaṃ hoti. Ratijananaṭṭhena ratanaṃ, hatthiādi. Idha pana itthiratanaṃ adhippetanti āha ‘‘ratanaṃ vuccati mahesī’’ti.
ഉഭോസൂതി രാജമഹേസീസു. കിരിയാകിരിയന്തി ഏത്ഥ ഇന്ദഖീലാതിക്കമോ കിരിയം, അപ്പടിസംവിദിതം അകിരിയന്തി ദട്ഠബ്ബം.
Ubhosūti rājamahesīsu. Kiriyākiriyanti ettha indakhīlātikkamo kiriyaṃ, appaṭisaṃviditaṃ akiriyanti daṭṭhabbaṃ.
അന്തേപുരസിക്ഖാപദവണ്ണനാ നിട്ഠിതാ.
Antepurasikkhāpadavaṇṇanā niṭṭhitā.
