| Library / Tipiṭaka / තිපිටක • Tipiṭaka / කඞ්ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
9. රතනවග්ගො
9. Ratanavaggo
1. අන්තෙපුරසික්ඛාපදවණ්ණනා
1. Antepurasikkhāpadavaṇṇanā
අනික්ඛන්තරාජකෙ අනිග්ගතරතනකෙති එත්ථ ‘‘සයනිඝරෙ’’ති පාඨසෙසො දට්ඨබ්බොති ආහ ‘‘අනික්ඛන්තො රාජා ඉතො’’තිආදි. තත්ථ ඉතොති සයනිඝරතො. සයනිඝරෙති සයනීයඝරෙ. යත්ථ රඤ්ඤො සයනං පඤ්ඤත්තං හොති, අන්තමසො සාණිපාකාරපරික්ඛිත්තම්පි, තස්මින්ති වුත්තං හොති. රතිජනනට්ඨෙන රතනං, හත්ථිආදි. ඉධ පන ඉත්ථිරතනං අධිප්පෙතන්ති ආහ ‘‘රතනං වුච්චති මහෙසී’’ති.
Anikkhantarājake aniggataratanaketi ettha ‘‘sayanighare’’ti pāṭhaseso daṭṭhabboti āha ‘‘anikkhanto rājā ito’’tiādi. Tattha itoti sayanigharato. Sayanighareti sayanīyaghare. Yattha rañño sayanaṃ paññattaṃ hoti, antamaso sāṇipākāraparikkhittampi, tasminti vuttaṃ hoti. Ratijananaṭṭhena ratanaṃ, hatthiādi. Idha pana itthiratanaṃ adhippetanti āha ‘‘ratanaṃ vuccati mahesī’’ti.
උභොසූති රාජමහෙසීසු. කිරියාකිරියන්ති එත්ථ ඉන්දඛීලාතික්කමො කිරියං, අප්පටිසංවිදිතං අකිරියන්ති දට්ඨබ්බං.
Ubhosūti rājamahesīsu. Kiriyākiriyanti ettha indakhīlātikkamo kiriyaṃ, appaṭisaṃviditaṃ akiriyanti daṭṭhabbaṃ.
අන්තෙපුරසික්ඛාපදවණ්ණනා නිට්ඨිතා.
Antepurasikkhāpadavaṇṇanā niṭṭhitā.
