| Library / Tipiṭaka / తిపిటక • Tipiṭaka / కఙ్ఖావితరణీ-అభినవ-టీకా • Kaṅkhāvitaraṇī-abhinava-ṭīkā |
౯. రతనవగ్గో
9. Ratanavaggo
౧. అన్తేపురసిక్ఖాపదవణ్ణనా
1. Antepurasikkhāpadavaṇṇanā
అనిక్ఖన్తరాజకే అనిగ్గతరతనకేతి ఏత్థ ‘‘సయనిఘరే’’తి పాఠసేసో దట్ఠబ్బోతి ఆహ ‘‘అనిక్ఖన్తో రాజా ఇతో’’తిఆది. తత్థ ఇతోతి సయనిఘరతో. సయనిఘరేతి సయనీయఘరే. యత్థ రఞ్ఞో సయనం పఞ్ఞత్తం హోతి, అన్తమసో సాణిపాకారపరిక్ఖిత్తమ్పి, తస్మిన్తి వుత్తం హోతి. రతిజననట్ఠేన రతనం, హత్థిఆది. ఇధ పన ఇత్థిరతనం అధిప్పేతన్తి ఆహ ‘‘రతనం వుచ్చతి మహేసీ’’తి.
Anikkhantarājake aniggataratanaketi ettha ‘‘sayanighare’’ti pāṭhaseso daṭṭhabboti āha ‘‘anikkhanto rājā ito’’tiādi. Tattha itoti sayanigharato. Sayanighareti sayanīyaghare. Yattha rañño sayanaṃ paññattaṃ hoti, antamaso sāṇipākāraparikkhittampi, tasminti vuttaṃ hoti. Ratijananaṭṭhena ratanaṃ, hatthiādi. Idha pana itthiratanaṃ adhippetanti āha ‘‘ratanaṃ vuccati mahesī’’ti.
ఉభోసూతి రాజమహేసీసు. కిరియాకిరియన్తి ఏత్థ ఇన్దఖీలాతిక్కమో కిరియం, అప్పటిసంవిదితం అకిరియన్తి దట్ఠబ్బం.
Ubhosūti rājamahesīsu. Kiriyākiriyanti ettha indakhīlātikkamo kiriyaṃ, appaṭisaṃviditaṃ akiriyanti daṭṭhabbaṃ.
అన్తేపురసిక్ఖాపదవణ్ణనా నిట్ఠితా.
Antepurasikkhāpadavaṇṇanā niṭṭhitā.
