| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
९. रतनवग्गो
9. Ratanavaggo
१. अन्तेपुरसिक्खापदवण्णना
1. Antepurasikkhāpadavaṇṇanā
अनिक्खन्तराजके अनिग्गतरतनकेति एत्थ ‘‘सयनिघरे’’ति पाठसेसो दट्ठब्बोति आह ‘‘अनिक्खन्तो राजा इतो’’तिआदि। तत्थ इतोति सयनिघरतो। सयनिघरेति सयनीयघरे। यत्थ रञ्ञो सयनं पञ्ञत्तं होति, अन्तमसो साणिपाकारपरिक्खित्तम्पि, तस्मिन्ति वुत्तं होति। रतिजननट्ठेन रतनं, हत्थिआदि। इध पन इत्थिरतनं अधिप्पेतन्ति आह ‘‘रतनं वुच्चति महेसी’’ति।
Anikkhantarājake aniggataratanaketi ettha ‘‘sayanighare’’ti pāṭhaseso daṭṭhabboti āha ‘‘anikkhanto rājā ito’’tiādi. Tattha itoti sayanigharato. Sayanighareti sayanīyaghare. Yattha rañño sayanaṃ paññattaṃ hoti, antamaso sāṇipākāraparikkhittampi, tasminti vuttaṃ hoti. Ratijananaṭṭhena ratanaṃ, hatthiādi. Idha pana itthiratanaṃ adhippetanti āha ‘‘ratanaṃ vuccati mahesī’’ti.
उभोसूति राजमहेसीसु। किरियाकिरियन्ति एत्थ इन्दखीलातिक्कमो किरियं, अप्पटिसंविदितं अकिरियन्ति दट्ठब्बं।
Ubhosūti rājamahesīsu. Kiriyākiriyanti ettha indakhīlātikkamo kiriyaṃ, appaṭisaṃviditaṃ akiriyanti daṭṭhabbaṃ.
अन्तेपुरसिक्खापदवण्णना निट्ठिता।
Antepurasikkhāpadavaṇṇanā niṭṭhitā.
