| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৯. রতনৰগ্গো
9. Ratanavaggo
১. অন্তেপুরসিক্খাপদৰণ্ণনা
1. Antepurasikkhāpadavaṇṇanā
অনিক্খন্তরাজকে অনিগ্গতরতনকেতি এত্থ ‘‘সযনিঘরে’’তি পাঠসেসো দট্ঠব্বোতি আহ ‘‘অনিক্খন্তো রাজা ইতো’’তিআদি। তত্থ ইতোতি সযনিঘরতো। সযনিঘরেতি সযনীযঘরে। যত্থ রঞ্ঞো সযনং পঞ্ঞত্তং হোতি, অন্তমসো সাণিপাকারপরিক্খিত্তম্পি, তস্মিন্তি ৰুত্তং হোতি। রতিজননট্ঠেন রতনং, হত্থিআদি। ইধ পন ইত্থিরতনং অধিপ্পেতন্তি আহ ‘‘রতনং ৰুচ্চতি মহেসী’’তি।
Anikkhantarājake aniggataratanaketi ettha ‘‘sayanighare’’ti pāṭhaseso daṭṭhabboti āha ‘‘anikkhanto rājā ito’’tiādi. Tattha itoti sayanigharato. Sayanighareti sayanīyaghare. Yattha rañño sayanaṃ paññattaṃ hoti, antamaso sāṇipākāraparikkhittampi, tasminti vuttaṃ hoti. Ratijananaṭṭhena ratanaṃ, hatthiādi. Idha pana itthiratanaṃ adhippetanti āha ‘‘ratanaṃ vuccati mahesī’’ti.
উভোসূতি রাজমহেসীসু। কিরিযাকিরিযন্তি এত্থ ইন্দখীলাতিক্কমো কিরিযং, অপ্পটিসংৰিদিতং অকিরিযন্তি দট্ঠব্বং।
Ubhosūti rājamahesīsu. Kiriyākiriyanti ettha indakhīlātikkamo kiriyaṃ, appaṭisaṃviditaṃ akiriyanti daṭṭhabbaṃ.
অন্তেপুরসিক্খাপদৰণ্ণনা নিট্ঠিতা।
Antepurasikkhāpadavaṇṇanā niṭṭhitā.
