| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
৯. অন্তরামলসুত্তৰণ্ণনা
9. Antarāmalasuttavaṇṇanā
৮৮. নৰমে অন্তরামলাতি এত্থ অন্তরাসদ্দো –
88. Navame antarāmalāti ettha antarāsaddo –
‘‘নদীতীরেসু সণ্ঠানে, সভাসু রথিযাসু চ।
‘‘Nadītīresu saṇṭhāne, sabhāsu rathiyāsu ca;
জনা সঙ্গম্ম মন্তেন্তি, মঞ্চ তঞ্চ কিমন্তর’’ন্তি॥ –
Janā saṅgamma mantenti, mañca tañca kimantara’’nti. –
আদীসু (সং॰ নি॰ ১.২২৮) কারণে আগতো। ‘‘অদ্দসা মং, ভন্তে, অঞ্ঞতরা ইত্থী ৰিজ্জন্তরিকায ভাজনং ধোৰন্তী’’তিআদীসু (ম॰ নি॰ ২.১৪৯) খণে। ‘‘অপিচাযং তপোদা দ্ৰিন্নং মহানিরযানং অন্তরিকায আগচ্ছতী’’তিআদীসু (পারা॰ ২৩১) ৰিৰরে।
Ādīsu (saṃ. ni. 1.228) kāraṇe āgato. ‘‘Addasā maṃ, bhante, aññatarā itthī vijjantarikāya bhājanaṃ dhovantī’’tiādīsu (ma. ni. 2.149) khaṇe. ‘‘Apicāyaṃ tapodā dvinnaṃ mahānirayānaṃ antarikāya āgacchatī’’tiādīsu (pārā. 231) vivare.
‘‘পীতৰত্থে পীতধজে, পীতালঙ্কারভূসিতে।
‘‘Pītavatthe pītadhaje, pītālaṅkārabhūsite;
পীতন্তরাহি ৰগ্গূহি, অপিল়ন্ধাৰ সোভসী’’তি॥ –
Pītantarāhi vaggūhi, apiḷandhāva sobhasī’’ti. –
আদীসু (ৰি॰ ৰ॰ ৬৫৮) উত্তরিসাটকে। ‘‘যস্সন্তরতো ন সন্তি কোপা’’তিআদীসু (উদা॰ ২০) চিত্তে। ইধাপি চিত্তে এৰ দট্ঠব্বো। তস্মা অন্তরে চিত্তে ভৰা অন্তরা। যস্মিং সন্তানে উপ্পন্না, তস্স মলিনভাৰকরণতো মলা। তত্থ মলং নাম দুৰিধং – সরীরমলং, চিত্তমলন্তি। তেসু সরীরমলং সেদজল্লিকাদি সরীরে নিব্বত্তং, তত্থ লগ্গং আগন্তুকরজঞ্চ, তং উদকেনপি নীহরণীযং, ন তথা সংকিলেসিকং। চিত্তমলং পন রাগাদিসংকিলেসিকং, তং অরিযমগ্গেহেৰ নীহরণীযং। ৰুত্তঞ্হেতং পোরাণেহি –
Ādīsu (vi. va. 658) uttarisāṭake. ‘‘Yassantarato na santi kopā’’tiādīsu (udā. 20) citte. Idhāpi citte eva daṭṭhabbo. Tasmā antare citte bhavā antarā. Yasmiṃ santāne uppannā, tassa malinabhāvakaraṇato malā. Tattha malaṃ nāma duvidhaṃ – sarīramalaṃ, cittamalanti. Tesu sarīramalaṃ sedajallikādi sarīre nibbattaṃ, tattha laggaṃ āgantukarajañca, taṃ udakenapi nīharaṇīyaṃ, na tathā saṃkilesikaṃ. Cittamalaṃ pana rāgādisaṃkilesikaṃ, taṃ ariyamaggeheva nīharaṇīyaṃ. Vuttañhetaṃ porāṇehi –
‘‘রূপেন সংকিলিট্ঠেন, সংকিলিস্সন্তি মাণৰা।
‘‘Rūpena saṃkiliṭṭhena, saṃkilissanti māṇavā;
রূপে সুদ্ধে ৰিসুজ্ঝন্তি, অনক্খাতং মহেসিনা॥
Rūpe suddhe visujjhanti, anakkhātaṃ mahesinā.
‘‘চিত্তেন সংকিলিট্ঠেন, সংকিলিস্সন্তি মাণৰা।
‘‘Cittena saṃkiliṭṭhena, saṃkilissanti māṇavā;
চিত্তে সুদ্ধে ৰিসুজ্ঝন্তি, ইতি ৰুত্তং মহেসিনা’’তি॥ (দী॰ নি॰ অট্ঠ॰ ২.৩৭৩; ম॰ নি॰ অট্ঠ॰ ১.১০৬)।
Citte suddhe visujjhanti, iti vuttaṃ mahesinā’’ti. (dī. ni. aṭṭha. 2.373; ma. ni. aṭṭha. 1.106);
তেনাহ ভগৰা ‘‘চিত্তসংকিলেসা, ভিক্খৰে, সত্তা সংকিলিস্সন্তি, চিত্তৰোদানা ৰিসুজ্ঝন্তী’’তি (সং॰ নি॰ ৩.১০০)। তস্মা ভগৰা ইধাপি চিত্তমলৰিসোধনায পটিপজ্জিতব্বন্তি দস্সেন্তো ‘‘তযোমে, ভিক্খৰে, অন্তরামলা’’তি আহ।
Tenāha bhagavā ‘‘cittasaṃkilesā, bhikkhave, sattā saṃkilissanti, cittavodānā visujjhantī’’ti (saṃ. ni. 3.100). Tasmā bhagavā idhāpi cittamalavisodhanāya paṭipajjitabbanti dassento ‘‘tayome, bhikkhave, antarāmalā’’ti āha.
যথা চেতে লোভাদযো সত্তানং চিত্তে উপ্পজ্জিত্ৰা মলিনভাৰকরা নানপ্পকারসংকিলেসৰিধাযকাতি অন্তরামলা, এৰং একতো ভুঞ্জিত্ৰা, একতো সযিত্ৰা, ওতারগৰেসী অমিত্তসত্তু ৰিয চিত্তে এৰ উপ্পজ্জিত্ৰা সত্তানং নানাৰিধঅনত্থাৰহা, নানপ্পকারদুক্খনিব্বত্তকাতি দস্সেন্তো ‘‘অন্তরাঅমিত্তা’’তিআদিমাহ। তত্থ মিত্তপটিপক্খতো অমিত্তা, সপত্তকিচ্চকরণতো সপত্তা, হিংসনতো ৰধকা, উজুৰিপচ্চনীকতো পচ্চত্থিকা।
Yathā cete lobhādayo sattānaṃ citte uppajjitvā malinabhāvakarā nānappakārasaṃkilesavidhāyakāti antarāmalā, evaṃ ekato bhuñjitvā, ekato sayitvā, otāragavesī amittasattu viya citte eva uppajjitvā sattānaṃ nānāvidhaanatthāvahā, nānappakāradukkhanibbattakāti dassento ‘‘antarāamittā’’tiādimāha. Tattha mittapaṭipakkhato amittā, sapattakiccakaraṇato sapattā, hiṃsanato vadhakā, ujuvipaccanīkato paccatthikā.
তত্থ দ্ৰীহি আকারেহি লোভাদীনং অমিত্তাদিভাৰো ৰেদিতব্বো। ৰেরীপুগ্গলো হি অন্তরং লভমানো অত্তনো ৰেরিস্স সত্থেন ৰা সীসং পাতেতি, উপাযেন ৰা মহন্তং অনত্থং উপ্পাদেতি। ইমে চ লোভাদযো পঞ্ঞাসিরপাতনেন যোনিসম্পটিপাদনেন চ তাদিসং ততো বলৰতরং অনত্থং নিব্বত্তেন্তি। কথং? চক্খুদ্ৰারস্মিঞ্হি ইট্ঠাদীসু আরম্মণেসু আপাথগতেসু যথারহং তানি আরব্ভ লোভাদযো উপ্পজ্জন্তি, এত্তাৰতাস্স পঞ্ঞাসিরং পাতিতং নাম হোতি। সোতদ্ৰারাদীসুপি এসেৰ নযো। এৰং তাৰ পঞ্ঞাসিরপাতনতো অমিত্তাদিসদিসতা ৰেদিতব্বা। লোভাদযো পন কম্মনিদানা হুত্ৰা অণ্ডজাদিভেদা চতস্সো যোনিযো উপনেন্তি। তস্স যোনিউপগমনমূলকানি পঞ্চৰীসতি মহাভযানি দ্ৰত্তিংস কম্মকরণানি চ আগতানেৰ হোন্তি। এৰং যোনিসম্পটিপাদনতোপি নেসং অমিত্তাদিসদিসতা ৰেদিতব্বা। ইতি লোভাদযো অমিত্তাদিসদিসতায চিত্তসম্ভূততায চ ‘‘অন্তরাঅমিত্তা’’তিআদিনা ৰুত্তা। অপিচ অমিত্তেহি কাতুং অসক্কুণেয্যং লোভাদযো করোন্তি, অমিত্তাদিভাৰো চ লোভাদীহি জাযতীতি তেসং অমিত্তাদিভাৰো ৰেদিতব্বো। ৰুত্তঞ্হেতং –
Tattha dvīhi ākārehi lobhādīnaṃ amittādibhāvo veditabbo. Verīpuggalo hi antaraṃ labhamāno attano verissa satthena vā sīsaṃ pāteti, upāyena vā mahantaṃ anatthaṃ uppādeti. Ime ca lobhādayo paññāsirapātanena yonisampaṭipādanena ca tādisaṃ tato balavataraṃ anatthaṃ nibbattenti. Kathaṃ? Cakkhudvārasmiñhi iṭṭhādīsu ārammaṇesu āpāthagatesu yathārahaṃ tāni ārabbha lobhādayo uppajjanti, ettāvatāssa paññāsiraṃ pātitaṃ nāma hoti. Sotadvārādīsupi eseva nayo. Evaṃ tāva paññāsirapātanato amittādisadisatā veditabbā. Lobhādayo pana kammanidānā hutvā aṇḍajādibhedā catasso yoniyo upanenti. Tassa yoniupagamanamūlakāni pañcavīsati mahābhayāni dvattiṃsa kammakaraṇāni ca āgatāneva honti. Evaṃ yonisampaṭipādanatopi nesaṃ amittādisadisatā veditabbā. Iti lobhādayo amittādisadisatāya cittasambhūtatāya ca ‘‘antarāamittā’’tiādinā vuttā. Apica amittehi kātuṃ asakkuṇeyyaṃ lobhādayo karonti, amittādibhāvo ca lobhādīhi jāyatīti tesaṃ amittādibhāvo veditabbo. Vuttañhetaṃ –
‘‘দিসো দিসং যন্তং কযিরা, ৰেরী ৰা পন ৰেরিনং।
‘‘Diso disaṃ yantaṃ kayirā, verī vā pana verinaṃ;
মিচ্ছাপণিহিতং চিত্তং, পাপিযো নং ততো করে’’তি॥ (ধ॰ প॰ ৪২; উদা॰ ৩৩)।
Micchāpaṇihitaṃ cittaṃ, pāpiyo naṃ tato kare’’ti. (dha. pa. 42; udā. 33);
গাথাসু অত্তনো পরেসঞ্চ অনত্থং জনেতীতি অনত্থজননো। ৰুত্তঞ্হেতং –
Gāthāsu attano paresañca anatthaṃ janetīti anatthajanano. Vuttañhetaṃ –
‘‘যদপি লুদ্ধো অভিসঙ্খরোতি কাযেন ৰাচায মনসা তদপি অকুসলং; যদপি লুদ্ধো লোভেন অভিভূতো পরিযাদিন্নচিত্তো পরস্স অসতা দুক্খং উপ্পাদেতি ৰধেন ৰা বন্ধেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতি, তদপি অকুসলং, ইতিস্সমে লোভজা লোভনিদানা লোভসমুদযা লোভপচ্চযা অনেকে পাপকা অকুসলা ধম্মা সম্ভৰন্তী’’তি (অ॰ নি॰ ৩.৭০)।
‘‘Yadapi luddho abhisaṅkharoti kāyena vācāya manasā tadapi akusalaṃ; yadapi luddho lobhena abhibhūto pariyādinnacitto parassa asatā dukkhaṃ uppādeti vadhena vā bandhena vā jāniyā vā garahāya vā pabbājanāya vā balavamhi balattho iti, tadapi akusalaṃ, itissame lobhajā lobhanidānā lobhasamudayā lobhapaccayā aneke pāpakā akusalā dhammā sambhavantī’’ti (a. ni. 3.70).
অপরম্পি ৰুত্তং –
Aparampi vuttaṃ –
‘‘রত্তো খো, ব্রাহ্মণ, রাগেন অভিভূতো পরিযাদিন্নচিত্তো অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি, চেতসিকম্পি দুক্খং দোমনস্সং পটিসংৰেদেতী’’তিআদি (অ॰ নি॰ ৩.৫৪)।
‘‘Ratto kho, brāhmaṇa, rāgena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti, cetasikampi dukkhaṃ domanassaṃ paṭisaṃvedetī’’tiādi (a. ni. 3.54).
চিত্তপ্পকোপনোতি চিত্তসঙ্খোভনো। লোভো হি লোভনীযে ৰত্থুস্মিং উপ্পজ্জমানো চিত্তং খোভেন্তো পকোপেন্তো ৰিপরিণামেন্তো ৰিকারং আপাদেন্তো উপ্পজ্জতি, পসাদাদিৰসেন পৰত্তিতুং ন দেতি। ভযমন্তরতো জাতং, তং জনো নাৰবুজ্ঝতীতি তং লোভসঙ্খাতং অন্তরতো অব্ভন্তরে অত্তনো চিত্তেযেৰ জাতং অনত্থজননচিত্তপ্পকোপনাদিং ভযং ভযহেতুং অযং বালমহাজনো নাৰবুজ্ঝতি ন জানাতীতি।
Cittappakopanoti cittasaṅkhobhano. Lobho hi lobhanīye vatthusmiṃ uppajjamāno cittaṃ khobhento pakopento vipariṇāmento vikāraṃ āpādento uppajjati, pasādādivasena pavattituṃ na deti. Bhayamantarato jātaṃ, taṃ jano nāvabujjhatīti taṃ lobhasaṅkhātaṃ antarato abbhantare attano citteyeva jātaṃ anatthajananacittappakopanādiṃ bhayaṃ bhayahetuṃ ayaṃ bālamahājano nāvabujjhati na jānātīti.
লুদ্ধো অত্থং ন জানাতীতি অত্তত্থপরত্থাদিভেদং অত্থং হিতং লুদ্ধপুগ্গলো যথাভূতং ন জানাতি। ধম্মং ন পস্সতীতি দসকুসলকম্মপথধম্মম্পি লুদ্ধো লোভেন অভিভূতো পরিযাদিন্নচিত্তো ন পস্সতি পচ্চক্খতো ন জানাতি, পগেৰ উত্তরিমনুস্সধম্মং। ৰুত্তম্পি চেতং –
Luddho atthaṃ na jānātīti attatthaparatthādibhedaṃ atthaṃ hitaṃ luddhapuggalo yathābhūtaṃ na jānāti. Dhammaṃ na passatīti dasakusalakammapathadhammampi luddho lobhena abhibhūto pariyādinnacitto na passati paccakkhato na jānāti, pageva uttarimanussadhammaṃ. Vuttampi cetaṃ –
‘‘রত্তো খো, ব্রাহ্মণ, রাগেন অভিভূতো পরিযাদিন্নচিত্তো অত্তত্থম্পি যথাভূতং ন পজানাতি, পরত্থম্পি যথাভূতং ন পজানাতি, উভযত্থম্পি যথাভূতং ন পজানাতী’’তিআদি (অ॰ নি॰ ৩.৫৫)।
‘‘Ratto kho, brāhmaṇa, rāgena abhibhūto pariyādinnacitto attatthampi yathābhūtaṃ na pajānāti, paratthampi yathābhūtaṃ na pajānāti, ubhayatthampi yathābhūtaṃ na pajānātī’’tiādi (a. ni. 3.55).
অন্ধতমন্তি অন্ধভাৰকরং তমং। যন্তি যত্থ। ভুম্মত্থে হি এতং পচ্চত্তৰচনং। যস্মিং কালে লোভো সহতে অভিভৰতি নরং, অন্ধতমং তদা হোতীতি। যন্তি ৰা কারণৰচনং। যস্মা লোভো উপ্পজ্জমানো নরং সহতে অভিভৰতি, তস্মা অন্ধতমং তদা হোতীতি যোজনা, য-ত-সদ্দানং একন্তসম্বন্ধভাৰতো। অথ ৰা যন্তি কিরিযাপরামসনং, ‘‘লোভো সহতে’’তি এত্থ যদেতং লোভস্স সহনং অভিভৰনং ৰুত্তং। এতং অন্ধভাৰকরস্স তমস্স গমনং উপ্পাদোতি অত্থো। অথ ৰা যং নরং লোভো সহতে অভিভৰতি, তস্স অন্ধতমং তদা হোতি, ততো চ লুদ্ধো অত্থং ন জানাতি, লুদ্ধো ধম্মং ন পস্সতীতি এৰমেত্থ অত্থো দট্ঠব্বো।
Andhatamanti andhabhāvakaraṃ tamaṃ. Yanti yattha. Bhummatthe hi etaṃ paccattavacanaṃ. Yasmiṃ kāle lobho sahate abhibhavati naraṃ, andhatamaṃ tadā hotīti. Yanti vā kāraṇavacanaṃ. Yasmā lobho uppajjamāno naraṃ sahate abhibhavati, tasmā andhatamaṃ tadā hotīti yojanā, ya-ta-saddānaṃ ekantasambandhabhāvato. Atha vā yanti kiriyāparāmasanaṃ, ‘‘lobho sahate’’ti ettha yadetaṃ lobhassa sahanaṃ abhibhavanaṃ vuttaṃ. Etaṃ andhabhāvakarassa tamassa gamanaṃ uppādoti attho. Atha vā yaṃ naraṃ lobho sahate abhibhavati, tassa andhatamaṃ tadā hoti, tato ca luddho atthaṃ na jānāti, luddho dhammaṃ na passatīti evamettha attho daṭṭhabbo.
যো চ লোভং পহন্ত্ৰানাতি যো পুব্বভাগে তদঙ্গৰসেন ৰিক্খম্ভনৰসেন চ যথারহং সমথৰিপস্সনাহি লোভং পজহিত্ৰা তথা পজহনহেতু লোভনেয্যে দিব্বেপি রূপাদিকে উপট্ঠিতে ন লুব্ভতি, বলৰৰিপস্সনানুভাৰেন লোভো পহীযতে তম্হাতি তস্মা অরিযপুগ্গলা অরিযমগ্গেন লোভো পহীযতি পজহীযতি, অচ্চন্তমেৰ পরিচ্চজীযতি। যথা কিং? উদবিন্দূৰ পোক্খরাতি পদুমিনিপণ্ণতো উদকবিন্দু ৰিয। সেসগাথানম্পি ইমিনা নযেন অত্থো ৰেদিতব্বো।
Yo ca lobhaṃ pahantvānāti yo pubbabhāge tadaṅgavasena vikkhambhanavasena ca yathārahaṃ samathavipassanāhi lobhaṃ pajahitvā tathā pajahanahetu lobhaneyye dibbepi rūpādike upaṭṭhite na lubbhati, balavavipassanānubhāvena lobho pahīyate tamhāti tasmā ariyapuggalā ariyamaggena lobho pahīyati pajahīyati, accantameva pariccajīyati. Yathā kiṃ? Udabindūva pokkharāti paduminipaṇṇato udakabindu viya. Sesagāthānampi iminā nayena attho veditabbo.
তথা দোসস্স –
Tathā dosassa –
‘‘যদপি দুট্ঠো অভিসঙ্খরোতি কাযেন ৰাচায মনসা তদপি অকুসলং; যদপি দুট্ঠো দোসেন অভিভূতো পরিযাদিন্নচিত্তো পরস্স অসতা দুক্খং উপ্পাদেতি ৰধেন ৰা বন্ধেন ৰা জানিযা ৰা গরহায ৰা পব্বাজনায ৰা বলৰম্হি বলত্থো ইতি, তদপি অকুসলং। ইতিস্সমে দোসজা দোসনিদানা দোসসমুদযা দোসপচ্চযা অনেকে পাপকা অকুসলা ধম্মা সম্ভৰন্তী’’তি (অ॰ নি॰ ৩.৭০)।
‘‘Yadapi duṭṭho abhisaṅkharoti kāyena vācāya manasā tadapi akusalaṃ; yadapi duṭṭho dosena abhibhūto pariyādinnacitto parassa asatā dukkhaṃ uppādeti vadhena vā bandhena vā jāniyā vā garahāya vā pabbājanāya vā balavamhi balattho iti, tadapi akusalaṃ. Itissame dosajā dosanidānā dosasamudayā dosapaccayā aneke pāpakā akusalā dhammā sambhavantī’’ti (a. ni. 3.70).
তথা –
Tathā –
‘‘দুট্ঠো খো, ব্রাহ্মণ, দোসেন অভিভূতো পরিযাদিন্নচিত্তো অত্তব্যাবাধাযপি চেতেতি, পরব্যাবাধাযপি চেতেতি, উভযব্যাবাধাযপি চেতেতি চেতসিকম্পি দুক্খং দোমনস্সং পটিসংৰেদেতী’’তি (অ॰ নি॰ ৩.৫৫)।
‘‘Duṭṭho kho, brāhmaṇa, dosena abhibhūto pariyādinnacitto attabyābādhāyapi ceteti, parabyābādhāyapi ceteti, ubhayabyābādhāyapi ceteti cetasikampi dukkhaṃ domanassaṃ paṭisaṃvedetī’’ti (a. ni. 3.55).
তথা –
Tathā –
‘‘দুট্ঠো খো, ব্রাহ্মণ, দোসেন অভিভূতো পরিযাদিন্নচিত্তো অত্তত্থম্পি যথাভূতং ন পজানাতি , পরত্থম্পি যথাভূতং ন পজানাতি, উভযত্থম্পি যথা ভূতং ন পজানাতী’’তি (অ॰ নি॰ ৩.৫৫) –
‘‘Duṭṭho kho, brāhmaṇa, dosena abhibhūto pariyādinnacitto attatthampi yathābhūtaṃ na pajānāti , paratthampi yathābhūtaṃ na pajānāti, ubhayatthampi yathā bhūtaṃ na pajānātī’’ti (a. ni. 3.55) –
আদিসুত্তপদানুসারেন অনত্থজননতা অত্থহানিহেতুতা চ ৰেদিতব্বা।
Ādisuttapadānusārena anatthajananatā atthahānihetutā ca veditabbā.
তথা মোহস্স ‘‘যদপি মূল়্হো অভিসঙ্খরোতি কাযেন ৰাচায মনসা’’তিআদিনা (অ॰ নি॰ ৩.৭০), ‘‘মূল়্হো খো, ব্রাহ্মণ, মোহেন অভিভূতো পরিযাদিন্নচিত্তো অত্তব্যাবাধাযপি চেতেতী’’তিআদিনা(অ॰ নি॰ ৩.৫৫), ‘‘অত্তত্থম্পি যথাভূতং ন পজানাতী’’তিআদিনা (অ॰ নি॰ ৩.৫৫) চ আগতসুত্তপদানুসারেন ৰেদিতব্বা।
Tathā mohassa ‘‘yadapi mūḷho abhisaṅkharoti kāyena vācāya manasā’’tiādinā (a. ni. 3.70), ‘‘mūḷho kho, brāhmaṇa, mohena abhibhūto pariyādinnacitto attabyābādhāyapi cetetī’’tiādinā(a. ni. 3.55), ‘‘attatthampi yathābhūtaṃ na pajānātī’’tiādinā (a. ni. 3.55) ca āgatasuttapadānusārena veditabbā.
তালপক্কংৰ বন্ধনাতি তালফলং ৰিয উসুমুপ্পাদেন ৰণ্টতো, ততিযমগ্গঞাণুপ্পাদেন তস্স চিত্ততো দোসো পহীযতি, পরিচ্চজীযতীতি অত্থো। মোহং ৰিহন্তি সো সব্বন্তি সো অরিযপুগ্গলো সব্বং অনৰসেসং মোহং চতুত্থমগ্গেন ৰিহন্তি ৰিধমতি সমুচ্ছিন্দতি। আদিচ্চোৰুদযং তমন্তি আদিচ্চো ৰিয উদযং উগ্গচ্ছন্তো তমং অন্ধকারং।
Tālapakkaṃvabandhanāti tālaphalaṃ viya usumuppādena vaṇṭato, tatiyamaggañāṇuppādena tassa cittato doso pahīyati, pariccajīyatīti attho. Mohaṃ vihanti so sabbanti so ariyapuggalo sabbaṃ anavasesaṃ mohaṃ catutthamaggena vihanti vidhamati samucchindati. Ādiccovudayaṃ tamanti ādicco viya udayaṃ uggacchanto tamaṃ andhakāraṃ.
নৰমসুত্তৰণ্ণনা নিট্ঠিতা।
Navamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ৯. অন্তরামলসুত্তং • 9. Antarāmalasuttaṃ
