| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៧. អន្តគ្គាហិកាទិដ្ឋិនិទ្ទេសោ
7. Antaggāhikādiṭṭhiniddeso
១៤០. អន្តគ្គាហិកាយ ទិដ្ឋិយា កតមេហិ បញ្ញាសាយ អាការេហិ អភិនិវេសោ ហោតិ? ‘‘សស្សតោ លោកោ’’តិ – អន្តគ្គាហិកាយ ទិដ្ឋិយា កតិហាការេហិ អភិនិវេសោ ហោតិ? ‘‘អសស្សតោ លោកោ’’តិ – អន្តគ្គាហិកាយ ទិដ្ឋិយា កតិហាការេហិ អភិនិវេសោ ហោតិ? ‘‘អន្តវា លោកោ’’តិ – អន្តគ្គាហិកាយ ទិដ្ឋិយា… ‘‘អនន្តវា លោកោ’’តិ – អន្តគ្គាហិកាយ ទិដ្ឋិយា… ‘‘តំ ជីវំ តំ សរីរ’’ន្តិ – អន្តគ្គាហិកាយ ទិដ្ឋិយា… ‘‘អញ្ញំ ជីវំ អញ្ញំ សរីរ’’ន្តិ – អន្តគ្គាហិកាយ ទិដ្ឋិយា… ‘‘ហោតិ តថាគតោ បរំ មរណា’’តិ…បេ.… ន ហោតិ តថាគតោ បរំ មរណា’’តិ… ‘‘ហោតិ ច ន ច ហោតិ តថាគតោ បរំ មរណា’’តិ… ‘‘នេវ ហោតិ ន ន ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា កតិហាការេហិ អភិនិវេសោ ហោតិ?
140. Antaggāhikāya diṭṭhiyā katamehi paññāsāya ākārehi abhiniveso hoti? ‘‘Sassato loko’’ti – antaggāhikāya diṭṭhiyā katihākārehi abhiniveso hoti? ‘‘Asassato loko’’ti – antaggāhikāya diṭṭhiyā katihākārehi abhiniveso hoti? ‘‘Antavā loko’’ti – antaggāhikāya diṭṭhiyā… ‘‘anantavā loko’’ti – antaggāhikāya diṭṭhiyā… ‘‘taṃ jīvaṃ taṃ sarīra’’nti – antaggāhikāya diṭṭhiyā… ‘‘aññaṃ jīvaṃ aññaṃ sarīra’’nti – antaggāhikāya diṭṭhiyā… ‘‘hoti tathāgato paraṃ maraṇā’’ti…pe… na hoti tathāgato paraṃ maraṇā’’ti… ‘‘hoti ca na ca hoti tathāgato paraṃ maraṇā’’ti… ‘‘neva hoti na na hoti tathāgato paraṃ maraṇā’’ti – antaggāhikāya diṭṭhiyā katihākārehi abhiniveso hoti?
‘‘សស្សតោ លោកោ’’តិ – អន្តគ្គាហិកាយ ទិដ្ឋិយា បញ្ចហាការេហិ អភិនិវេសោ ហោតិ…បេ.… ‘‘នេវ ហោតិ ន ន ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា បញ្ចហាការេហិ អភិនិវេសោ ហោតិ។
‘‘Sassato loko’’ti – antaggāhikāya diṭṭhiyā pañcahākārehi abhiniveso hoti…pe… ‘‘neva hoti na na hoti tathāgato paraṃ maraṇā’’ti – antaggāhikāya diṭṭhiyā pañcahākārehi abhiniveso hoti.
[ក] ‘‘សស្សតោ លោកោ’’តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? រូបំ លោកោ ចេវ សស្សតំ ចាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘សស្សតោ លោកោ’’តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ …បេ.… ឥមានិ សញ្ញោជនានិ, ន ច ទិដ្ឋិយោ។
[Ka] ‘‘sassato loko’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ loko ceva sassataṃ cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘sassato loko’’ti – antaggāhikā diṭṭhi. Antaggāhikā diṭṭhi micchādiṭṭhi …pe… imāni saññojanāni, na ca diṭṭhiyo.
វេទនា លោកោ ចេវ សស្សតា ចាតិ…បេ.… សញ្ញា លោកោ ចេវ សស្សតា ចាតិ…បេ.… សង្ខារា លោកោ ចេវ សស្សតា ចាតិ…បេ.… វិញ្ញាណំ លោកោ ចេវ សស្សតញ្ចាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បញ្ចមី សស្សតោ លោកោតិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។ ‘‘សស្សតោ លោកោ’’តិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Vedanā loko ceva sassatā cāti…pe… saññā loko ceva sassatā cāti…pe… saṅkhārā loko ceva sassatā cāti…pe… viññāṇaṃ loko ceva sassatañcāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ pañcamī sassato lokoti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo. ‘‘Sassato loko’’ti – antaggāhikāya diṭṭhiyā imehi pañcahākārehi abhiniveso hoti.
[ខ] ‘‘អសស្សតោ លោកោ’’តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? រូបំ លោកោ ចេវ អសស្សតញ្ចាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ…បេ.… អយំ បឋមា ‘‘អសស្សតោ លោកោ’’តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ ទិដ្ឋិវិបត្តិ…បេ.… ឥមានិ សញ្ញោជនានិ, ន ច ទិដ្ឋិយោ។
[Kha] ‘‘asassato loko’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ loko ceva asassatañcāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ayaṃ paṭhamā ‘‘asassato loko’’ti – antaggāhikā diṭṭhi. Antaggāhikā diṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo.
វេទនា លោកោ ចេវ អសស្សតា ចាតិ…បេ.… សញ្ញា លោកោ ចេវ អសស្សតា ចាតិ…បេ.… សង្ខារា លោកោ ចេវ អសស្សតា ចាតិ…បេ.… វិញ្ញាណំ លោកោ ចេវ អសស្សតញ្ចាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ ។ ‘‘អសស្សតោ លោកោ’’តិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Vedanā loko ceva asassatā cāti…pe… saññā loko ceva asassatā cāti…pe… saṅkhārā loko ceva asassatā cāti…pe… viññāṇaṃ loko ceva asassatañcāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo . ‘‘Asassato loko’’ti – antaggāhikāya diṭṭhiyā imehi pañcahākārehi abhiniveso hoti.
[គ] ‘‘អន្តវា លោកោ’’តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? ឥធេកច្ចោ បរិត្តំ ឱកាសំ នីលកតោ ផរតិ។ តស្ស ឯវំ ហោតិ – ‘‘អន្តវា អយំ លោកោ បរិវដុមោ’’តិ។ អន្តសញ្ញី ហោតិ។ យំ ផរតិ, តំ វត្ថុ ចេវ លោកោ ច។ យេន ផរតិ, សោ អត្តា ចេវ លោកោ ចាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘អន្តវា លោកោ’’តិ អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។
[Ga] ‘‘antavā loko’’ti – antaggāhikāya diṭṭhiyā katamehi pañcahākārehi abhiniveso hoti? Idhekacco parittaṃ okāsaṃ nīlakato pharati. Tassa evaṃ hoti – ‘‘antavā ayaṃ loko parivaṭumo’’ti. Antasaññī hoti. Yaṃ pharati, taṃ vatthu ceva loko ca. Yena pharati, so attā ceva loko cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘antavā loko’’ti antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
ឥធេកច្ចោ បរិត្តំ ឱកាសំ បីតកតោ ផរតិ… លោហិតកតោ ផរតិ… ឱទាតកតោ ផរតិ… ឱភាសកតោ ផរតិ។ តស្ស ឯវំ ហោតិ – ‘‘អន្តវា អយំ លោកោ បរិវដុមោ’’តិ។ អន្តសញ្ញី ហោតិ។ យំ ផរតិ តំ វត្ថុ ចេវ លោកោ ច។ យេន ផរតិ សោ អត្តា ចេវ លោកោ ចាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ…បេ.… អន្តវា លោកោតិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Idhekacco parittaṃ okāsaṃ pītakato pharati… lohitakato pharati… odātakato pharati… obhāsakato pharati. Tassa evaṃ hoti – ‘‘antavā ayaṃ loko parivaṭumo’’ti. Antasaññī hoti. Yaṃ pharati taṃ vatthu ceva loko ca. Yena pharati so attā ceva loko cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… antavā lokoti – antaggāhikāya diṭṭhiyā imehi pañcahākārehi abhiniveso hoti.
[ឃ] ‘‘អនន្តវា លោកោ’’តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? ឥធេកច្ចោ វិបុលំ ឱកាសំ នីលកតោ ផរតិ។ តស្ស ឯវំ ហោតិ – ‘‘អនន្តវា អយំ លោកោ អបរិយន្តោ’’តិ។ អនន្តសញ្ញី ហោតិ។ យំ ផរតិ តំ វត្ថុ ចេវ លោកោ ច; យេន ផរតិ សោ អត្តា ចេវ លោកោ ចាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘អនន្តវា លោកោ’’តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។
[Gha] ‘‘anantavā loko’’ti – antaggāhikāya diṭṭhiyā katamehi pañcahākārehi abhiniveso hoti? Idhekacco vipulaṃ okāsaṃ nīlakato pharati. Tassa evaṃ hoti – ‘‘anantavā ayaṃ loko apariyanto’’ti. Anantasaññī hoti. Yaṃ pharati taṃ vatthu ceva loko ca; yena pharati so attā ceva loko cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘anantavā loko’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
ឥធេកច្ចោ វិបុលំ ឱកាសំ បីតកតោ ផរតិ… លោហិតកតោ ផរតិ… ឱទាតកតោ ផរតិ… ឱភាសកតោ ផរតិ។ តស្ស ឯវំ ហោតិ – ‘‘អនន្តវា អយំ លោកោ អបរិយន្តោ’’តិ។ អនន្តសញ្ញី ហោតិ។ យំ ផរតិ តំ វត្ថុ ចេវ លោកោ ច; យេន ផរតិ សោ អត្តា ចេវ លោកោ ចាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ…បេ.… អនន្តវា លោកោតិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Idhekacco vipulaṃ okāsaṃ pītakato pharati… lohitakato pharati… odātakato pharati… obhāsakato pharati. Tassa evaṃ hoti – ‘‘anantavā ayaṃ loko apariyanto’’ti. Anantasaññī hoti. Yaṃ pharati taṃ vatthu ceva loko ca; yena pharati so attā ceva loko cāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… anantavā lokoti – antaggāhikāya diṭṭhiyā imehi pañcahākārehi abhiniveso hoti.
[ង] ‘‘តំ ជីវំ តំ សរីរ’’ន្តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? រូបំ ជីវញ្ចេវ សរីរញ្ច; យំ ជីវំ តំ សរីរំ, យំ សរីរំ តំ ជីវន្តិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘តំ ជីវំ តំ សរីរ’’ន្តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។
[Ṅa] ‘‘taṃ jīvaṃ taṃ sarīra’’nti – antaggāhikāya diṭṭhiyā katamehi pañcahākārehi abhiniveso hoti? Rūpaṃ jīvañceva sarīrañca; yaṃ jīvaṃ taṃ sarīraṃ, yaṃ sarīraṃ taṃ jīvanti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘taṃ jīvaṃ taṃ sarīra’’nti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
វេទនា ជីវា ចេវ សរីរំ ច… សញ្ញា ជីវា ចេវ សរីរំ ច… សង្ខារា ជីវា ចេវ សរីរំ ច… វិញ្ញាណំ ជីវញ្ចេវ សរីរញ្ច; យំ ជីវំ តំ សរីរំ, យំ សរីរំ តំ ជីវន្តិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ…បេ.… ‘‘តំ ជីវំ តំ សរីរ’’ន្តិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Vedanā jīvā ceva sarīraṃ ca… saññā jīvā ceva sarīraṃ ca… saṅkhārā jīvā ceva sarīraṃ ca… viññāṇaṃ jīvañceva sarīrañca; yaṃ jīvaṃ taṃ sarīraṃ, yaṃ sarīraṃ taṃ jīvanti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ‘‘taṃ jīvaṃ taṃ sarīra’’nti – antaggāhikāya diṭṭhiyā imehi pañcahākārehi abhiniveso hoti.
[ច] ‘‘អញ្ញំ ជីវំ អញ្ញំ សរីរ’’ន្តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? រូបំ សរីរំ, ន ជីវំ; ជីវំ ន សរីរំ។ អញ្ញំ ជីវំ អញ្ញំ សរីរន្តិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘អញ្ញំ ជីវំ អញ្ញំ សរីរ’’ន្តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។
[Ca] ‘‘aññaṃ jīvaṃ aññaṃ sarīra’’nti – antaggāhikāya diṭṭhiyā katamehi pañcahākārehi abhiniveso hoti? Rūpaṃ sarīraṃ, na jīvaṃ; jīvaṃ na sarīraṃ. Aññaṃ jīvaṃ aññaṃ sarīranti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘aññaṃ jīvaṃ aññaṃ sarīra’’nti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
វេទនា សរីរំ, ន ជីវំ… សញ្ញា សរីរំ, ន ជីវំ… សង្ខារា សរីរំ, ន ជីវំ… វិញ្ញាណំ សរីរំ, ន ជីវំ; ជីវំ ន សរីរំ។ អញ្ញំ ជីវំ, អញ្ញំ សរីរន្តិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ…បេ.… អញ្ញំ ជីវំ, អញ្ញំ សរីរន្តិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Vedanā sarīraṃ, na jīvaṃ… saññā sarīraṃ, na jīvaṃ… saṅkhārā sarīraṃ, na jīvaṃ… viññāṇaṃ sarīraṃ, na jīvaṃ; jīvaṃ na sarīraṃ. Aññaṃ jīvaṃ, aññaṃ sarīranti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… aññaṃ jīvaṃ, aññaṃ sarīranti – antaggāhikāya diṭṭhiyā imehi pañcahākārehi abhiniveso hoti.
[ឆ] ‘‘ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? រូបំ ឥធេវ មរណធម្មំ។ តថាគតោ កាយស្ស ភេទា ហោតិបិ តិដ្ឋតិបិ ឧប្បជ្ជតិបិ និព្ពត្តតិបីតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘ហោតិ តថាគតោ បរំ មរណា’’តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។
[Cha] ‘‘hoti tathāgato paraṃ maraṇā’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ idheva maraṇadhammaṃ. Tathāgato kāyassa bhedā hotipi tiṭṭhatipi uppajjatipi nibbattatipīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
វេទនា ឥធេវ មរណធម្មា…បេ.… សញ្ញា ឥធេវ មរណធម្មា… សង្ខារា ឥធេវ មរណធម្មា… វិញ្ញាណំ ឥធេវ មរណធម្មំ។ តថាគតោ កាយស្ស ភេទា ហោតិបិ តិដ្ឋតិបិ ឧប្បជ្ជតិបិ និព្ពត្តតិបីតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ…បេ.… ‘‘ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Vedanā idheva maraṇadhammā…pe… saññā idheva maraṇadhammā… saṅkhārā idheva maraṇadhammā… viññāṇaṃ idheva maraṇadhammaṃ. Tathāgato kāyassa bhedā hotipi tiṭṭhatipi uppajjatipi nibbattatipīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ‘‘hoti tathāgato paraṃ maraṇā’’ti – antaggāhikāya diṭṭhiyā imehi pañcahākārehi abhiniveso hoti.
[ជ] ‘‘ន ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? រូបំ ឥធេវ មរណធម្មំ។ តថាគតោបិ កាយស្ស ភេទា ឧច្ឆិជ្ជតិ វិនស្សតិ; ន ហោតិ តថាគតោ បរំ មរណាតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘ន ហោតិ តថាគតោ បរំ មរណា’’តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។
[Ja] ‘‘na hoti tathāgato paraṃ maraṇā’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ idheva maraṇadhammaṃ. Tathāgatopi kāyassa bhedā ucchijjati vinassati; na hoti tathāgato paraṃ maraṇāti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘na hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
វេទនា ឥធេវ មរណធម្មា…បេ.… សញ្ញា ឥធេវ មរណធម្មា… សង្ខារា ឥធេវ មរណធម្មា… វិញ្ញាណំ ឥធេវ មរណធម្មំ។ តថាគតោបិ កាយស្ស ភេទា ឧច្ឆិជ្ជតិ វិនស្សតិ។ ‘‘ន ហោតិ តថាគតោ បរំ មរណា’’តិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ…បេ.… ‘‘ន ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Vedanā idheva maraṇadhammā…pe… saññā idheva maraṇadhammā… saṅkhārā idheva maraṇadhammā… viññāṇaṃ idheva maraṇadhammaṃ. Tathāgatopi kāyassa bhedā ucchijjati vinassati. ‘‘Na hoti tathāgato paraṃ maraṇā’’ti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ‘‘na hoti tathāgato paraṃ maraṇā’’ti – antaggāhikāya diṭṭhiyā imehi pañcahākārehi abhiniveso hoti.
[ឈ] ‘‘ហោតិ ច ន ច ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? រូបំ ឥធេវ មរណធម្មំ។ តថាគតោ កាយស្ស ភេទា ហោតិ ច ន ច ហោតីតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘ហោតិ ច ន ច ហោតិ តថាគតោ បរំ មរណា’’តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ ន ច ទិដ្ឋិយោ។
[Jha] ‘‘hoti ca na ca hoti tathāgato paraṃ maraṇā’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ idheva maraṇadhammaṃ. Tathāgato kāyassa bhedā hoti ca na ca hotīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘hoti ca na ca hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni na ca diṭṭhiyo.
វេទនា ឥធេវ មរណធម្មា…បេ.… សញ្ញា ឥធេវ មរណធម្មា… សង្ខារា ឥធេវ មរណធម្មា… វិញ្ញាណំ ឥធេវ មរណធម្មំ។ តថាគតោ កាយស្ស ភេទា ហោតិ ច ន ច ហោតីតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ…បេ.… ‘‘ហោតិ ច ន ច ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។
Vedanā idheva maraṇadhammā…pe… saññā idheva maraṇadhammā… saṅkhārā idheva maraṇadhammā… viññāṇaṃ idheva maraṇadhammaṃ. Tathāgato kāyassa bhedā hoti ca na ca hotīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi…pe… ‘‘hoti ca na ca hoti tathāgato paraṃ maraṇā’’ti – antaggāhikāya diṭṭhiyā imehi pañcahākārehi abhiniveso hoti.
[ញ] ‘‘នេវ ហោតិ ន ន ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា កតមេហិ បញ្ចហាការេហិ អភិនិវេសោ ហោតិ? រូបំ ឥធេវ មរណធម្មំ។ តថាគតោ កាយស្ស ភេទា បរំ មរណា នេវ ហោតិ ន ន ហោតីតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ, អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បឋមា ‘‘នេវ ហោតិ ន ន ហោតិ តថាគតោ បរំ មរណា’’តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។
[Ña] ‘‘neva hoti na na hoti tathāgato paraṃ maraṇā’’ti – antaggāhikāya diṭṭhiyā katamehi pañcahākārehi abhiniveso hoti? Rūpaṃ idheva maraṇadhammaṃ. Tathāgato kāyassa bhedā paraṃ maraṇā neva hoti na na hotīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi, aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘neva hoti na na hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo.
វេទនា ឥធេវ មរណធម្មា…បេ.… សញ្ញា ឥធេវ មរណធម្មា… សង្ខារា ឥធេវ មរណធម្មា… វិញ្ញាណំ ឥធេវ មរណធម្មំ។ តថាគតោ កាយស្ស ភេទា បរំ មរណា នេវ ហោតិ ន ន ហោតីតិ – អភិនិវេសបរាមាសោ ទិដ្ឋិ។ តាយ ទិដ្ឋិយា សោ អន្តោ គហិតោតិ – អន្តគ្គាហិកា ទិដ្ឋិ។ ទិដ្ឋិ ន វត្ថុ, វត្ថុ ន ទិដ្ឋិ។ អញ្ញា ទិដ្ឋិ, អញ្ញំ វត្ថុ។ យា ច ទិដ្ឋិ យញ្ច វត្ថុ – អយំ បញ្ចមី ‘‘នេវ ហោតិ ន ន ហោតិ តថាគតោ បរំ មរណា’’តិ – អន្តគ្គាហិកា ទិដ្ឋិ។ អន្តគ្គាហិកា ទិដ្ឋិ មិច្ឆាទិដ្ឋិ…បេ.… ឥមានិ សញ្ញោជនានិ, ន ច ទិដ្ឋិយោ។ ‘‘នេវ ហោតិ ន ន ហោតិ តថាគតោ បរំ មរណា’’តិ – អន្តគ្គាហិកាយ ទិដ្ឋិយា ឥមេហិ បញ្ចហាការេហិ អភិនិវេសោ ហោតិ។ អន្តគ្គាហិកាយ ទិដ្ឋិយា ឥមេហិ បញ្ញាសាយ អាការេហិ អភិនិវេសោ ហោតិ។
Vedanā idheva maraṇadhammā…pe… saññā idheva maraṇadhammā… saṅkhārā idheva maraṇadhammā… viññāṇaṃ idheva maraṇadhammaṃ. Tathāgato kāyassa bhedā paraṃ maraṇā neva hoti na na hotīti – abhinivesaparāmāso diṭṭhi. Tāya diṭṭhiyā so anto gahitoti – antaggāhikā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ pañcamī ‘‘neva hoti na na hoti tathāgato paraṃ maraṇā’’ti – antaggāhikā diṭṭhi. Antaggāhikā diṭṭhi micchādiṭṭhi…pe… imāni saññojanāni, na ca diṭṭhiyo. ‘‘Neva hoti na na hoti tathāgato paraṃ maraṇā’’ti – antaggāhikāya diṭṭhiyā imehi pañcahākārehi abhiniveso hoti. Antaggāhikāya diṭṭhiyā imehi paññāsāya ākārehi abhiniveso hoti.
អន្តគ្គាហិកាទិដ្ឋិនិទ្ទេសោ សត្តមោ។
Antaggāhikādiṭṭhiniddeso sattamo.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៧. អន្តគ្គាហិកាទិដ្ឋិនិទ្ទេសវណ្ណនា • 7. Antaggāhikādiṭṭhiniddesavaṇṇanā
