| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၂၃. အနောလောကိယနိဒ္ဒေသဝဏ္ဏနာ
23. Anolokiyaniddesavaṇṇanā
၁၈၁. သာရတ္တောတိ သံရတ္တော, သဉ္ဇာတရာဂစိတ္တောတိ အတ္ထော။ ဣတ္ထိယာတိ တဒဟုဇာတာယပိ ပဋသတနိဝတ္ထာယ အနောကာသုပနိဇ္ဈာယနေ အန္တမသော တိရစ္ဆာနဂတာနမ္ပိ ဒုက္ကဋမေဝ။ ဘိက္ခာဒာယိယာတိ ဥပလက္ခဏမတ္တံ, ဣတ္ထီ ဝာ ဟောတု ပုရိသော ဝာ, ဘိက္ခာဒာနသမယေ အသာရတ္တေနာပိ မုခံ န ဥလ္လောကေတဗ္ဗံ။ ဥဇ္ဈာနံ လာမကတော သံစိန္တနံ, ကောပော, တတ္ထ သညာ အသ္သာတိ ဥဇ္ဈာနသညီ။ ဣဓ ပန ဂိလာနောပိ န မုစ္စတိ။ အာဒာသေ ဥဒကပတ္တေတိ ဣမိနာ သေသေသု ကံသပတ္တာဒီသု ကဉ္ဇိယာဒီသု စ မုခနိမိတ္တံ ပညာယတိ, တေသံ သင္ဂဟော။ ‘‘သဉ္ဆဝိ နု ခော မေ ဝဏ္ဏော, နော, ဇိဏ္ဏော နု ခောမ္ဟိ, နော’’တိ ပန ဩလောကေတုံ ဝဋ္ဋတိ။ အသ္သာတိ ဘိက္ခုနော။
181.Sārattoti saṃratto, sañjātarāgacittoti attho. Itthiyāti tadahujātāyapi paṭasatanivatthāya anokāsupanijjhāyane antamaso tiracchānagatānampi dukkaṭameva. Bhikkhādāyiyāti upalakkhaṇamattaṃ, itthī vā hotu puriso vā, bhikkhādānasamaye asārattenāpi mukhaṃ na ulloketabbaṃ. Ujjhānaṃ lāmakato saṃcintanaṃ, kopo, tattha saññā assāti ujjhānasaññī. Idha pana gilānopi na muccati. Ādāse udakapatteti iminā sesesu kaṃsapattādīsu kañjiyādīsu ca mukhanimittaṃ paññāyati, tesaṃ saṅgaho. ‘‘Sañchavi nu kho me vaṇṇo, no, jiṇṇo nu khomhi, no’’ti pana oloketuṃ vaṭṭati. Assāti bhikkhuno.
အနောလောကိယနိဒ္ဒေသဝဏ္ဏနာ နိဋ္ဌိတာ။
Anolokiyaniddesavaṇṇanā niṭṭhitā.
