| Library / Tipiṭaka / ತಿಪಿಟಕ • Tipiṭaka / ಕಙ್ಖಾವಿತರಣೀ-ಅಭಿನವ-ಟೀಕಾ • Kaṅkhāvitaraṇī-abhinava-ṭīkā |
೪. ಅಞ್ಞವಿಞ್ಞಾಪನಸಿಕ್ಖಾಪದವಣ್ಣನಾ
4. Aññaviññāpanasikkhāpadavaṇṇanā
ಪಟಿಲಾಭೇನಾತಿ ಪಠಮವಿಞ್ಞತ್ತಿತೋ ಊನತರಸ್ಸಾಪಿ ಅಞ್ಞಸ್ಸ ಪಟಿಲಾಭೇನ।
Paṭilābhenāti paṭhamaviññattito ūnatarassāpi aññassa paṭilābhena.
ತಸ್ಮಿಂ ಅಪ್ಪಹೋನ್ತೇ ಪುನ ತಞ್ಞೇವಾತಿ ಯಂ ಪಠಮಂ ವಿಞ್ಞತ್ತಂ, ಥೋಕತ್ತಾ ತಸ್ಮಿಂ ಅಪ್ಪಹೋನ್ತೇ ಪುನ ತಞ್ಞೇವ ವಿಞ್ಞಾಪೇನ್ತಿಯಾತಿ ಅತ್ಥೋ। ಅಞ್ಞೇನಪಿ ಅತ್ಥೇ ಸತೀ ತಿ ಪಠಮಂ ವಿಞ್ಞತ್ತಿತೋ ಅಞ್ಞೇನಪಿ ಅತ್ಥೇ ಸತಿ। ತೇನ ಸದ್ಧಿಂ ಅಞ್ಞಞ್ಚಾತಿ ಯಂ ಪಠಮಂ ವಿಞ್ಞತ್ತಂ, ತೇನ ಸದ್ಧಿಂ ಅಞ್ಞಞ್ಚ। ಕಿಂ ವುತ್ತಂ ಹೋತಿ? ಸಚೇ ಪಠಮಂ ಸಪ್ಪಿ ವಿಞ್ಞತ್ತಂ, ‘‘ಯಮಕಂ ಪಚಿತಬ್ಬ’’ನ್ತಿ ಚ ವೇಜ್ಜೇನ ವುತ್ತತ್ತಾ ತೇಲೇನಾಪಿ ಅತ್ಥೋ ಹೋತಿ। ತತೋ ‘‘ತೇಲೇನಾಪಿ ಮೇ ಅತ್ಥೋ’’ತಿ ಏವಮಾದಿನಾ ಅಞ್ಞಞ್ಚ ವಿಞ್ಞಾಪೇನ್ತಿಯಾತಿ ವುತ್ತಂ ಹೋತಿ। ಆನಿಸಂಸಂ ದಸ್ಸೇತ್ವಾತಿ ‘‘ಸಚೇ ಕಹಾಪಣಸ್ಸ ಸಪ್ಪಿ ಆಭತಂ ಹೋತಿ, ಇಮಿನಾ ಮೂಲೇನ ದ್ವಿಗುಣಂ ತೇಲಂ ಲಬ್ಭತಿ, ತೇಲೇನಾಪಿ ಚ ಇದಂ ಕಿಚ್ಚಂ ನಿಪ್ಪಜ್ಜತಿ, ತಸ್ಮಾ ತೇಲಂ ಆಹರಾ’’ತಿ ಏವಂ ಆನಿಸಂಸಂ ದಸ್ಸೇತ್ವಾ।
Tasmiṃ appahonte puna taññevāti yaṃ paṭhamaṃ viññattaṃ, thokattā tasmiṃ appahonte puna taññeva viññāpentiyāti attho. Aññenapi atthe satī ti paṭhamaṃ viññattito aññenapi atthe sati. Tena saddhiṃ aññañcāti yaṃ paṭhamaṃ viññattaṃ, tena saddhiṃ aññañca. Kiṃ vuttaṃ hoti? Sace paṭhamaṃ sappi viññattaṃ, ‘‘yamakaṃ pacitabba’’nti ca vejjena vuttattā telenāpi attho hoti. Tato ‘‘telenāpi me attho’’ti evamādinā aññañca viññāpentiyāti vuttaṃ hoti. Ānisaṃsaṃ dassetvāti ‘‘sace kahāpaṇassa sappi ābhataṃ hoti, iminā mūlena dviguṇaṃ telaṃ labbhati, telenāpi ca idaṃ kiccaṃ nippajjati, tasmā telaṃ āharā’’ti evaṃ ānisaṃsaṃ dassetvā.
ಅಞ್ಞವಿಞ್ಞಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।
Aññaviññāpanasikkhāpadavaṇṇanā niṭṭhitā.
