| Library / Tipiṭaka / ತಿಪಿಟಕ • Tipiṭaka / ಥೇರೀಗಾಥಾ-ಅಟ್ಠಕಥಾ • Therīgāthā-aṭṭhakathā |
೫. ಪಞ್ಚಕನಿಪಾತೋ
5. Pañcakanipāto
೧. ಅಞ್ಞತರಾಥೇರೀಗಾಥಾವಣ್ಣನಾ
1. Aññatarātherīgāthāvaṇṇanā
ಪಞ್ಚಕನಿಪಾತೇ ಪಣ್ಣವೀಸತಿ ವಸ್ಸಾನೀತಿಆದಿಕಾ ಅಞ್ಞತರಾಯ ಥೇರಿಯಾ ಗಾಥಾ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನನ್ತೀ ಇಮಸ್ಮಿಂ ಬುದ್ಧುಪ್ಪಾದೇ ದೇವದಹನಗರೇ ಮಹಾಪಜಾಪತಿಗೋತಮಿಯಾ ಧಾತೀ ಹುತ್ವಾ ವಡ್ಢೇಸಿ। ನಾಮಗೋತ್ತತೋ ಪನ ಅಪಞ್ಞಾತಾ ಅಹೋಸಿ। ಸಾ ಮಹಾಪಜಾಪತಿಗೋತಮಿಯಾ ಪಬ್ಬಜಿತಕಾಲೇ ಸಯಮ್ಪಿ ಪಬ್ಬಜಿತ್ವಾ ಪಞ್ಚವೀಸತಿ ಸಂವಚ್ಛರಾನಿ ಕಾಮರಾಗೇನ ಉಪದ್ದುತಾ ಅಚ್ಛರಾಸಙ್ಘಾತಮತ್ತಮ್ಪಿ ಕಾಲಂ ಚಿತ್ತೇಕಗ್ಗತಂ ಅಲಭನ್ತೀ ಬಾಹಾ ಪಗ್ಗಯ್ಹ ಕನ್ದಮಾನಾ ಧಮ್ಮದಿನ್ನಾಥೇರಿಯಾ ಸನ್ತಿಕೇ ಧಮ್ಮಂ ಸುತ್ವಾ ಕಾಮೇಹಿ ವಿನಿವತ್ತಿತಮಾನಸಾ ಕಮ್ಮಟ್ಠಾನಂ ಗಹೇತ್ವಾ ಭಾವನಮನುಯಞ್ಜನ್ತೀ ನ ಚಿರಸ್ಸೇವ ಛಳಭಿಞ್ಞಾ ಹುತ್ವಾ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಉದಾನವಸೇನ –
Pañcakanipāte paṇṇavīsati vassānītiādikā aññatarāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī imasmiṃ buddhuppāde devadahanagare mahāpajāpatigotamiyā dhātī hutvā vaḍḍhesi. Nāmagottato pana apaññātā ahosi. Sā mahāpajāpatigotamiyā pabbajitakāle sayampi pabbajitvā pañcavīsati saṃvaccharāni kāmarāgena upaddutā accharāsaṅghātamattampi kālaṃ cittekaggataṃ alabhantī bāhā paggayha kandamānā dhammadinnātheriyā santike dhammaṃ sutvā kāmehi vinivattitamānasā kammaṭṭhānaṃ gahetvā bhāvanamanuyañjantī na cirasseva chaḷabhiññā hutvā attano paṭipattiṃ paccavekkhitvā udānavasena –
೬೭.
67.
‘‘ಪಣ್ಣವೀಸತಿ ವಸ್ಸಾನಿ, ಯತೋ ಪಬ್ಬಜಿತಾ ಅಹಂ।
‘‘Paṇṇavīsati vassāni, yato pabbajitā ahaṃ;
ನಾಚ್ಛರಾಸಙ್ಘಾತಮತ್ತಮ್ಪಿ, ಚಿತ್ತಸ್ಸೂಪಸಮಜ್ಝಗಂ॥
Nāccharāsaṅghātamattampi, cittassūpasamajjhagaṃ.
೬೮.
68.
‘‘ಅಲದ್ಧಾ ಚೇತಸೋ ಸನ್ತಿಂ, ಕಾಮರಾಗೇನವಸ್ಸುತಾ।
‘‘Aladdhā cetaso santiṃ, kāmarāgenavassutā;
ಬಾಹಾ ಪಗ್ಗಯ್ಹ ಕನ್ದನ್ತೀ, ವಿಹಾರಂ ಪಾವಿಸಿಂ ಅಹಂ॥
Bāhā paggayha kandantī, vihāraṃ pāvisiṃ ahaṃ.
೬೯.
69.
‘‘ಸಾ ಭಿಕ್ಖುನಿಂ ಉಪಾಗಚ್ಛಿಂ, ಯಾ ಮೇ ಸದ್ಧಾಯಿಕಾ ಅಹು।
‘‘Sā bhikkhuniṃ upāgacchiṃ, yā me saddhāyikā ahu;
ಸಾ ಮೇ ಧಮ್ಮಮದೇಸೇಸಿ, ಖನ್ಧಾಯತನಧಾತುಯೋ॥
Sā me dhammamadesesi, khandhāyatanadhātuyo.
೭೦.
70.
‘‘ತಸ್ಸಾ ಧಮ್ಮಂ ಸುಣಿತ್ವಾನ, ಏಕಮನ್ತೇ ಉಪಾವಿಸಿಂ।
‘‘Tassā dhammaṃ suṇitvāna, ekamante upāvisiṃ;
ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ॥
Pubbenivāsaṃ jānāmi, dibbacakkhu visodhitaṃ.
೭೧.
71.
‘‘ಚೇತೋಪರಿಚ್ಚಞಾಣಞ್ಚ , ಸೋತಧಾತು ವಿಸೋಧಿತಾ।
‘‘Cetopariccañāṇañca , sotadhātu visodhitā;
ಇದ್ಧೀಪಿ ಮೇ ಸಚ್ಛಿಕತಾ, ಪತ್ತೋ ಮೇ ಆಸವಕ್ಖಯೋ।
Iddhīpi me sacchikatā, patto me āsavakkhayo;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನ’’ನ್ತಿ॥ –
Chaḷabhiññā sacchikatā, kataṃ buddhassa sāsana’’nti. –
ಇಮಾ ಗಾಥಾ ಅಭಾಸಿ।
Imā gāthā abhāsi.
ತತ್ಥ ನಾಚ್ಛರಾಸಙ್ಘಾತಮತ್ತಮ್ಪೀತಿ ಅಚ್ಛರಾಘಟಿತಮತ್ತಮ್ಪಿ ಖಣಂ ಅಙ್ಗುಲಿಫೋಟನಮತ್ತಮ್ಪಿ ಕಾಲನ್ತಿ ಅತ್ಥೋ। ಚಿತ್ತಸ್ಸೂಪಸಮಜ್ಝಗನ್ತಿ ಚಿತ್ತಸ್ಸ ಉಪಸಮಂ ಚಿತ್ತೇಕಗ್ಗಂ ನ ಅಜ್ಝಗನ್ತಿ ಯೋಜನಾ, ನ ಪಟಿಲಭಿನ್ತಿ ಅತ್ಥೋ।
Tattha nāccharāsaṅghātamattampīti accharāghaṭitamattampi khaṇaṃ aṅguliphoṭanamattampi kālanti attho. Cittassūpasamajjhaganti cittassa upasamaṃ cittekaggaṃ na ajjhaganti yojanā, na paṭilabhinti attho.
ಕಾಮರಾಗೇನವಸ್ಸುತಾತಿ ಕಾಮಗುಣಸಙ್ಖಾತೇಸು ವತ್ಥುಕಾಮೇಸು ದಳ್ಹತರಾಭಿನಿವೇಸಿತಾಯ ಬಹಲೇನ ಛನ್ದರಾಗೇನ ತಿನ್ತಚಿತ್ತಾ।
Kāmarāgenavassutāti kāmaguṇasaṅkhātesu vatthukāmesu daḷhatarābhinivesitāya bahalena chandarāgena tintacittā.
ಭಿಕ್ಖುನಿನ್ತಿ ಧಮ್ಮದಿನ್ನತ್ಥೇರಿಂ ಸನ್ಧಾಯ ವದತಿ।
Bhikkhuninti dhammadinnattheriṃ sandhāya vadati.
ಚೇತೋಪರಿಚ್ಚಞಾಣಞ್ಚಾತಿ ಚೇತೋಪರಿಯಞಾಣಞ್ಚ ವಿಸೋಧಿತನ್ತಿ ಸಮ್ಬನ್ಧೋ, ಅಧಿಗತನ್ತಿ ಅತ್ಥೋ। ಸೇಸಂ ವುತ್ತನಯಮೇವ।
Cetopariccañāṇañcāti cetopariyañāṇañca visodhitanti sambandho, adhigatanti attho. Sesaṃ vuttanayameva.
ಅಞ್ಞತರಾಥೇರೀಗಾಥಾವಣ್ಣನಾ ನಿಟ್ಠಿತಾ।
Aññatarātherīgāthāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಥೇರೀಗಾಥಾಪಾಳಿ • Therīgāthāpāḷi / ೧. ಅಞ್ಞತರಾಥೇರೀಗಾಥಾ • 1. Aññatarātherīgāthā
