| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༥. པནྣརསམཝགྒོ
15. Pannarasamavaggo
(༡༤༦) ༢. ཨཉྙམཉྙཔཙྩཡཀཐཱ
(146) 2. Aññamaññapaccayakathā
༧༡༨. ཨཝིཛྫཱཔཙྩཡཱཝ སངྑཱརཱ, ན ཝཏྟབྦཾ – ‘‘སངྑཱརཔཙྩཡཱཔི ཨཝིཛྫཱ’’ཏི? ཨཱམནྟཱ། ནནུ ཨཝིཛྫཱ སངྑཱརེན སཧཛཱཏཱཏི? ཨཱམནྟཱ ། ཧཉྩི ཨཝིཛྫཱ སངྑཱརེན སཧཛཱཏཱ, ཏེན ཝཏ རེ ཝཏྟབྦེ – ‘‘ཨཝིཛྫཱཔཙྩཡཱཔི སངྑཱརཱ, སངྑཱརཔཙྩཡཱཔི ཨཝིཛྫཱ’’ཏི།
718. Avijjāpaccayāva saṅkhārā, na vattabbaṃ – ‘‘saṅkhārapaccayāpi avijjā’’ti? Āmantā. Nanu avijjā saṅkhārena sahajātāti? Āmantā . Hañci avijjā saṅkhārena sahajātā, tena vata re vattabbe – ‘‘avijjāpaccayāpi saṅkhārā, saṅkhārapaccayāpi avijjā’’ti.
ཏཎྷཱཔཙྩཡཱཝ ཨུཔཱདཱནཾ, ན ཝཏྟབྦཾ – ‘‘ཨུཔཱདཱནཔཙྩཡཱཔི ཏཎྷཱ’’ཏི? ཨཱམནྟཱ། ནནུ ཏཎྷཱ ཨུཔཱདཱནེན སཧཛཱཏཱཏི? ཨཱམནྟཱ། ཧཉྩི ཏཎྷཱ ཨུཔཱདཱནེན སཧཛཱཏཱ, ཏེན ཝཏ རེ ཝཏྟབྦེ – ‘‘ཏཎྷཱཔཙྩཡཱཔི ཨུཔཱདཱནཾ, ཨུཔཱདཱནཔཙྩཡཱཔི ཏཎྷཱ’’ཏི།
Taṇhāpaccayāva upādānaṃ, na vattabbaṃ – ‘‘upādānapaccayāpi taṇhā’’ti? Āmantā. Nanu taṇhā upādānena sahajātāti? Āmantā. Hañci taṇhā upādānena sahajātā, tena vata re vattabbe – ‘‘taṇhāpaccayāpi upādānaṃ, upādānapaccayāpi taṇhā’’ti.
༧༡༩. ‘‘ཛརཱམརཎཔཙྩཡཱ , བྷིཀྑཝེ, ཛཱཏི, ཛཱཏིཔཙྩཡཱ བྷཝོ’’ཏི – ཨཏྠེཝ སུཏྟནྟོཏི ? ནཏྠི། ཏེན ཧི ཨཝིཛྫཱཔཙྩཡཱཝ སངྑཱརཱ, ན ཝཏྟབྦཾ – ‘‘སངྑཱརཔཙྩཡཱཔི ཨཝིཛྫཱ’’ཏི། ཏཎྷཱཔཙྩཡཱཝ ཨུཔཱདཱནཾ, ན ཝཏྟབྦཾ – ‘‘ཨུཔཱདཱནཔཙྩཡཱཔི ཏཎྷཱ’’ཏི།
719. ‘‘Jarāmaraṇapaccayā , bhikkhave, jāti, jātipaccayā bhavo’’ti – attheva suttantoti ? Natthi. Tena hi avijjāpaccayāva saṅkhārā, na vattabbaṃ – ‘‘saṅkhārapaccayāpi avijjā’’ti. Taṇhāpaccayāva upādānaṃ, na vattabbaṃ – ‘‘upādānapaccayāpi taṇhā’’ti.
‘‘ཝིཉྙཱཎཔཙྩཡཱ, བྷིཀྑཝེ, ནཱམརཱུཔཾ, ནཱམརཱུཔཔཙྩཡཱཔི ཝིཉྙཱཎ’’ནྟི 1 – ཨཏྠེཝ སུཏྟནྟོཏི? ཨཱམནྟཱ། ཏེན ཧི ཨཝིཛྫཱཔཙྩཡཱཔི སངྑཱརཱ, སངྑཱརཔཙྩཡཱཔི ཨཝིཛྫཱ; ཏཎྷཱཔཙྩཡཱཔི ཨུཔཱདཱནཾ, ཨུཔཱདཱནཔཙྩཡཱཔི ཏཎྷཱཏི།
‘‘Viññāṇapaccayā, bhikkhave, nāmarūpaṃ, nāmarūpapaccayāpi viññāṇa’’nti 2 – attheva suttantoti? Āmantā. Tena hi avijjāpaccayāpi saṅkhārā, saṅkhārapaccayāpi avijjā; taṇhāpaccayāpi upādānaṃ, upādānapaccayāpi taṇhāti.
ཨཉྙམཉྙཔཙྩཡཀཐཱ ནིཊྛིཏཱ།
Aññamaññapaccayakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༢. ཨཉྙམཉྙཔཙྩཡཀཐཱཝཎྞནཱ • 2. Aññamaññapaccayakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༢. ཨཉྙམཉྙཔཙྩཡཀཐཱཝཎྞནཱ • 2. Aññamaññapaccayakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༢. ཨཉྙམཉྙཔཙྩཡཀཐཱཝཎྞནཱ • 2. Aññamaññapaccayakathāvaṇṇanā
