| Library / Tipiṭaka / ਤਿਪਿਟਕ • Tipiṭaka / ਕਙ੍ਖਾવਿਤਰਣੀ-ਪੁਰਾਣ-ਟੀਕਾ • Kaṅkhāvitaraṇī-purāṇa-ṭīkā |
੯. ਅਞ੍ਞਭਾਗਿਯਸਿਕ੍ਖਾਪਦવਣ੍ਣਨਾ
9. Aññabhāgiyasikkhāpadavaṇṇanā
ਅਞ੍ਞਭਾਗੋ વਾ ਅਸ੍ਸ ਅਤ੍ਥੀਤਿ ਯਥਾ ਸੁવਣ੍ਣਸ੍ਸੇਦਂ ਸੋવਣ੍ਣਮਿਤ੍ਯਤ੍ਰ ਸੁવਣ੍ਣવਾ ਅਨੇਨ ਸੁવਣ੍ਣੋ ਇਤ੍ਯੁਚ੍ਚਤੇ। ਤਂ ਪਟਿਮਾਯ ਸਰੀਰਂ, ਸਿਲਾਪੁਤ੍ਤਕਸ੍ਸ ਸਰੀਰਨ੍ਤਿ ਚ ਨਿਦਸ੍ਸਨਂ। ਛਗਲਕਸ੍ਸ ‘‘ਦਬ੍ਬੋ’’ਤਿ ਦਿਨ੍ਨਂ ਨਾਮਂ ‘‘ਦੇਸੋ’’ਤਿ વੁਚ੍ਚਤਿ। ਕਸ੍ਮਾ? ਥੇਰਂ ਅਨੁਦ੍ਧਂਸੇਤੁਂ ਥੇਰਸ੍ਸਾਪਿ ਅਪਦਿਸਿਤਬ੍ਬਤ੍ਤਾ। ਅਞ੍ਞਮ੍ਪਿ વਤ੍ਥੁਂ ਨ ਥੇਰਂਯੇવ। ਲਿਸ੍ਸਤਿ ਸਿਲਿਸ੍ਸਤਿ વੋਹਾਰਮਤ੍ਤੇਨੇવਨ ਅਤ੍ਥਤੋ। ਈਸਕਂ ਅਲ੍ਲੀਯਤੀਤਿ ਲੇਸੋਤਿ ਅਧਿਪ੍ਪਾਯੋ। ਲਿਸਸੇਲਛਕੋਲਅਲ੍ਲੀਭਾવੇ। ਤੇਨ વੁਤ੍ਤਂ ‘‘ਈਸਕਂ ਅਲ੍ਲੀਯਤੀਤਿ ਲੇਸੋ’’ਤਿ। ਯਸ੍ਮਾ ਦੇਸਲੇਸਾ ਅਤ੍ਥਤੋ ਨਿਨ੍ਨਾਨਾਕਰਣਂ, ਤਸ੍ਮਾ ‘‘ਕਿਞ੍ਚਿਦੇਸਂ ਲੇਸਮਤ੍ਤਂ ਉਪਾਦਾਯਾ’’ਤਿ ਪਦਂ ਉਦ੍ਧਰਿਤ੍વਾ ‘‘ਦਸ ਲੇਸਾ ਜਾਤਿਲੇਸੋ’’ਤਿਆਦਿ (ਪਾਰਾ॰ ੩੯੪) ਪਦਭਾਜਨੇ વੁਤ੍ਤਂ।
Aññabhāgovā assa atthīti yathā suvaṇṇassedaṃ sovaṇṇamityatra suvaṇṇavā anena suvaṇṇo ityuccate. Taṃ paṭimāya sarīraṃ, silāputtakassa sarīranti ca nidassanaṃ. Chagalakassa ‘‘dabbo’’ti dinnaṃ nāmaṃ ‘‘deso’’ti vuccati. Kasmā? Theraṃ anuddhaṃsetuṃ therassāpi apadisitabbattā. Aññampi vatthuṃ na theraṃyeva. Lissati silissati vohāramattenevana atthato. Īsakaṃ allīyatīti lesoti adhippāyo. Lisaselachakolaallībhāve. Tena vuttaṃ ‘‘īsakaṃ allīyatīti leso’’ti. Yasmā desalesā atthato ninnānākaraṇaṃ, tasmā ‘‘kiñcidesaṃ lesamattaṃ upādāyā’’ti padaṃ uddharitvā ‘‘dasa lesā jātileso’’tiādi (pārā. 394) padabhājane vuttaṃ.
ਅਟ੍ਠੁਪ੍ਪਤ੍ਤਿવਸੇਨੇવ ਆવਿਭੂਤਨ੍ਤਿ ਏਤ੍ਥ ਕਿਞ੍ਚ ਭਿਯ੍ਯੋ ਅਨਿਯਮਤ੍ਤਾ। ਨ ਹਿ ਮੇਤ੍ਤਿਯਭੂਮਜਕਾਨਂ વਿਯ ਅਞ੍ਞੇਸਂ ਸਬ੍ਬੇਸਮ੍ਪਿ ‘‘ਛਗਲਕਮੇવੇਤ੍ਥ ਅਞ੍ਞਭਾਗਿਯਂ ਅਧਿਕਰਣਂ ਹੋਤਿ, ਅਞ੍ਞਂ ਗੋਮਹਿਂਸਾਦਿਕਮ੍ਪਿ ਹੋਤਿ, ਨ ਚ ਮੇਤ੍ਤਿਯਭੂਮਜਕਾ વਿਯ ਸਬ੍ਬੇਪਿ ਨਾਮਲੇਸਮਤ੍ਤਮੇવ ਉਪਾਦਿਯਨ੍ਤਿ, ਅਞ੍ਞਮ੍ਪਿ ਜਾਤਿਲੇਸਾਦਿਂ ਉਪਾਦਿਯਨ੍ਤਿ, ਤਸ੍ਮਾ ਅਨਿਯਮਤ੍ਤਾ ਨ વਿਭਤ੍ਤਂ। ਕਿਞ੍ਚ ਭਿਯ੍ਯੋ ਤਥਾવੁਤ੍ਤੇ ਛਗਲਕਸ੍ਸੇવ ਅਞ੍ਞਭਾਗਿਯਤਾ ਸਮ੍ਭવਤਿ, ਨ ਅਞ੍ਞਸ੍ਸ, ਯੇਨ ਸੋવ ਦਸ੍ਸਿਤੋ। ਲੇਸੋ ਚ ਨਾਮ ਲੇਸੋવ, ਨ ਜਾਤਿਆਦਿ, ਯੇਨ ਸੋવ ਦਸ੍ਸਿਤੋਤਿ ਏવਂ ਮਿਚ੍ਛਾਗਾਹਪ੍ਪਸਙ੍ਗਤੋਤਿ વੇਦਿਤਬ੍ਬਂ। ਇਧ ਚ…ਪੇ॰… ਸਞ੍ਞਿਨੋਪੀਤਿ ਇਮਸ੍ਮਿਂ ਸਿਕ੍ਖਾਪਦੇ ਚ ਅਮੂਲਕਸਿਕ੍ਖਾਪਦੇ ਚਾਤਿ ਅਤ੍ਥੋ।
Aṭṭhuppattivaseneva āvibhūtanti ettha kiñca bhiyyo aniyamattā. Na hi mettiyabhūmajakānaṃ viya aññesaṃ sabbesampi ‘‘chagalakamevettha aññabhāgiyaṃ adhikaraṇaṃ hoti, aññaṃ gomahiṃsādikampi hoti, na ca mettiyabhūmajakā viya sabbepi nāmalesamattameva upādiyanti, aññampi jātilesādiṃ upādiyanti, tasmā aniyamattā na vibhattaṃ. Kiñca bhiyyo tathāvutte chagalakasseva aññabhāgiyatā sambhavati, na aññassa, yena sova dassito. Leso ca nāma lesova, na jātiādi, yena sova dassitoti evaṃ micchāgāhappasaṅgatoti veditabbaṃ. Idha ca…pe… saññinopīti imasmiṃ sikkhāpade ca amūlakasikkhāpade cāti attho.
ਅਞ੍ਞਭਾਗਿਯਸਿਕ੍ਖਂ ਯੋ, ਨੇવ ਸਿਕ੍ਖਤਿ ਯੁਤ੍ਤਿਤੋ।
Aññabhāgiyasikkhaṃ yo, neva sikkhati yuttito;
ਗਚ੍ਛੇ વਿਨਯવਿਞ੍ਞੂਹਿ, ਅਞ੍ਞਭਾਗਿਯਤਂવ ਸੋ॥ (વਜਿਰ॰ ਟੀ॰ ਪਾਰਾਜਿਕ ੪੦੮)।
Gacche vinayaviññūhi, aññabhāgiyataṃva so. (vajira. ṭī. pārājika 408);
ਅਞ੍ਞਭਾਗਿਯਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Aññabhāgiyasikkhāpadavaṇṇanā niṭṭhitā.
