| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
24. அஞ்ஜனீனித்³தே³ஸவண்ணனா
24. Añjanīniddesavaṇṇanā
182. வட்டா வா அட்ட²ஸோளஸங்ஸா வா மட்டா² புப்ப²லதாதீ³ஹி அசித்தகா அஞ்ஜனீ வட்டதீதி அத்தோ². திஸ்ஸோபி வட்டந்தி, ஏகாய வா த்³வீஸு வா கதா² ஏவ நத்தீ²தி அதி⁴ப்பாயோ. லேகா²தி வட்டலேகா². ப³ந்தி⁴துந்தி பிதா⁴னகப³ந்த⁴னத்த²ங்.
182. Vaṭṭā vā aṭṭhasoḷasaṃsā vā maṭṭhā pupphalatādīhi acittakā añjanī vaṭṭatīti attho. Tissopi vaṭṭanti, ekāya vā dvīsu vā kathā eva natthīti adhippāyo. Lekhāti vaṭṭalekhā. Bandhitunti pidhānakabandhanatthaṃ.
183. ரூபந்தி ஸகுணரூபாதி³. யதி³ ச ஏதி³ஸங் அஞ்ஞேஹி கதங் லப⁴தி, க⁴ங்ஸித்வா வா சி²ந்தி³த்வா வா யதா² வா ந பஞ்ஞாயதி, ததா² ஸுத்தேன வேடெ²த்வா வளஞ்ஜேதப்³ப³ங்.
183.Rūpanti sakuṇarūpādi. Yadi ca edisaṃ aññehi kataṃ labhati, ghaṃsitvā vā chinditvā vā yathā vā na paññāyati, tathā suttena veṭhetvā vaḷañjetabbaṃ.
184. த²விகாதி அஞ்ஜனித²விகா. அஞ்ஜனிஸலாகாபி லப்³ப⁴தீதி ஸம்ப³ந்தோ⁴.
184.Thavikāti añjanithavikā. Añjanisalākāpi labbhatīti sambandho.
185-6. அட்டீ²தி (மஹாவ॰ 266; மஹாவ॰ அட்ட²॰ 264) மனுஸ்ஸட்டி²ங் ட²பெத்வா அவஸேஸட்டி². விஸாணத³ந்தேஸு அகப்பியங் நாம நத்தி². ஆமலககக்காதீ³ஹி கதா ப²லமயா. தம்மயாதி இத⁴ வுத்தேஹேவ நிப்³ப³த்தா. அஞ்ஜனீவினிச்ச²யோ.
185-6.Aṭṭhīti (mahāva. 266; mahāva. aṭṭha. 264) manussaṭṭhiṃ ṭhapetvā avasesaṭṭhi. Visāṇadantesu akappiyaṃ nāma natthi. Āmalakakakkādīhi katā phalamayā. Tammayāti idha vutteheva nibbattā. Añjanīvinicchayo.
அஞ்ஜனீனித்³தே³ஸவண்ணனா நிட்டி²தா.
Añjanīniddesavaṇṇanā niṭṭhitā.
