| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. အာဏိသုတ္တဝဏ္ဏနာ
7. Āṇisuttavaṇṇanā
၂၂၉. အညေ ရာဇာနော စ ဘာဂံ ဂဏ္ဟန္တာ ဣမေ ဝိယ ဒသဘာဂံ ဂဏ္ဟန္တီတိ တေသမယံ အနုဂတိ ပညာယတိ။ မဟာဇနသ္သ အာနယနတော အာနကောတိ အာဟ ‘‘ဧဝံလဒ္ဓနာမော’’တိ။ ဣဒာနိ တံ အာဒိတော ပဋ္ဌာယ အာဂမနာနုက္ကမံ ဒသ္သေတုံ ‘‘ဟိမဝန္တေ ကိရာ’’တိအာဒိမာဟ။ ကရေဏုန္တိ ကရေဏုကံ, ဟတ္ထိနိန္တိ အတ္ထော။ သက္ကရိံသူတိ အနတ္ထပရိဟရဏဝသေန ပသတ္ထူပဟာရဝသေန စ ပူဇေသုံ။ ဩတရီတိ ကုဠီရဒဟံ ပာဝိသိ။ ပဋိက္ကမိတ္ဝာ ဌပနဝသေန အပက္ကမိတ္ဝာ ပတိ။
229. Aññe rājāno ca bhāgaṃ gaṇhantā ime viya dasabhāgaṃ gaṇhantīti tesamayaṃ anugati paññāyati. Mahājanassa ānayanato ānakoti āha ‘‘evaṃladdhanāmo’’ti. Idāni taṃ ādito paṭṭhāya āgamanānukkamaṃ dassetuṃ ‘‘himavante kirā’’tiādimāha. Kareṇunti kareṇukaṃ, hatthininti attho. Sakkariṃsūti anatthapariharaṇavasena pasatthūpahāravasena ca pūjesuṃ. Otarīti kuḷīradahaṃ pāvisi. Paṭikkamitvā ṭhapanavasena apakkamitvā pati.
သုဝဏ္ဏရဇတာဒိမယန္တိ ကိသ္မိဉ္စိ ဆိဒ္ဒေ သုဝဏ္ဏမယံ, ကိသ္မိဉ္စိ ရဇတမယံ, ကိသ္မိဉ္စိ ဖလိကမယံ အာဏိံ ဃဋယိံသု ဗန္ဓိံသု။ ပုဗ္ဗေ ဖရိတ္ဝာ တိဋ္ဌန္တသ္သ ဒ္ဝာဒသ ယောဇနာနိ ပမာဏော ဧတသ္သာတိ ဒ္ဝာဒသယောဇနပ္ပမာဏော, သဒ္ဒော။ အထသ္သ အနေကသတကာလေ ဂစ္ဆန္တေ အန္တောသာလာယမ္ပိ ဒုက္ခေန သုယ္ယိတ္ထ အာဏိသင္ဃာဋမတ္တတ္တာ။
Suvaṇṇarajatādimayanti kismiñci chidde suvaṇṇamayaṃ, kismiñci rajatamayaṃ, kismiñci phalikamayaṃ āṇiṃ ghaṭayiṃsu bandhiṃsu. Pubbe pharitvā tiṭṭhantassa dvādasa yojanāni pamāṇo etassāti dvādasayojanappamāṇo, saddo. Athassa anekasatakāle gacchante antosālāyampi dukkhena suyyittha āṇisaṅghāṭamattattā.
ဂမ္ဘီရာတိ အဂာဓာ ဒုက္ခောဂာဠ္ဟာ။ သလ္လသုတ္တဉ္ဟိ ‘‘အနိမိတ္တမနညာတ’’န္တိအာဒိနာ ပာဠိဝသေန ဂမ္ဘီရံ, န အတ္ထဂမ္ဘီရံ။ တထာ ဟိ တတ္ထ တာ တာ ဂာထာ ဒုဝိညေယ္ယရူပာ တိဋ္ဌန္တိ, ဒုဝိညေယ္ယံ ဉာဏေန ဒုက္ခောဂာဟန္တိ ကတ္ဝာ ‘‘ဂမ္ဘီရ’’န္တိ ဝုစ္စတိ။ ပုဗ္ဗာပရမ္ပေတ္ထ ကာသဉ္စိ ဂာထာနံ ဒုဝိညေယ္ယတာယ ဒုက္ခောဂာဟမေဝ, တသ္မာ တံ ပာဠိဝသေန ‘‘ဂမ္ဘီရ’’န္တိ ဝုတ္တံ ‘‘ပာဠိဝသေန ဂမ္ဘီရာ သလ္လသုတ္တသဒိသာ’’တိ။ ဣမိနာ နယေန ‘‘အတ္ထဝသေန ဂမ္ဘီရာ’’တိ ဧတ္ထ အတ္ထော ဝေဒိတဗ္ဗော။ မဟာဝေဒလ္လသုတ္တသ္သ အတ္ထဝသေန ဂမ္ဘီရတာ ပာကဋာယေဝ။ လောကံ ဥတ္တရတီတိ လောကုတ္တရော, နဝဝိဓအပ္ပမာဏဓမ္မော, သော အတ္ထဘူတော ဧတေသံ အတ္ထီတိ လောကုတ္တရာ။ တေနာဟ ‘‘လောကုတ္တရအတ္ထဒီပကာ’’တိ။ သတ္တသုညတဓမ္မမတ္တမေဝာတိ သတ္တေန အတ္တနာ သုညတံ ကေဝလံ ဓမ္မမတ္တမေဝ။ ဥဂ္ဂဟေတဗ္ဗံ ပရိယာပုဏိတဗ္ဗန္တိ စ လိင္ဂဝစနဝိပလ္လာသေန ဝုတ္တန္တိ အာဟ ‘‘ဥဂ္ဂဟေတဗ္ဗေ စ ပရိယာပုဏိတဗ္ဗေ စာ’’တိ။ ကဝိတာတိ ကဝိနော ကမ္မံ ကဝိကတာ။ ယသ္သ ပန ယံ ကမ္မံ, တံ တေန ကတန္တိ ဝုစ္စတီတိ အာဟ ‘‘ကဝိတာတိ ကဝီဟိ ကတာ’’တိ။ ဣတရံ ‘‘ကာဝေယ္ယာ’’တိ ပဒံ, ကဗ္ဗန္တိ ဝုတ္တံ ဟောတိ။ ‘‘ကဗ္ဗ’’န္တိ စ ကဝိနာ ဝုတ္တန္တိ အတ္ထော။ တေနာဟ ‘‘တသ္သေဝ ဝေဝစန’’န္တိ။ စိတ္တက္ခရာတိ ဝိစိတ္ရာကာရအက္ခရာ။ သာသနတော ဗဟိဘူတာတိ န သာသနာဝစရာ။ တေသံ သာဝကေဟီတိ ‘‘ဗုဒ္ဓာနံ သာဝကာ’’တိ အပညာတာနံ ယေသံ ကေသဉ္စိ သာဝကေဟိ။ အနုဂ္ဂယ္ဟမာနာတိ န ဥဂ္ဂယ္ဟမာနာ သဝနဓာရဏပရိစယအတ္ထူပပရိက္ခာဒိဝသေန အနုဂ္ဂယ္ဟမာနာ။ အန္တရဓာယန္တိ အဒသ္သနံ ဂစ္ဆန္တိ။
Gambhīrāti agādhā dukkhogāḷhā. Sallasuttañhi ‘‘animittamanaññāta’’ntiādinā pāḷivasena gambhīraṃ, na atthagambhīraṃ. Tathā hi tattha tā tā gāthā duviññeyyarūpā tiṭṭhanti, duviññeyyaṃ ñāṇena dukkhogāhanti katvā ‘‘gambhīra’’nti vuccati. Pubbāparampettha kāsañci gāthānaṃ duviññeyyatāya dukkhogāhameva, tasmā taṃ pāḷivasena ‘‘gambhīra’’nti vuttaṃ ‘‘pāḷivasena gambhīrā sallasuttasadisā’’ti. Iminā nayena ‘‘atthavasena gambhīrā’’ti ettha attho veditabbo. Mahāvedallasuttassa atthavasena gambhīratā pākaṭāyeva. Lokaṃ uttaratīti lokuttaro, navavidhaappamāṇadhammo, so atthabhūto etesaṃ atthīti lokuttarā. Tenāha ‘‘lokuttaraatthadīpakā’’ti. Sattasuññatadhammamattamevāti sattena attanā suññataṃ kevalaṃ dhammamattameva. Uggahetabbaṃ pariyāpuṇitabbanti ca liṅgavacanavipallāsena vuttanti āha ‘‘uggahetabbe ca pariyāpuṇitabbe cā’’ti. Kavitāti kavino kammaṃ kavikatā. Yassa pana yaṃ kammaṃ, taṃ tena katanti vuccatīti āha ‘‘kavitāti kavīhi katā’’ti. Itaraṃ ‘‘kāveyyā’’ti padaṃ, kabbanti vuttaṃ hoti. ‘‘Kabba’’nti ca kavinā vuttanti attho. Tenāha ‘‘tasseva vevacana’’nti. Cittakkharāti vicitrākāraakkharā. Sāsanato bahibhūtāti na sāsanāvacarā. Tesaṃ sāvakehīti ‘‘buddhānaṃ sāvakā’’ti apaññātānaṃ yesaṃ kesañci sāvakehi. Anuggayhamānāti na uggayhamānā savanadhāraṇaparicayaatthūpaparikkhādivasena anuggayhamānā. Antaradhāyanti adassanaṃ gacchanti.
အာဏိသုတ္တဝဏ္ဏနာ နိဋ္ဌိတာ။
Āṇisuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. အာဏိသုတ္တံ • 7. Āṇisuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. အာဏိသုတ္တဝဏ္ဏနာ • 7. Āṇisuttavaṇṇanā
