| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. အနိစ္စသညာသုတ္တဝဏ္ဏနာ
10. Aniccasaññāsuttavaṇṇanā
၁၀၂. ဘာဝေန္တသ္သာတိ ဝိပသ္သနာယ မဂ္ဂံ ဘာဝေန္တသ္သ ဥပ္ပန္နသညာ။ တေနာဟ – ‘‘သဗ္ဗံ ကာမရာဂံ ပရိယာဒိယတီ’’တိအာဒိ။ သန္တာနေတ္ဝာတိ ကသနဋ္ဌာနံ သဗ္ဗသော ဝိတနေတ္ဝာ ပတ္ထရိတ္ဝာ။ ကိလေသာတိ ဥပက္ကိလေသပ္ပဘေဒာ ကိလေသာ။ အနိစ္စသညာဉာဏေနာတိ အနိစ္စသညာသဟဂတေန ဉာဏေန။
102.Bhāventassāti vipassanāya maggaṃ bhāventassa uppannasaññā. Tenāha – ‘‘sabbaṃ kāmarāgaṃ pariyādiyatī’’tiādi. Santānetvāti kasanaṭṭhānaṃ sabbaso vitanetvā pattharitvā. Kilesāti upakkilesappabhedā kilesā. Aniccasaññāñāṇenāti aniccasaññāsahagatena ñāṇena.
လာယနန္တိ လာယနံ ဝိယ နယနံ ဝိယ နိစ္ဆောဋနံ ဝိယ စ အနိစ္စသညာဉာဏံ။ ဣမိနာ အတ္ထေနာတိ ဣမိနာ ယထာဝုတ္တေန ပာဠိယာ အတ္ထေန, ဥပမာ သံသန္ဒေတဗ္ဗာတိ ဧတ္ထ ပဗ္ဗဇလာယကော ဝိယ ယောဂာဝစရော။ လာယနာဒိနာ တသ္သ တတ္ထ ကတကိစ္စတာယ ပရိတုဋ္ဌိ ဝိယ ဣမသ္သ ကိလေသေ သဗ္ဗသော ဆိန္ဒိတ္ဝာ ဖလသမာပတ္တိသုခေန ကာလသ္သ ဝီတိနာမနာ။
Lāyananti lāyanaṃ viya nayanaṃ viya nicchoṭanaṃ viya ca aniccasaññāñāṇaṃ. Iminā atthenāti iminā yathāvuttena pāḷiyā atthena, upamā saṃsandetabbāti ettha pabbajalāyako viya yogāvacaro. Lāyanādinā tassa tattha katakiccatāya parituṭṭhi viya imassa kilese sabbaso chinditvā phalasamāpattisukhena kālassa vītināmanā.
ကူဋံ ဂစ္ဆန္တီတိ ပာရိမန္တေန ကူဋံ ဂစ္ဆန္တိ။ ကူဋံ ပဝိသနဘာဝေနာတိ ကူဋစ္ဆိဒ္ဒံ အဂ္ဂေန ပဝိသနဝသေန။ သမောသရိတ္ဝာတိ ဆိဒ္ဒေ အနုပဝိသနဝသေန စ အာဟစ္စ အဝဋ္ဌာနေန စ သမောသရိတ္ဝာ ဌိတာ။ ကူဋံ ဝိယ အနိစ္စသညာ အနိစ္စာနုပသ္သနာဝသေန အဝဋ္ဌာနသ္သ မူလဘာဝတော။ ဂောပာနသိယော ဝိယ စတုဘူမကကုသလာ ဓမ္မာ အနိစ္စသညာမူလကတ္တာ။ ကူဋံ အဂ္ဂံ သဗ္ဗဂောပာနသီနံ တထာအဓိဋ္ဌာနသ္သ ပဓာနကာရဏတ္တာ။ အနိစ္စသညာ အဂ္ဂာတိ ဧတ္ထာပိ ဧသေဝ နယော။ အနိစ္စသညာ လောကိယာတိ ဣဒံ အနိစ္စသညာနုပသ္သနံ သန္ဓာယ ဝုတ္တံ။ အနိစ္စာနုပသ္သနာမုခေန အဓိဂတအရိယမဂ္ဂေ ဥပ္ပန္နသညာ အနိစ္စသညာတိ ဝတ္တဗ္ဗတံ လဘတီတိ ‘‘အနိစ္စသညာ, ဘိက္ခဝေ, ဘာဝိတာ ဗဟုလီကတာ သဗ္ဗံ ကာမရာဂံ ပရိယာဒိယတီ’’တိအာဒိ ဝုတ္တံ။ တထာ ဟိ ဓမ္မသင္ဂဟေ (ဓ. သ. ၃၅၇, ၃၆၀) ‘‘ယသ္မိံ သမယေ လောကုတ္တရံ သညံ ဘာဝေတီ’’တိအာဒိနာ သညာပိ ဥဒ္ဓဋာ။ သဗ္ဗာသု ဥပမာသူတိ မူလသန္တာနဥပမာဒီသု ပဉ္စသု ဥပမာသု။ ပုရိမာဟီတိ ကသ္သကပဗ္ဗဇလာယနအမ္ဗပိဏ္ဍိဥပမာဟိ အနိစ္စသညာယ ကိစ္စံ ဝုတ္တံ မူလသန္တာနကပဒာလနပဗ္ဗဇလာယနဝဏ္ဋစ္ဆေဒနပဒေသေန အနိစ္စသညာယ ပဋိပက္ခပစ္ဆေဒနသ္သ ဒသ္သိတတ္တာ။ ပစ္ဆိမာဟိ ဗလံ ဒသ္သိတံ ပဋိပက္ခာတိဘာဝသ္သ ဇောတိတတ္တာ။
Kūṭaṃ gacchantīti pārimantena kūṭaṃ gacchanti. Kūṭaṃ pavisanabhāvenāti kūṭacchiddaṃ aggena pavisanavasena. Samosaritvāti chidde anupavisanavasena ca āhacca avaṭṭhānena ca samosaritvā ṭhitā. Kūṭaṃ viya aniccasaññā aniccānupassanāvasena avaṭṭhānassa mūlabhāvato. Gopānasiyo viya catubhūmakakusalā dhammā aniccasaññāmūlakattā. Kūṭaṃ aggaṃ sabbagopānasīnaṃ tathāadhiṭṭhānassa padhānakāraṇattā. Aniccasaññā aggāti etthāpi eseva nayo. Aniccasaññā lokiyāti idaṃ aniccasaññānupassanaṃ sandhāya vuttaṃ. Aniccānupassanāmukhena adhigataariyamagge uppannasaññā aniccasaññāti vattabbataṃ labhatīti ‘‘aniccasaññā, bhikkhave, bhāvitā bahulīkatā sabbaṃ kāmarāgaṃ pariyādiyatī’’tiādi vuttaṃ. Tathā hi dhammasaṅgahe (dha. sa. 357, 360) ‘‘yasmiṃ samaye lokuttaraṃ saññaṃ bhāvetī’’tiādinā saññāpi uddhaṭā. Sabbāsu upamāsūti mūlasantānaupamādīsu pañcasu upamāsu. Purimāhīti kassakapabbajalāyanaambapiṇḍiupamāhi aniccasaññāya kiccaṃ vuttaṃ mūlasantānakapadālanapabbajalāyanavaṇṭacchedanapadesena aniccasaññāya paṭipakkhapacchedanassa dassitattā. Pacchimāhi balaṃ dassitaṃ paṭipakkhātibhāvassa jotitattā.
အနိစ္စသညာသုတ္တဝဏ္ဏနာ နိဋ္ဌိတာ။
Aniccasaññāsuttavaṇṇanā niṭṭhitā.
ပုပ္ဖဝဂ္ဂဝဏ္ဏနာ နိဋ္ဌိတာ။
Pupphavaggavaṇṇanā niṭṭhitā.
မဇ္ဈိမပဏ္ဏာသကော သမတ္တော။
Majjhimapaṇṇāsako samatto.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. အနိစ္စသညာသုတ္တံ • 10. Aniccasaññāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. အနိစ္စသညာသုတ္တဝဏ္ဏနာ • 10. Aniccasaññāsuttavaṇṇanā
