| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
൨. അങ്ഗുലിപതോദകസിക്ഖാപദവണ്ണനാ
2. Aṅgulipatodakasikkhāpadavaṇṇanā
ഹസാധിപ്പായസ്സാതി ഖിഡ്ഡാധിപ്പായസ്സ, ഇമിനാ കായസംസഗ്ഗാധിപ്പായം പടിക്ഖിപതി.
Hasādhippāyassāti khiḍḍādhippāyassa, iminā kāyasaṃsaggādhippāyaṃ paṭikkhipati.
ഏത്ഥ ച ഭിക്ഖുനിമ്പി ഹസാധിപ്പായേന ഫുസതോ ഭിക്ഖുസ്സ ദുക്കടം. തഥാ ഭിക്ഖുമ്പി ഫുസന്തിയാ ഭിക്ഖുനിയാതി ആഹ ‘‘ഇധ പന ഭിക്ഖുനീപി ഭിക്ഖുസ്സ, ഭിക്ഖു ച ഭിക്ഖുനിയാ അനുപസമ്പന്നോ ഏവാ’’തി. കായപ്പടിബദ്ധാദീസു സബ്ബത്ഥാതി ‘‘കായേന കായപ്പടിബദ്ധേ, കായപ്പടിബദ്ധേന കായേ, കായപ്പടിബദ്ധേന കായപ്പടിബദ്ധേ, നിസ്സഗ്ഗിയേന കായേ, നിസ്സഗ്ഗിയേന കായപ്പടിബദ്ധേ, നിസ്സഗ്ഗിയേന നിസ്സഗ്ഗിയേ’’തി (പാചി॰ ൩൩൨) സബ്ബത്ഥ. സതി കരണീയേ ആമസതോതി സതി കരണീയേ പുരിസം ആമസതോ അനാപത്തി. ഇത്ഥീ പന സതി കരണീയേപി ആമസിതും ന വട്ടതി.
Ettha ca bhikkhunimpi hasādhippāyena phusato bhikkhussa dukkaṭaṃ. Tathā bhikkhumpi phusantiyā bhikkhuniyāti āha ‘‘idha pana bhikkhunīpi bhikkhussa, bhikkhu ca bhikkhuniyā anupasampanno evā’’ti. Kāyappaṭibaddhādīsu sabbatthāti ‘‘kāyena kāyappaṭibaddhe, kāyappaṭibaddhena kāye, kāyappaṭibaddhena kāyappaṭibaddhe, nissaggiyena kāye, nissaggiyena kāyappaṭibaddhe, nissaggiyena nissaggiye’’ti (pāci. 332) sabbattha. Sati karaṇīye āmasatoti sati karaṇīye purisaṃ āmasato anāpatti. Itthī pana sati karaṇīyepi āmasituṃ na vaṭṭati.
അങ്ഗുലിപതോദകസിക്ഖാപദവണ്ണനാ നിട്ഠിതാ.
Aṅgulipatodakasikkhāpadavaṇṇanā niṭṭhitā.
