| Library / Tipiṭaka / តិបិដក • Tipiṭaka / វិមានវត្ថុបាឡិ • Vimānavatthupāḷi |
៨. អនេកវណ្ណវិមានវត្ថុ
8. Anekavaṇṇavimānavatthu
១១៩៩.
1199.
‘‘អនេកវណ្ណំ ទរសោកនាសនំ, វិមានមារុយ្ហ អនេកចិត្តំ;
‘‘Anekavaṇṇaṃ darasokanāsanaṃ, vimānamāruyha anekacittaṃ;
បរិវារិតោ អច្ឆរាសង្គណេន, សុនិម្មិតោ ភូតបតីវ មោទសិ។
Parivārito accharāsaṅgaṇena, sunimmito bhūtapatīva modasi.
១២០០.
1200.
‘‘សមស្សមោ នត្ថិ កុតោ បនុត្តរោ 1, យសេន បុញ្ញេន ច ឥទ្ធិយា ច;
‘‘Samassamo natthi kuto panuttaro 2, yasena puññena ca iddhiyā ca;
សព្ពេ ច ទេវា តិទសគណា សមេច្ច, តំ តំ នមស្សន្តិ សសិំវ ទេវា;
Sabbe ca devā tidasagaṇā samecca, taṃ taṃ namassanti sasiṃva devā;
ឥមា ច តេ អច្ឆរាយោ សមន្តតោ, នច្ចន្តិ គាយន្តិ បមោទយន្តិ។
Imā ca te accharāyo samantato, naccanti gāyanti pamodayanti.
១២០១.
1201.
‘‘ទេវិទ្ធិបត្តោសិ មហានុភាវោ, មនុស្សភូតោ កិមកាសិ បុញ្ញំ;
‘‘Deviddhipattosi mahānubhāvo, manussabhūto kimakāsi puññaṃ;
កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ។
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
១២០២.
1202.
សោ ទេវបុត្តោ អត្តមនោ…បេ.… យស្ស កម្មស្សិទំ ផលំ។
So devaputto attamano…pe… yassa kammassidaṃ phalaṃ.
១២០៣.
1203.
‘‘អហំ ភទន្តេ អហុវាសិ បុព្ពេ, សុមេធនាមស្ស ជិនស្ស សាវកោ;
‘‘Ahaṃ bhadante ahuvāsi pubbe, sumedhanāmassa jinassa sāvako;
១២០៤.
1204.
‘‘សោហំ សុមេធស្ស ជិនស្ស សត្ថុនោ, បរិនិព្ពុតស្សោឃតិណ្ណស្ស តាទិនោ;
‘‘Sohaṃ sumedhassa jinassa satthuno, parinibbutassoghatiṇṇassa tādino;
រតនុច្ចយំ ហេមជាលេន ឆន្នំ, វន្ទិត្វា ថូបស្មិំ មនំ បសាទយិំ។
Ratanuccayaṃ hemajālena channaṃ, vanditvā thūpasmiṃ manaṃ pasādayiṃ.
១២០៥.
1205.
‘‘ន មាសិ ទានំ ន ច មត្ថិ ទាតុំ, បរេ ច ខោ តត្ថ សមាទបេសិំ;
‘‘Na māsi dānaṃ na ca matthi dātuṃ, pare ca kho tattha samādapesiṃ;
បូជេថ នំ បូជនីយស្ស 7 ធាតុំ, ឯវំ កិរ សគ្គមិតោ គមិស្សថ។
Pūjetha naṃ pūjanīyassa 8 dhātuṃ, evaṃ kira saggamito gamissatha.
១២០៦.
1206.
‘‘តទេវ កម្មំ កុសលំ កតំ មយា, សុខញ្ច ទិព្ពំ អនុភោមិ អត្តនា;
‘‘Tadeva kammaṃ kusalaṃ kataṃ mayā, sukhañca dibbaṃ anubhomi attanā;
មោទាមហំ តិទសគណស្ស មជ្ឈេ, ន តស្ស បុញ្ញស្ស ខយម្បិ អជ្ឈគ’’ន្តិ។
Modāmahaṃ tidasagaṇassa majjhe, na tassa puññassa khayampi ajjhaga’’nti.
អនេកវណ្ណវិមានំ អដ្ឋមំ។
Anekavaṇṇavimānaṃ aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / វិមានវត្ថុ-អដ្ឋកថា • Vimānavatthu-aṭṭhakathā / ៨. អនេកវណ្ណវិមានវណ្ណនា • 8. Anekavaṇṇavimānavaṇṇanā
