| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๙. อนฺธสุตฺตวณฺณนา
9. Andhasuttavaṇṇanā
๒๙. นวเม อโนฺธติอาทีสุ ปาฬิปเทสุ ปฐโม ทิฎฺฐธมฺมิกโภคสํหรณปญฺญาจกฺขุโน จ สมฺปรายิกตฺถสาธนปญฺญาจกฺขุโน จ อภาวา ‘‘อโนฺธ’’ติ วุจฺจติ ทุติโยปิ, ตติโย ปน ทฺวินฺนมฺปิ ภาวา ‘‘ทฺวิจกฺขู’’ติ วุจฺจติฯ ปญฺญาจกฺขูติ อายโกสลฺลภูตา ปญฺญาจกฺขุฯ เตนาห ‘‘ผาติํ กเรยฺยา’’ติฯ อธมุตฺตเมติ อธเม เจว อุตฺตเม จฯ ปฎิปกฺขวเสนาติ ปฎิปกฺขสฺส อตฺถิตาวเสนฯ สุกฺกสปฺปฎิภาคาติ สุกฺกธเมฺมหิ ปหายเกหิ สปฺปฎิภาคาติ ชาเนยฺยฯ กณฺหสปฺปฎิภาคาติ กณฺหธเมฺมหิ ปหาตเพฺพหิ สปฺปฎิภาคาติ ชาเนยฺยฯ
29. Navame andhotiādīsu pāḷipadesu paṭhamo diṭṭhadhammikabhogasaṃharaṇapaññācakkhuno ca samparāyikatthasādhanapaññācakkhuno ca abhāvā ‘‘andho’’ti vuccati dutiyopi, tatiyo pana dvinnampi bhāvā ‘‘dvicakkhū’’ti vuccati. Paññācakkhūti āyakosallabhūtā paññācakkhu. Tenāha ‘‘phātiṃ kareyyā’’ti. Adhamuttameti adhame ceva uttame ca. Paṭipakkhavasenāti paṭipakkhassa atthitāvasena. Sukkasappaṭibhāgāti sukkadhammehi pahāyakehi sappaṭibhāgāti jāneyya. Kaṇhasappaṭibhāgāti kaṇhadhammehi pahātabbehi sappaṭibhāgāti jāneyya.
ตถาชาติกาติ ยาทิเสหิ สปุตฺตทารปริชนสญาติมิตฺตพนฺธวคฺคํ อตฺตานํ สุเขติ ปีเณติ, ตาทิสา โภคาปิ น สนฺติฯ ปุญฺญานิ จ น กโรตีติ สมณพฺราหฺมณกปณทฺธิกยาจกานํ สนฺตปฺปนวเสน ปุญฺญานิ น กโรติฯ อุภยตฺถาติ อุภยสฺมิํ โลเก, อุภยสฺมิํ วา อเตฺถติ วิคฺคโหติ ทเสฺสโนฺต ‘‘อิธโลเก’’ติอาทิมาหฯ อุภเยนาติ วุตฺตมตฺถํ โยเชตฺวา ทเสฺสตุํ ‘‘กถ’’นฺติอาทิ วุตฺตํฯ ยสฺมิํ ฐาเนติ ยสฺมิํเยว ฐาเนฯ น โสจตีติ โสกเหตูนํ ตตฺถ อภาวโต น โสจติฯ
Tathājātikāti yādisehi saputtadāraparijanasañātimittabandhavaggaṃ attānaṃ sukheti pīṇeti, tādisā bhogāpi na santi. Puññāni ca na karotīti samaṇabrāhmaṇakapaṇaddhikayācakānaṃ santappanavasena puññāni na karoti. Ubhayatthāti ubhayasmiṃ loke, ubhayasmiṃ vā attheti viggahoti dassento ‘‘idhaloke’’tiādimāha. Ubhayenāti vuttamatthaṃ yojetvā dassetuṃ ‘‘katha’’ntiādi vuttaṃ. Yasmiṃ ṭhāneti yasmiṃyeva ṭhāne. Na socatīti sokahetūnaṃ tattha abhāvato na socati.
อนฺธสุตฺตวณฺณนา นิฎฺฐิตาฯ
Andhasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๙. อนฺธสุตฺตํ • 9. Andhasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๙. อนฺธสุตฺตวณฺณนา • 9. Andhasuttavaṇṇanā
