| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
8. அனவஸேஸஸிக்கா²பத³பஞ்ஹோ
8. Anavasesasikkhāpadapañho
8. ‘‘ப⁴ந்தே நாக³ஸேன, யே தே அஹேஸுங் திகிச்ச²கானங் புப்³ப³கா ஆசரியா ஸெய்யதி²த³ங், நாரதோ³ த⁴ம்மந்தரீ 1 அங்கி³ரஸோ கபிலோ கண்ட³ரக்³கி³ ஸாமோ அதுலோ புப்³ப³கச்சாயனோ, ஸப்³பே³பேதே ஆசரியா ஸகிங் யேவ ரோகு³ப்பத்திஞ்ச நிதா³னஞ்ச ஸபா⁴வஞ்ச ஸமுட்டா²னஞ்ச திகிச்ச²ஞ்ச கிரியஞ்ச ஸித்³தா⁴ஸித்³த⁴ஞ்ச ஸப்³ப³ங் தங் 2 நிரவஸேஸங் ஜானித்வா ‘இமஸ்மிங் காயே எத்தகா ரோகா³ உப்பஜ்ஜிஸ்ஸந்தீ’தி ஏகப்பஹாரேன கலாபக்³கா³ஹங் கரித்வா ஸுத்தங் ப³ந்தி⁴ங்ஸு, அஸப்³ப³ஞ்ஞுனோ ஏதே ஸப்³பே³, கிஸ்ஸ பன ததா²க³தோ ஸப்³ப³ஞ்ஞூ ஸமானோ அனாக³தங் கிரியங் பு³த்³த⁴ஞாணேன ஜானித்வா ‘எத்தகே நாம வத்து²ஸ்மிங் எத்தகங் நாம ஸிக்கா²பத³ங் பஞ்ஞபேதப்³ப³ங் ப⁴விஸ்ஸதீ’தி பரிச்சி²ந்தி³த்வா அனவஸேஸதோ ஸிக்கா²பத³ங் ந பஞ்ஞபேஸி, உப்பன்னுப்பன்னே வத்து²ஸ்மிங் அயஸே பாகடே தோ³ஸே வித்தா²ரிகே புது²க³தே உஜ்ஜா²யந்தேஸு மனுஸ்ஸேஸு தஸ்மிங் தஸ்மிங் காலே ஸாவகானங் ஸிக்கா²பத³ங் பஞ்ஞபேஸீ’’தி?
8. ‘‘Bhante nāgasena, ye te ahesuṃ tikicchakānaṃ pubbakā ācariyā seyyathidaṃ, nārado dhammantarī 3 aṅgiraso kapilo kaṇḍaraggi sāmo atulo pubbakaccāyano, sabbepete ācariyā sakiṃ yeva roguppattiñca nidānañca sabhāvañca samuṭṭhānañca tikicchañca kiriyañca siddhāsiddhañca sabbaṃ taṃ 4 niravasesaṃ jānitvā ‘imasmiṃ kāye ettakā rogā uppajjissantī’ti ekappahārena kalāpaggāhaṃ karitvā suttaṃ bandhiṃsu, asabbaññuno ete sabbe, kissa pana tathāgato sabbaññū samāno anāgataṃ kiriyaṃ buddhañāṇena jānitvā ‘ettake nāma vatthusmiṃ ettakaṃ nāma sikkhāpadaṃ paññapetabbaṃ bhavissatī’ti paricchinditvā anavasesato sikkhāpadaṃ na paññapesi, uppannuppanne vatthusmiṃ ayase pākaṭe dose vitthārike puthugate ujjhāyantesu manussesu tasmiṃ tasmiṃ kāle sāvakānaṃ sikkhāpadaṃ paññapesī’’ti?
‘‘ஞாதமேதங், மஹாராஜ, ததா²க³தஸ்ஸ ‘இமஸ்மிங் ஸமயே இமேஸு மனுஸ்ஸேஸு ஸாதி⁴கங் தி³யட்³ட⁴ஸிக்கா²பத³ஸதங் பஞ்ஞபேதப்³ப³ங் ப⁴விஸ்ஸதீ’தி, அபி ச ததா²க³தஸ்ஸ ஏவங் அஹோஸி ‘ஸசே கோ² அஹங் ஸாதி⁴கங் தி³யட்³ட⁴ஸிக்கா²பத³ஸதங் ஏகப்பஹாரங் பஞ்ஞபெஸ்ஸாமி, மஹாஜனோ ஸந்தாஸமாபஜ்ஜிஸ்ஸதி ‘ப³ஹுகங் இத⁴ ரக்கி²தப்³ப³ங், து³க்கரங் வத போ⁴ ஸமணஸ்ஸ கோ³தமஸ்ஸ ஸாஸனே பப்³ப³ஜிது’ந்தி, பப்³ப³ஜிதுகாமாபி ந பப்³ப³ஜிஸ்ஸந்தி, வசனஞ்ச மே ந ஸத்³த³ஹிஸ்ஸந்தி, அஸத்³த³ஹந்தா தே மனுஸ்ஸா அபாயகா³மினோ ப⁴விஸ்ஸன்ன-தி உப்பன்னுப்பன்னே வத்து²ஸ்மிங் த⁴ம்மதே³ஸனாய விஞ்ஞாபெத்வா பாகடே தோ³ஸே ஸிக்கா²பத³ங் பஞ்ஞபெஸ்ஸாமீ’’’தி. ‘‘அச்ச²ரியங், ப⁴ந்தே நாக³ஸேன, பு³த்³தா⁴னங், அப்³பு⁴தங், ப⁴ந்தே நாக³ஸேன, பு³த்³தா⁴னங், யாவ மஹந்தங் ததா²க³தஸ்ஸ ஸப்³ப³ஞ்ஞுதஞாணங், ஏவமேதங், ப⁴ந்தே நாக³ஸேன, ஸுனித்³தி³ட்டோ² ஏஸோ அத்தோ² ததா²க³தேன, ‘ப³ஹுகங் இத⁴ ஸிக்கி²தப்³ப³’ந்தி ஸுத்வா ஸத்தானங் ஸந்தாஸோ உப்பஜ்ஜெய்ய, ஏகோபி ஜினஸாஸனே ந பப்³ப³ஜெய்ய, ஏவமேதங் ததா² ஸம்படிச்சா²மீ’’தி.
‘‘Ñātametaṃ, mahārāja, tathāgatassa ‘imasmiṃ samaye imesu manussesu sādhikaṃ diyaḍḍhasikkhāpadasataṃ paññapetabbaṃ bhavissatī’ti, api ca tathāgatassa evaṃ ahosi ‘sace kho ahaṃ sādhikaṃ diyaḍḍhasikkhāpadasataṃ ekappahāraṃ paññapessāmi, mahājano santāsamāpajjissati ‘bahukaṃ idha rakkhitabbaṃ, dukkaraṃ vata bho samaṇassa gotamassa sāsane pabbajitu’nti, pabbajitukāmāpi na pabbajissanti, vacanañca me na saddahissanti, asaddahantā te manussā apāyagāmino bhavissanna-ti uppannuppanne vatthusmiṃ dhammadesanāya viññāpetvā pākaṭe dose sikkhāpadaṃ paññapessāmī’’’ti. ‘‘Acchariyaṃ, bhante nāgasena, buddhānaṃ, abbhutaṃ, bhante nāgasena, buddhānaṃ, yāva mahantaṃ tathāgatassa sabbaññutañāṇaṃ, evametaṃ, bhante nāgasena, suniddiṭṭho eso attho tathāgatena, ‘bahukaṃ idha sikkhitabba’nti sutvā sattānaṃ santāso uppajjeyya, ekopi jinasāsane na pabbajeyya, evametaṃ tathā sampaṭicchāmī’’ti.
அனவஸேஸஸிக்கா²பத³பஞ்ஹோ அட்ட²மோ.
Anavasesasikkhāpadapañho aṭṭhamo.
Footnotes:
