| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၁၀. အနနုညာတသိက္ခာပဒဝဏ္ဏနာ
10. Ananuññātasikkhāpadavaṇṇanā
တေသံ အတ္ထိဘာဝံ အဇာနန္တိယာတိ (ပာစိ. အဋ္ဌ. ၁၁၆၃) တေသံ မာတာဒီနံ အတ္ထိဘာဝံ အဇာနန္တိယာ။ အနနုညာတသမုဋ္ဌာနန္တိ ယံ ဝာစတော, ကာယဝာစတော, ဝာစာစိတ္တတော, ကာယဝာစာစိတ္တတော စ သမုဋ္ဌာတိ, တံ အနနုညာတသမုဋ္ဌာနံ။ ကထံ? အဗ္ဘာနကမ္မာဒီသု ကေနစိဒေဝ ကရဏီယေန ခဏ္ဍသီမာယံ နိသိန္နာ ‘‘ပက္ကောသထ သိက္ခမာနံ, ဣဓေဝ နံ ဥပသမ္ပာဒေသ္သာမာ’’တိ ဥပသမ္ပာဒေတိ, ဧဝံ ဝာစတော သမုဋ္ဌာတိ။ ‘‘ဥပသ္သယတော ဥဋ္ဌာယ ဥပသမ္ပာဒေသ္သာမီ’’တိ ဝတ္ဝာ ခဏ္ဍသီမံ ဂစ္ဆန္တိယာ ကာယဝာစတော သမုဋ္ဌာတိ။ ဒ္ဝီသု ဌာနေသု ပဏ္ဏတ္တိံ ဇာနိတ္ဝာ ဝီတိက္ကမံ ကရောန္တိယာ ဝာစာစိတ္တတော, ကာယဝာစာစိတ္တတော စ သမုဋ္ဌာတိ။ အနနုဇာနာပေတ္ဝာ ဥပသမ္ပာဒနတော ကိရိယာကိရိယံ။
Tesaṃ atthibhāvaṃ ajānantiyāti (pāci. aṭṭha. 1163) tesaṃ mātādīnaṃ atthibhāvaṃ ajānantiyā. Ananuññātasamuṭṭhānanti yaṃ vācato, kāyavācato, vācācittato, kāyavācācittato ca samuṭṭhāti, taṃ ananuññātasamuṭṭhānaṃ. Kathaṃ? Abbhānakammādīsu kenacideva karaṇīyena khaṇḍasīmāyaṃ nisinnā ‘‘pakkosatha sikkhamānaṃ, idheva naṃ upasampādessāmā’’ti upasampādeti, evaṃ vācato samuṭṭhāti. ‘‘Upassayato uṭṭhāya upasampādessāmī’’ti vatvā khaṇḍasīmaṃ gacchantiyā kāyavācato samuṭṭhāti. Dvīsu ṭhānesu paṇṇattiṃ jānitvā vītikkamaṃ karontiyā vācācittato, kāyavācācittato ca samuṭṭhāti. Ananujānāpetvā upasampādanato kiriyākiriyaṃ.
အနနုညာတသိက္ခာပဒဝဏ္ဏနာ နိဋ္ဌိတာ။
Ananuññātasikkhāpadavaṇṇanā niṭṭhitā.
