| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၂. အာနန္ဒသုတ္တဝဏ္ဏနာ
2. Ānandasuttavaṇṇanā
၃၂. ဒုတိယေ တထာရူပောတိ တထာဇာတိကော။ သမာဓိပဋိလာဘောတိ စိတ္တေကဂ္ဂတာလာဘော။ ဣမသ္မိံ စ သဝိညာဏကေတိ ဧတ္ထ အတ္တနော စ ပရသ္သ စာတိ ဥဘယေသမ္ပိ ကာယော သဝိညာဏကဋ္ဌေန ဧကတော ကတ္ဝာ ဣမသ္မိန္တိ ဝုတ္တော။ အဟင္ကာရမမင္ကာရမာနာနုသယာတိ အဟင္ကာရဒိဋ္ဌိ စ မမင္ကာရတဏ္ဟာ စ မာနာနုသယော စာတိ အတ္တနော စ ပရသ္သ စ ကိလေသာ။ နာသ္သူတိ န ဘဝေယ္ယုံ။ ဗဟိဒ္ဓာ စ သဗ္ဗနိမိတ္တေသူတိ ရူပနိမိတ္တံ, သဒ္ဒနိမိတ္တံ, ဂန္ဓနိမိတ္တံ, ရသနိမိတ္တံ, ဖောဋ္ဌဗ္ဗနိမိတ္တံ, သသ္သတာဒိနိမိတ္တံ, ပုဂ္ဂလနိမိတ္တံ ဓမ္မနိမိတ္တန္တိ ဧဝရူပေသု စ ဗဟိဒ္ဓာ သဗ္ဗနိမိတ္တေသု။ စေတောဝိမုတ္တိံ ပညာဝိမုတ္တိန္တိ ဖလသမာဓိဉ္စေဝ ဖလဉာဏဉ္စ။ သိယာတိ ဘဝေယ္ယ။
32. Dutiye tathārūpoti tathājātiko. Samādhipaṭilābhoti cittekaggatālābho. Imasmiṃ ca saviññāṇaketi ettha attano ca parassa cāti ubhayesampi kāyo saviññāṇakaṭṭhena ekato katvā imasminti vutto. Ahaṅkāramamaṅkāramānānusayāti ahaṅkāradiṭṭhi ca mamaṅkārataṇhā ca mānānusayo cāti attano ca parassa ca kilesā. Nāssūti na bhaveyyuṃ. Bahiddhā ca sabbanimittesūti rūpanimittaṃ, saddanimittaṃ, gandhanimittaṃ, rasanimittaṃ, phoṭṭhabbanimittaṃ, sassatādinimittaṃ, puggalanimittaṃ dhammanimittanti evarūpesu ca bahiddhā sabbanimittesu. Cetovimuttiṃ paññāvimuttinti phalasamādhiñceva phalañāṇañca. Siyāti bhaveyya.
ဣဓာနန္ဒ, ဘိက္ခုနောတိ, အာနန္ဒ, ဣမသ္မိံ သာသနေ ဘိက္ခုနော။ ဧတံ သန္တံ ဧတံ ပဏီတန္တိ နိဗ္ဗာနံ ဒသ္သေန္တော အာဟ။ နိဗ္ဗာနံ ဟိ ကိလေသာနံ သန္တတာယ သန္တံ နာမ, နိဗ္ဗာနံ သန္တန္တိ သမာပတ္တိံ အပ္ပေတ္ဝာဝ ဒိဝသမ္ပိ နိသိန္နသ္သ စိတ္တုပ္ပာဒော သန္တန္တေဝ ပဝတ္တတီတိပိ သန္တံ။ ပဏီတန္တိ သမာပတ္တိံ အပ္ပေတ္ဝာ နိသိန္နသ္သာပိ စိတ္တုပ္ပာဒော ပဏီတန္တေဝ ပဝတ္တတီတိ နိဗ္ဗာနံ ပဏီတံ နာမ။ သဗ္ဗသင္ခာရသမထောတိအာဒီနိပိ တသ္သေဝ ဝေဝစနာနိ။ ‘‘သဗ္ဗသင္ခာရသမထော’’တိ သမာပတ္တိံ အပ္ပေတ္ဝာ နိသိန္နသ္သ ဟိ ဒိဝသဘာဂမ္ပိ စိတ္တုပ္ပာဒော သဗ္ဗသင္ခာရသမထောတေဝ ပဝတ္တတိ။ပေ.။ တထာ တီသု ဘဝေသု ဝာနသင္ခာတာယ တဏ္ဟာယ အဘာဝေန နိဗ္ဗာနန္တိ လဒ္ဓနာမေ တသ္မိံ သမာပတ္တိံ အပ္ပေတ္ဝာ နိသိန္နသ္သ စိတ္တုပ္ပာဒော နိဗ္ဗာနံ နိဗ္ဗာနန္တေဝ ပဝတ္တတီတိ သဗ္ဗသင္ခာရသမထောတိအာဒီနိ နာမာနိ လဘတိ။ ဣမသ္မိံ ပန အဋ္ဌဝိဓေ အာဘောဂသမန္နာဟာရေ ဣမသ္မိံ ဌာနေ ဧကောပိ လဗ္ဘတိ, ဒ္ဝေပိ သဗ္ဗေပိ လဗ္ဘန္တေဝ။
Idhānanda, bhikkhunoti, ānanda, imasmiṃ sāsane bhikkhuno. Etaṃ santaṃ etaṃ paṇītanti nibbānaṃ dassento āha. Nibbānaṃ hi kilesānaṃ santatāya santaṃ nāma, nibbānaṃ santanti samāpattiṃ appetvāva divasampi nisinnassa cittuppādo santanteva pavattatītipi santaṃ. Paṇītanti samāpattiṃ appetvā nisinnassāpi cittuppādo paṇītanteva pavattatīti nibbānaṃ paṇītaṃ nāma. Sabbasaṅkhārasamathotiādīnipi tasseva vevacanāni. ‘‘Sabbasaṅkhārasamatho’’ti samāpattiṃ appetvā nisinnassa hi divasabhāgampi cittuppādo sabbasaṅkhārasamathoteva pavattati…pe… tathā tīsu bhavesu vānasaṅkhātāya taṇhāya abhāvena nibbānanti laddhanāme tasmiṃ samāpattiṃ appetvā nisinnassa cittuppādo nibbānaṃ nibbānanteva pavattatīti sabbasaṅkhārasamathotiādīni nāmāni labhati. Imasmiṃ pana aṭṭhavidhe ābhogasamannāhāre imasmiṃ ṭhāne ekopi labbhati, dvepi sabbepi labbhanteva.
သင္ခာယာတိ ဉာဏေန ဇာနိတ္ဝာ။ ပရောပရာနီတိ ပရာနိ စ ဩပရာနိ စ။ ပရအတ္တဘာဝသကအတ္တဘာဝာနိ ဟိ ပရာနိ စ ဩပရာနိ စာတိ ဝုတ္တံ ဟောတိ။ ယသ္သာတိ ယသ္သ အရဟတော။ ဣဉ္ဇိတန္တိ ရာဂိဉ္ဇိတံ ဒောသမောဟမာနဒိဋ္ဌိကိလေသဒုစ္စရိတိဉ္ဇိတန္တိ ဣမာနိ သတ္တ ဣဉ္ဇိတာနိ စလိတာနိ ဖန္ဒိတာနိ။ နတ္ထိ ကုဟိဉ္စီတိ ကတ္ထစိ ဧကာရမ္မဏေပိ နတ္ထိ။ သန္တောတိ ပစ္စနီကကိလေသာနံ သန္တတာယ သန္တော။ ဝိဓူမောတိ ကာယဒုစ္စရိတာဒိဓူမဝိရဟိတော။ အနီဃောတိ ရာဂာဒိဤဃဝိရဟိတော။ နိရာသောတိ နိတ္တဏ္ဟော။ အတာရီတိ တိဏ္ဏော ဥတ္တိဏ္ဏော သမတိက္ကန္တော။ သောတိ သော အရဟံ ခီဏာသဝော။ ဇာတိဇရန္တိ ဧတ္ထ ဇာတိဇရာဂဟဏေနေဝ ဗ္ယာဓိမရဏမ္ပိ ဂဟိတမေဝာတိ ဝေဒိတဗ္ဗံ။ ဣတိ သုတ္တန္တေပိ ဂာထာယပိ အရဟတ္တဖလသမာပတ္တိယေဝ ကထိတာတိ။
Saṅkhāyāti ñāṇena jānitvā. Paroparānīti parāni ca oparāni ca. Paraattabhāvasakaattabhāvāni hi parāni ca oparāni cāti vuttaṃ hoti. Yassāti yassa arahato. Iñjitanti rāgiñjitaṃ dosamohamānadiṭṭhikilesaduccaritiñjitanti imāni satta iñjitāni calitāni phanditāni. Natthi kuhiñcīti katthaci ekārammaṇepi natthi. Santoti paccanīkakilesānaṃ santatāya santo. Vidhūmoti kāyaduccaritādidhūmavirahito. Anīghoti rāgādiīghavirahito. Nirāsoti nittaṇho. Atārīti tiṇṇo uttiṇṇo samatikkanto. Soti so arahaṃ khīṇāsavo. Jātijaranti ettha jātijarāgahaṇeneva byādhimaraṇampi gahitamevāti veditabbaṃ. Iti suttantepi gāthāyapi arahattaphalasamāpattiyeva kathitāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. အာနန္ဒသုတ္တံ • 2. Ānandasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂. အာနန္ဒသုတ္တဝဏ္ဏနာ • 2. Ānandasuttavaṇṇanā
