| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၄. အာမိသသိက္ခာပဒဝဏ္ဏနာ
4. Āmisasikkhāpadavaṇṇanā
တဏ္ဟာဒိဋ္ဌီဟိ အာမသိတဗ္ဗတော အာမိသံ, စီဝရာဒိ, အာမိသမေဝ ဟေတု အာမိသဟေတု။ တေနာဟ ‘‘စီဝရာဒီနံ အညတရဟေတူ’’တိ။ အာဒိသဒ္ဒေန ပိဏ္ဍပာတသေနာသနဂိလာနပစ္စယသက္ကာရဂရုကာရမာနနဝန္ဒနပူဇနာနံ ဂဟဏံ။ အဝဏ္ဏကာမတာယာတိ အယသကာမတာယေဝ။
Taṇhādiṭṭhīhi āmasitabbato āmisaṃ, cīvarādi, āmisameva hetu āmisahetu. Tenāha ‘‘cīvarādīnaṃ aññatarahetū’’ti. Ādisaddena piṇḍapātasenāsanagilānapaccayasakkāragarukāramānanavandanapūjanānaṃ gahaṇaṃ. Avaṇṇakāmatāyāti ayasakāmatāyeva.
ဓမ္မကမ္မေတိအာဒီသု ဘိက္ခုနောဝာဒသမ္မုတိကမ္မံ ‘‘ကမ္မ’’န္တိ ဝေဒိတဗ္ဗံ။ တတ္ထ တိကပာစိတ္တိယန္တိ ဓမ္မကမ္မေ ဓမ္မကမ္မသညိဝေမတိကအဓမ္မကမ္မသညီနံ ဝသေန တီဏိ ပာစိတ္တိယာနိ။ တထေဝ အဓမ္မကမ္မေ တိကဒုက္ကဋံ ဝေဒိတဗ္ဗံ။ အသမ္မတန္တိ သမ္မတေန ဝာ သင္ဃေန ဝာ ဘာရံ ကတ္ဝာ ဌပိတံ ဥပသမ္ပန္နံ။ နနု ဩဝာဒသမ္မုတိ ဥပသမ္ပန္နသ္သေဝ ဒီယတိ, န သာမဏေရသ္သာတိ အာဟ ‘‘တတ္ထာ’’တိအာဒိ။ သမ္မတေန ဝာ သင္ဃေန ဝာ ဌပိတော ပန ဗဟုသ္သုတော သာမဏေရော ‘‘အသမ္မတော’’တိ ဝေဒိတဗ္ဗော။ ပကတိယာ စီဝရာဒိဟေတု ဩဝဒန္တံ ပန ဧဝံ ဘဏန္တသ္သာတိ ပကတိယာ စီဝရာဒိဟေတု ဩဝဒန္တံ ‘‘ဧသ စီဝရာဒိဟေတု ဩဝဒတီ’’တိ သညာယ ဧဝံ ဘဏန္တသ္သ။ ‘‘န စီဝရာဒိဟေတု ဩဝဒတီ’’တိ သညာယ ပန ဧဝံ ဘဏန္တသ္သ ဒုက္ကဋံ။ အနာမိသန္တရတာတိ အာမိသစိတ္တာဘာဝော, ‘‘အာမိသဟေတု ဩဝဒိသ္သာမီ’’တိ ဧဝံ ပဝတ္တအဇ္ဈာသယာဘာဝောတိ အတ္ထော။ စိတ္တပရိယာယော ဟေတ္ထ အန္တရသဒ္ဒော ‘‘ယသ္သန္တရတော န သန္တိ ကောပာ’’တိအာဒီသု (ဥဒာ. ၂၀) ဝိယ။
Dhammakammetiādīsu bhikkhunovādasammutikammaṃ ‘‘kamma’’nti veditabbaṃ. Tattha tikapācittiyanti dhammakamme dhammakammasaññivematikaadhammakammasaññīnaṃ vasena tīṇi pācittiyāni. Tatheva adhammakamme tikadukkaṭaṃ veditabbaṃ. Asammatanti sammatena vā saṅghena vā bhāraṃ katvā ṭhapitaṃ upasampannaṃ. Nanu ovādasammuti upasampannasseva dīyati, na sāmaṇerassāti āha ‘‘tatthā’’tiādi. Sammatena vā saṅghena vā ṭhapito pana bahussuto sāmaṇero ‘‘asammato’’ti veditabbo. Pakatiyā cīvarādihetu ovadantaṃ pana evaṃ bhaṇantassāti pakatiyā cīvarādihetu ovadantaṃ ‘‘esa cīvarādihetu ovadatī’’ti saññāya evaṃ bhaṇantassa. ‘‘Na cīvarādihetu ovadatī’’ti saññāya pana evaṃ bhaṇantassa dukkaṭaṃ. Anāmisantaratāti āmisacittābhāvo, ‘‘āmisahetu ovadissāmī’’ti evaṃ pavattaajjhāsayābhāvoti attho. Cittapariyāyo hettha antarasaddo ‘‘yassantarato na santi kopā’’tiādīsu (udā. 20) viya.
အာမိသသိက္ခာပဒဝဏ္ဏနာ နိဋ္ဌိတာ။
Āmisasikkhāpadavaṇṇanā niṭṭhitā.
