| Library / Tipiṭaka / तिपिटक • Tipiṭaka / अपदानपाळि • Apadānapāḷi |
८. अम्बदायकत्थेरअपदानं
8. Ambadāyakattheraapadānaṃ
५३.
53.
‘‘अनोमदस्सी भगवा, निसिन्नो पब्बतन्तरे।
‘‘Anomadassī bhagavā, nisinno pabbatantare;
मेत्ताय अफरि लोके, अप्पमाणे निरूपधि॥
Mettāya aphari loke, appamāṇe nirūpadhi.
५४.
54.
‘‘कपि अहं तदा आसिं, हिमवन्ते नगुत्तमे।
‘‘Kapi ahaṃ tadā āsiṃ, himavante naguttame;
५५.
55.
‘‘अविदूरे हिमवन्तस्स, अम्बासुं फलिनो तदा।
‘‘Avidūre himavantassa, ambāsuṃ phalino tadā;
ततो पक्कं गहेत्वान, अम्बं समधुकं अदं॥
Tato pakkaṃ gahetvāna, ambaṃ samadhukaṃ adaṃ.
५६.
56.
‘‘तं मे बुद्धो वियाकासि, अनोमदस्सी महामुनि।
‘‘Taṃ me buddho viyākāsi, anomadassī mahāmuni;
इमिना मधुदानेन, अम्बदानेन चूभयं॥
Iminā madhudānena, ambadānena cūbhayaṃ.
५७.
57.
‘‘सत्तपञ्ञासकप्पम्हि, देवलोके रमिस्सति।
‘‘Sattapaññāsakappamhi, devaloke ramissati;
अवसेसेसु कप्पेसु, वोकिण्णं संसरिस्सति॥
Avasesesu kappesu, vokiṇṇaṃ saṃsarissati.
५८.
58.
‘‘खेपेत्वा पापकं कम्मं, परिपक्काय बुद्धिया।
‘‘Khepetvā pāpakaṃ kammaṃ, paripakkāya buddhiyā;
विनिपातमगन्त्वान, किलेसे झापयिस्सति॥
Vinipātamagantvāna, kilese jhāpayissati.
५९.
59.
‘‘दमेन उत्तमेनाहं, दमितोम्हि महेसिना।
‘‘Damena uttamenāhaṃ, damitomhi mahesinā;
पत्तोम्हि अचलं ठानं, हित्वा जयपराजयं॥
Pattomhi acalaṃ ṭhānaṃ, hitvā jayaparājayaṃ.
६०.
60.
‘‘सत्तसत्ततिकप्पसते, अम्बट्ठजसनामका।
‘‘Sattasattatikappasate, ambaṭṭhajasanāmakā;
चतुद्दस ते राजानो, चक्कवत्ती महब्बला॥
Catuddasa te rājāno, cakkavattī mahabbalā.
६१.
61.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा अम्बदायको थेरो इमा गाथायो अभासित्थाति।
Itthaṃ sudaṃ āyasmā ambadāyako thero imā gāthāyo abhāsitthāti.
अम्बदायकत्थेरस्सापदानं अट्ठमं।
Ambadāyakattherassāpadānaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ८. अम्बदायकत्थेरअपदानवण्णना • 8. Ambadāyakattheraapadānavaṇṇanā
