| Library / Tipiṭaka / තිපිටක • Tipiṭaka / අඞ්ගුත්තරනිකාය (ටීකා) • Aṅguttaranikāya (ṭīkā) |
20. අමතවග්ගවණ්ණනා
20. Amatavaggavaṇṇanā
600-611. නත්ථි එත්ථ මතං මරණං විනාසොති අමතං, නිබ්බානන්ති ආහ – ‘‘මරණවිරහිතං නිබ්බානං පරිභුඤ්ජන්තී’’ති. අමතස්ස වා නිබ්බානස්ස අධිගමහෙතුතාය අමතසදිසඅතප්පකසුඛපතිතතාය ච කායගතාසති ‘‘අමත’’න්ති වුත්තා. පරිභුඤ්ජන්තීති ඣානසමාපජ්ජනෙන වළඤ්ජන්ති. විරද්ධන්ති අනධිගමෙන විරජ්ඣිතං. තෙනාහ – ‘‘විරාධිතං නාධිගත’’න්ති. ආරද්ධන්ති සාධිතං නිප්ඵාදිතං. තඤ්ච පරිපුණ්ණං නාම හොතීති ආහ – ‘‘ආරද්ධන්ති පරිපුණ්ණ’’න්ති. පමාදිංසූති කාලබ්යත්තයෙනෙදං වුත්තන්ති ආහ – ‘‘පමජ්ජන්තී’’ති.
600-611. Natthi ettha mataṃ maraṇaṃ vināsoti amataṃ, nibbānanti āha – ‘‘maraṇavirahitaṃ nibbānaṃ paribhuñjantī’’ti. Amatassa vā nibbānassa adhigamahetutāya amatasadisaatappakasukhapatitatāya ca kāyagatāsati ‘‘amata’’nti vuttā. Paribhuñjantīti jhānasamāpajjanena vaḷañjanti. Viraddhanti anadhigamena virajjhitaṃ. Tenāha – ‘‘virādhitaṃ nādhigata’’nti. Āraddhanti sādhitaṃ nipphāditaṃ. Tañca paripuṇṇaṃ nāma hotīti āha – ‘‘āraddhanti paripuṇṇa’’nti. Pamādiṃsūti kālabyattayenedaṃ vuttanti āha – ‘‘pamajjantī’’ti.
අමතවග්ගවණ්ණනා නිට්ඨිතා.
Amatavaggavaṇṇanā niṭṭhitā.
ඉති මනොරථපූරණියා අඞ්ගුත්තරනිකාය-අට්ඨකථාය
Iti manorathapūraṇiyā aṅguttaranikāya-aṭṭhakathāya
එකකනිපාතවණ්ණනාය අනුත්තානත්ථදීපනා සමත්තා.
Ekakanipātavaṇṇanāya anuttānatthadīpanā samattā.
පඨමො භාගො නිට්ඨිතො.
Paṭhamo bhāgo niṭṭhito.
Related texts:
තිපිටක (මූල) • Tipiṭaka (Mūla) / සුත්තපිටක • Suttapiṭaka / අඞ්ගුත්තරනිකාය • Aṅguttaranikāya / 20. අමතවග්ගො • 20. Amatavaggo
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / අඞ්ගුත්තරනිකාය (අට්ඨකථා) • Aṅguttaranikāya (aṭṭhakathā) / 20. අමතවග්ගවණ්ණනා • 20. Amatavaggavaṇṇanā
