| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
9. агусаламууласуд̇д̇аван̣н̣анаа
9. Akusalamūlasuttavaṇṇanā
70. навамз агусаламуулаанийд̇и агусалаанам̣ муулаани, агусалаани жа д̇аани муулаани жаад̇и ваа агусаламуулаани. яад̣̇аби, бхигкавз, лобход̇и яоби, бхигкавз, лобхо. д̇ад̣̇аби агусаламууланд̇и соби агусаламуулам̣. агусаламуулам̣ ваа санд̇хааяа ид̇ха д̇амбийд̇и ад̇т̇о ваддад̇иязва. зд̇знубааязна саб̣б̣ад̇т̇а наяо нзд̇аб̣б̣о. абхисан̇карод̇ийд̇и ааяуухад̇и самбин̣д̣зд̇и раасим̣ гарод̇и. асад̇аа д̣̇угкам̣ уббаад̣̇аяад̇ийд̇и абхууд̇зна авиж̇ж̇амаанзна яам̣гин̃жи д̇асса абхууд̇ам̣ д̣̇осам̣ вад̇ваа д̣̇угкам̣ уббаад̣̇зд̇и. вад̇хзна ваад̇иаад̣̇и язнаагаарзна д̣̇угкам̣ уббаад̣̇зд̇и, д̇ам̣ д̣̇ассзд̇ум̣ вуд̇д̇ам̣. д̇ад̇т̇а ж̇аанияаад̇и д̇ханаж̇аанияаа. баб̣б̣ааж̇анааяаад̇и г̇аамад̇о ваа радтад̇о ваа баб̣б̣ааж̇анийяагаммзна . б̣алавамхийд̇и ахамасми б̣алаваа. б̣алад̇т̇о ид̇ибийд̇и б̣алзна мз ад̇т̇о ид̇иби, б̣алз ваа тид̇омхийд̇иби вад̣̇ад̇и.
70. Navame akusalamūlānīti akusalānaṃ mūlāni, akusalāni ca tāni mūlāni cāti vā akusalamūlāni. Yadapi, bhikkhave, lobhoti yopi, bhikkhave, lobho. Tadapiakusalamūlanti sopi akusalamūlaṃ. Akusalamūlaṃ vā sandhāya idha tampīti attho vaṭṭatiyeva. Etenupāyena sabbattha nayo netabbo. Abhisaṅkharotīti āyūhati sampiṇḍeti rāsiṃ karoti. Asatā dukkhaṃ uppādayatīti abhūtena avijjamānena yaṃkiñci tassa abhūtaṃ dosaṃ vatvā dukkhaṃ uppādeti. Vadhena vātiādi yenākārena dukkhaṃ uppādeti, taṃ dassetuṃ vuttaṃ. Tattha jāniyāti dhanajāniyā. Pabbājanāyāti gāmato vā raṭṭhato vā pabbājanīyakammena . Balavamhīti ahamasmi balavā. Balattho itipīti balena me attho itipi, bale vā ṭhitomhītipi vadati.
агаалаваад̣̇ийд̇и гааласмим̣ на вад̣̇ад̇и, агааласмим̣ вад̣̇ад̇и наама. абхууд̇аваад̣̇ийд̇и бхууд̇ам̣ на вад̣̇ад̇и , абхууд̇ам̣ вад̣̇ад̇и наама. анад̇т̇аваад̣̇ийд̇и ад̇т̇ам̣ на вад̣̇ад̇и, анад̇т̇ам̣ вад̣̇ад̇и наама. ад̇хаммаваад̣̇ийд̇и д̇хаммам̣ на вад̣̇ад̇и, ад̇хаммам̣ вад̣̇ад̇и наама. авинаяаваад̣̇ийд̇и винаяам̣ на вад̣̇ад̇и, авинаяам̣ вад̣̇ад̇и наама.
Akālavādīti kālasmiṃ na vadati, akālasmiṃ vadati nāma. Abhūtavādīti bhūtaṃ na vadati , abhūtaṃ vadati nāma. Anatthavādīti atthaṃ na vadati, anatthaṃ vadati nāma. Adhammavādīti dhammaṃ na vadati, adhammaṃ vadati nāma. Avinayavādīti vinayaṃ na vadati, avinayaṃ vadati nāma.
д̇ат̇аа хааяанд̇и д̇ат̇аа хи аяам̣. на аад̇аббам̣ гарод̇и д̇асса ниб̣б̣зтанааяаад̇и д̇асса абхууд̇асса ниб̣б̣зтанад̇т̇ааяа вийрияам̣ на гарод̇и. ид̇ибзд̇ам̣ ад̇ажчанд̇и иминааби гааран̣зна зд̇ам̣ ад̇ажчам̣. ид̇арам̣ д̇ассзва взважанам̣.
Tathā hāyanti tathā hi ayaṃ. Na ātappaṃ karoti tassa nibbeṭhanāyāti tassa abhūtassa nibbeṭhanatthāya vīriyaṃ na karoti. Itipetaṃ atacchanti imināpi kāraṇena etaṃ atacchaṃ. Itaraṃ tasseva vevacanaṃ.
д̣̇уг̇г̇ад̇и баадиган̇каад̇и нираяаад̣̇игаа д̣̇уг̇г̇ад̇и ижчид̇аб̣б̣аа, саа асса авассабхаавиний, д̇ад̇т̇аанзна ниб̣б̣ад̇д̇ид̇аб̣б̣анд̇и ад̇т̇о. уд̣̇д̇хасд̇од̇и убари д̇хам̣сид̇о. барияонад̣̇д̇ход̇и саманд̇аа онад̣̇д̇хо. анаяам̣ аабаж̇ж̇ад̇ийд̇и авуд̣дхим̣ аабаж̇ж̇ад̇и. б̣яасанам̣ аабаж̇ж̇ад̇ийд̇и винаасам̣ аабаж̇ж̇ад̇и. г̇имхагааласмин̃хи маалуваасибаадигааяа палид̇ааяа б̣ийж̇аани уббад̇ид̇ваа вадаругкаад̣̇ийнам̣ муулз бад̇анд̇и. д̇ад̇т̇а яасса ругкасса муулз д̇ийсу д̣̇исаасу д̇ийн̣и б̣ийж̇аани бад̇ид̇аани хонд̇и, д̇асмим̣ ругкз баавуссагзна мзгхзна абхивадтз д̇ийхи б̣ийж̇зхи д̇аяо ан̇гураа удтахид̇ваа д̇ам̣ ругкам̣ аллийяанд̇и. д̇ад̇о бадтааяа ругкад̣̇звад̇ааяо сагабхаавзна сан̣таад̇ум̣ на саггонд̇и. д̇зби ан̇гураа вад̣дхамаанаа лад̇аабхаавам̣ аабаж̇ж̇ид̇ваа д̇ам̣ ругкам̣ абхирухид̇ваа саб̣б̣авидабасаакаабасаакаа сам̣сиб̣б̣ид̇ваа д̇ам̣ ругкам̣ убари барияонанд̇ханд̇и. со маалуваалад̇аахи сам̣сиб̣б̣ид̇о гханзхи маханд̇зхи маалуваабад̇д̇зхи сан̃чанно д̣̇звз ваа вассанд̇з ваад̇з ваа вааяанд̇з д̇ад̇т̇а д̇ад̇т̇а балуж̇ж̇ид̇ваа каан̣умад̇д̇амзва авасиссад̇и. д̇ам̣ санд̇хааязд̇ам̣ вуд̇д̇ам̣.
Duggati pāṭikaṅkhāti nirayādikā duggati icchitabbā, sā assa avassabhāvinī, tatthānena nibbattitabbanti attho. Uddhastoti upari dhaṃsito. Pariyonaddhoti samantā onaddho. Anayaṃ āpajjatīti avuḍḍhiṃ āpajjati. Byasanaṃāpajjatīti vināsaṃ āpajjati. Gimhakālasmiñhi māluvāsipāṭikāya phalitāya bījāni uppatitvā vaṭarukkhādīnaṃ mūle patanti. Tattha yassa rukkhassa mūle tīsu disāsu tīṇi bījāni patitāni honti, tasmiṃ rukkhe pāvussakena meghena abhivaṭṭhe tīhi bījehi tayo aṅkurā uṭṭhahitvā taṃ rukkhaṃ allīyanti. Tato paṭṭhāya rukkhadevatāyo sakabhāvena saṇṭhātuṃ na sakkonti. Tepi aṅkurā vaḍḍhamānā latābhāvaṃ āpajjitvā taṃ rukkhaṃ abhiruhitvā sabbaviṭapasākhāpasākhā saṃsibbitvā taṃ rukkhaṃ upari pariyonandhanti. So māluvālatāhi saṃsibbito ghanehi mahantehi māluvāpattehi sañchanno deve vā vassante vāte vā vāyante tattha tattha palujjitvā khāṇumattameva avasissati. Taṃ sandhāyetaṃ vuttaṃ.
звамзва код̇и зд̇т̇а бана ид̣̇ам̣ обаммасам̣санд̣̇анам̣ – саалаад̣̇ийсу ан̃н̃ад̇араругко вияа хи аяам̣ сад̇д̇о д̣̇адтаб̣б̣о, д̇иссо маалуваалад̇аа вияа д̇ийн̣и агусаламуулаани, яаава ругкасаакаа асамбад̇д̇аа, д̇аава д̇аасам̣ лад̇аанам̣ уж̇угам̣ ругкаароханам̣ вияа лобхаад̣̇ийнам̣ д̣̇ваарам̣ асамбад̇д̇агаало, саакаанусаарзна г̇аманагаало вияа д̣̇вааравасзна г̇аманагаало, барияонад̣̇д̇хагаало вияа лобхаад̣̇ийхи барияудтид̇агаало, куд̣̇д̣̇агасаакаанам̣ балуж̇ж̇анагаало вияа д̣̇ваараббад̇д̇аанам̣ гилзсаанам̣ васзна куд̣̇д̣̇аанукуд̣̇д̣̇агаа аабад̇д̇ияо аабаннагаало, махаасаакаанам̣ балуж̇ж̇анагаало вияа г̇аругаабад̇д̇им̣ аабаннагаало, лад̇аанусаарзна од̇ин̣н̣зна уд̣̇агзна муулзсу д̇инд̇зсу ругкасса бхуумияам̣ бад̇анагаало вияа гамзна жад̇д̇аари баарааж̇игаани аабаж̇ж̇ид̇ваа жад̇уусу абааязсу ниб̣б̣ад̇д̇анагаало д̣̇адтаб̣б̣о.
Evameva khoti ettha pana idaṃ opammasaṃsandanaṃ – sālādīsu aññatararukkho viya hi ayaṃ satto daṭṭhabbo, tisso māluvālatā viya tīṇi akusalamūlāni, yāva rukkhasākhā asampattā, tāva tāsaṃ latānaṃ ujukaṃ rukkhārohanaṃ viya lobhādīnaṃ dvāraṃ asampattakālo, sākhānusārena gamanakālo viya dvāravasena gamanakālo, pariyonaddhakālo viya lobhādīhi pariyuṭṭhitakālo, khuddakasākhānaṃ palujjanakālo viya dvārappattānaṃ kilesānaṃ vasena khuddānukhuddakā āpattiyo āpannakālo, mahāsākhānaṃ palujjanakālo viya garukāpattiṃ āpannakālo, latānusārena otiṇṇena udakena mūlesu tintesu rukkhassa bhūmiyaṃ patanakālo viya kamena cattāri pārājikāni āpajjitvā catūsu apāyesu nibbattanakālo daṭṭhabbo.
суггабагко вуд̇д̇авибаллаасзна взд̣̇ид̇аб̣б̣о. звамзва код̇и зд̇т̇а бана ид̣̇ам̣ обаммасам̣санд̣̇анам̣ – саалаад̣̇ийсу ан̃н̃ад̇араругко вияа аяам̣ сад̇д̇о д̣̇адтаб̣б̣о, д̇иссо маалуваалад̇аа вияа д̇ийн̣и агусаламуулаани, д̇аасам̣ аббавад̇д̇им̣ гаад̇ум̣ ааг̇ад̇абурисо вияа яог̇ааважаро, гуд̣̇д̣̇аало вияа бан̃н̃аа, гуд̣̇д̣̇аалабидагам̣ вияа сад̣̇д̇хаабидагам̣, баликананакан̣ид̇д̇и вияа вибассанаабан̃н̃аа, кан̣ид̇д̇ияаа муулажчзд̣̇анам̣ вияа вибассанаан̃аан̣зна авиж̇ж̇аамууласса чинд̣̇анагаало, кан̣д̣аакан̣д̣игам̣ чинд̣̇анагаало вияа канд̇хавасзна д̣̇идтагаало, пааланагаало вияа маг̇г̇ан̃аан̣зна гилзсаанам̣ самуг̇гхаад̇ид̇агаало, масигаран̣агаало вияа д̇харамаанагабан̃жагканд̇хагаало, махааваад̇з обун̣ид̇ваа аббавад̇д̇анагаало вияа убаад̣̇иннагагканд̇хаанам̣ аббадисанд̇хиганирод̇хзна нируж̇жхид̇ваа бунаб̣бхавз бадисанд̇хиаг̇г̇ахан̣агаало д̣̇адтаб̣б̣од̇и. имасмим̣ суд̇д̇з ваддавиваддам̣ гат̇ид̇ам̣.
Sukkapakkho vuttavipallāsena veditabbo. Evameva khoti ettha pana idaṃ opammasaṃsandanaṃ – sālādīsu aññatararukkho viya ayaṃ satto daṭṭhabbo, tisso māluvālatā viya tīṇi akusalamūlāni, tāsaṃ appavattiṃ kātuṃ āgatapuriso viya yogāvacaro, kuddālo viya paññā, kuddālapiṭakaṃ viya saddhāpiṭakaṃ, palikhananakhaṇitti viya vipassanāpaññā, khaṇittiyā mūlacchedanaṃ viya vipassanāñāṇena avijjāmūlassa chindanakālo, khaṇḍākhaṇḍikaṃ chindanakālo viya khandhavasena diṭṭhakālo, phālanakālo viya maggañāṇena kilesānaṃ samugghātitakālo, masikaraṇakālo viya dharamānakapañcakkhandhakālo, mahāvāte opuṇitvā appavattanakālo viya upādinnakakkhandhānaṃ appaṭisandhikanirodhena nirujjhitvā punabbhave paṭisandhiaggahaṇakālo daṭṭhabboti. Imasmiṃ sutte vaṭṭavivaṭṭaṃ kathitaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 9. агусаламууласуд̇д̇ам̣ • 9. Akusalamūlasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 9. агусаламууласуд̇д̇аван̣н̣анаа • 9. Akusalamūlasuttavaṇṇanā
