| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. அக்க²மஸுத்தங்
5. Akkhamasuttaṃ
85. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ தே²ரோ பி⁴க்கு² ஸப்³ரஹ்மசாரீனங் அப்பியோ ச ஹோதி அமனாபோ ச அக³ரு ச அபா⁴வனீயோ ச. கதமேஹி பஞ்சஹி? அக்க²மோ ஹோதி ரூபானங், அக்க²மோ ஸத்³தா³னங், அக்க²மோ க³ந்தா⁴னங், அக்க²மோ ரஸானங், அக்க²மோ பொ²ட்ட²ப்³பா³னங் – இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ தே²ரோ பி⁴க்கு² ஸப்³ரஹ்மசாரீனங் அப்பியோ ச ஹோதி அமனாபோ ச அக³ரு ச அபா⁴வனீயோ ச.
85. ‘‘Pañcahi, bhikkhave, dhammehi samannāgato thero bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca. Katamehi pañcahi? Akkhamo hoti rūpānaṃ, akkhamo saddānaṃ, akkhamo gandhānaṃ, akkhamo rasānaṃ, akkhamo phoṭṭhabbānaṃ – imehi kho, bhikkhave, pañcahi dhammehi samannāgato thero bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca.
‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ தே²ரோ பி⁴க்கு² ஸப்³ரஹ்மசாரீனங் பியோ ச ஹோதி மனாபோ ச க³ரு ச பா⁴வனீயோ ச. கதமேஹி பஞ்சஹி? க²மோ ஹோதி ரூபானங், க²மோ ஸத்³தா³னங், க²மோ க³ந்தா⁴னங், க²மோ ரஸானங், க²மோ பொ²ட்ட²ப்³பா³னங் – இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ தே²ரோ பி⁴க்கு² ஸப்³ரஹ்மசாரீனங் பியோ ச ஹோதி மனாபோ ச க³ரு ச பா⁴வனீயோ சா’’தி. பஞ்சமங்.
‘‘Pañcahi, bhikkhave, dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo ca. Katamehi pañcahi? Khamo hoti rūpānaṃ, khamo saddānaṃ, khamo gandhānaṃ, khamo rasānaṃ, khamo phoṭṭhabbānaṃ – imehi kho, bhikkhave, pañcahi dhammehi samannāgato thero bhikkhu sabrahmacārīnaṃ piyo ca hoti manāpo ca garu ca bhāvanīyo cā’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. அக்க²மஸுத்தவண்ணனா • 5. Akkhamasuttavaṇṇanā
