| Library / Tipiṭaka / ತಿಪಿಟಕ • Tipiṭaka / ಚರಿಯಾಪಿಟಕಪಾಳಿ • Cariyāpiṭakapāḷi |
॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥
Namo tassa bhagavato arahato sammāsambuddhassa
ಖುದ್ದಕನಿಕಾಯೇ
Khuddakanikāye
ಚರಿಯಾಪಿಟಕಪಾಳಿ
Cariyāpiṭakapāḷi
೧. ಅಕಿತ್ತಿವಗ್ಗೋ
1. Akittivaggo
೧. ಅಕಿತ್ತಿಚರಿಯಾ
1. Akitticariyā
೧.
1.
‘‘ಕಪ್ಪೇ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ।
‘‘Kappe ca satasahasse, caturo ca asaṅkhiye;
ಏತ್ಥನ್ತರೇ ಯಂ ಚರಿತಂ, ಸಬ್ಬಂ ತಂ ಬೋಧಿಪಾಚನಂ॥
Etthantare yaṃ caritaṃ, sabbaṃ taṃ bodhipācanaṃ.
೨.
2.
‘‘ಅತೀತಕಪ್ಪೇ ಚರಿತಂ, ಠಪಯಿತ್ವಾ ಭವಾಭವೇ।
‘‘Atītakappe caritaṃ, ṭhapayitvā bhavābhave;
ಇಮಮ್ಹಿ ಕಪ್ಪೇ ಚರಿತಂ, ಪವಕ್ಖಿಸ್ಸಂ ಸುಣೋಹಿ ಮೇ॥
Imamhi kappe caritaṃ, pavakkhissaṃ suṇohi me.
೩.
3.
‘‘ಯದಾ ಅಹಂ ಬ್ರಹಾರಞ್ಞೇ, ಸುಞ್ಞೇ ವಿಪಿನಕಾನನೇ।
‘‘Yadā ahaṃ brahāraññe, suññe vipinakānane;
೪.
4.
‘‘ತದಾ ಮಂ ತಪತೇಜೇನ, ಸನ್ತತ್ತೋ ತಿದಿವಾಭಿಭೂ।
‘‘Tadā maṃ tapatejena, santatto tidivābhibhū;
ಧಾರೇನ್ತೋ ಬ್ರಾಹ್ಮಣವಣ್ಣಂ, ಭಿಕ್ಖಾಯ ಮಂ ಉಪಾಗಮಿ॥
Dhārento brāhmaṇavaṇṇaṃ, bhikkhāya maṃ upāgami.
೫.
5.
‘‘ಪವನಾ ಆಭತಂ ಪಣ್ಣಂ, ಅತೇಲಞ್ಚ ಅಲೋಣಿಕಂ।
‘‘Pavanā ābhataṃ paṇṇaṃ, atelañca aloṇikaṃ;
ಮಮ ದ್ವಾರೇ ಠಿತಂ ದಿಸ್ವಾ, ಸಕಟಾಹೇನ ಆಕಿರಿಂ॥
Mama dvāre ṭhitaṃ disvā, sakaṭāhena ākiriṃ.
೬.
6.
‘‘ತಸ್ಸ ದತ್ವಾನಹಂ ಪಣ್ಣಂ, ನಿಕ್ಕುಜ್ಜಿತ್ವಾನ ಭಾಜನಂ।
‘‘Tassa datvānahaṃ paṇṇaṃ, nikkujjitvāna bhājanaṃ;
ಪುನೇಸನಂ ಜಹಿತ್ವಾನ, ಪಾವಿಸಿಂ ಪಣ್ಣಸಾಲಕಂ॥
Punesanaṃ jahitvāna, pāvisiṃ paṇṇasālakaṃ.
೭.
7.
‘‘ದುತಿಯಮ್ಪಿ ತತಿಯಮ್ಪಿ, ಉಪಗಞ್ಛಿ ಮಮನ್ತಿಕಂ।
‘‘Dutiyampi tatiyampi, upagañchi mamantikaṃ;
ಅಕಮ್ಪಿತೋ ಅನೋಲಗ್ಗೋ, ಏವಮೇವಮದಾಸಹಂ॥
Akampito anolaggo, evamevamadāsahaṃ.
೮.
8.
‘‘ನ ಮೇ ತಪ್ಪಚ್ಚಯಾ ಅತ್ಥಿ, ಸರೀರಸ್ಮಿಂ ವಿವಣ್ಣಿಯಂ।
‘‘Na me tappaccayā atthi, sarīrasmiṃ vivaṇṇiyaṃ;
ಪೀತಿಸುಖೇನ ರತಿಯಾ, ವೀತಿನಾಮೇಮಿ ತಂ ದಿವಂ॥
Pītisukhena ratiyā, vītināmemi taṃ divaṃ.
೯.
9.
‘‘ಯದಿ ಮಾಸಮ್ಪಿ ದ್ವೇಮಾಸಂ, ದಕ್ಖಿಣೇಯ್ಯಂ ವರಂ ಲಭೇ।
‘‘Yadi māsampi dvemāsaṃ, dakkhiṇeyyaṃ varaṃ labhe;
ಅಕಮ್ಪಿತೋ ಅನೋಲೀನೋ, ದದೇಯ್ಯಂ ದಾನಮುತ್ತಮಂ॥
Akampito anolīno, dadeyyaṃ dānamuttamaṃ.
೧೦.
10.
‘‘ನ ತಸ್ಸ ದಾನಂ ದದಮಾನೋ, ಯಸಂ ಲಾಭಞ್ಚ ಪತ್ಥಯಿಂ।
‘‘Na tassa dānaṃ dadamāno, yasaṃ lābhañca patthayiṃ;
ಸಬ್ಬಞ್ಞುತಂ ಪತ್ಥಯಾನೋ, ತಾನಿ ಕಮ್ಮಾನಿ ಆಚರಿ’’ನ್ತಿ॥
Sabbaññutaṃ patthayāno, tāni kammāni ācari’’nti.
ಅಕಿತ್ತಿಚರಿಯಂ ಪಠಮಂ।
Akitticariyaṃ paṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಚರಿಯಾಪಿಟಕ-ಅಟ್ಠಕಥಾ • Cariyāpiṭaka-aṭṭhakathā / ೧. ಅಕಿತ್ತಿಚರಿಯಾವಣ್ಣನಾ • 1. Akitticariyāvaṇṇanā
