| Library / Tipiṭaka / ཏིཔིཊཀ • Tipiṭaka / དྷམྨསངྒཎི-ཨཊྛཀཐཱ • Dhammasaṅgaṇi-aṭṭhakathā |
ཨཱཀིཉྩཉྙཱཡཏནཾ
Ākiñcaññāyatanaṃ
༢༦༧. ཝིཉྙཱཎཉྩཱཡཏནཾ སམཏིཀྐམྨཱཏི ཨེཏྠཱཔི པུབྦེ ཝུཏྟནཡེནེཝ ཝིཉྙཱཎཉྩ ཨཱཡཏནམསྶ ཨདྷིཊྛཱནཊྛེནཱཏི ཛྷཱནམྤི ཝིཉྙཱཎཉྩཱཡཏནཾ། ཝུཏྟནཡེནེཝ ཙ ཨཱརམྨཎམྤི། ཨེཝམེཏཾ ཛྷཱནཉྩ ཨཱརམྨཎཉྩཱཏི ཨུབྷཡམྤི ཨཔྤཝཏྟིཀརཎེན ཙ ཨམནསིཀརཎེན ཙ སམཏིཀྐམིཏྭཱཝ ཡསྨཱ ཨིདཾ ཨཱཀིཉྩཉྙཱཡཏནཾ ཨུཔསམྤཛྫ ཝིཧཱཏབྦཾ, ཏསྨཱ ཨུབྷཡམྤེཏཾ ཨེཀཛ྄ཛྷཾ ཀཏྭཱ ‘ཝིཉྙཱཎཉྩཱཡཏནཾ སམཏིཀྐམྨཱ’ཏི ཨིདཾ ཝུཏྟནྟི ཝེདིཏབྦཾ།
267. Viññāṇañcāyatanaṃsamatikkammāti etthāpi pubbe vuttanayeneva viññāṇañca āyatanamassa adhiṭṭhānaṭṭhenāti jhānampi viññāṇañcāyatanaṃ. Vuttanayeneva ca ārammaṇampi. Evametaṃ jhānañca ārammaṇañcāti ubhayampi appavattikaraṇena ca amanasikaraṇena ca samatikkamitvāva yasmā idaṃ ākiñcaññāyatanaṃ upasampajja vihātabbaṃ, tasmā ubhayampetaṃ ekajjhaṃ katvā ‘viññāṇañcāyatanaṃ samatikkammā’ti idaṃ vuttanti veditabbaṃ.
ཨཱཀིཉྩཉྙཱཡཏནསཉྙཱསཧགཏནྟི ཨེཏྠ པན ནཱསྶ ཀིཉྩནནྟི ཨཀིཉྩནཾ; ཨནྟམསོ བྷངྒམཏྟམྤི ཨསྶ ཨཝསིཊྛཾ ནཏྠཱིཏི ཝུཏྟཾ ཧོཏི། ཨཀིཉྩནསྶ བྷཱཝོ ཨཱཀིཉྩཉྙཾ། ཨཱཀཱསཱནཉྩཱཡཏནཝིཉྙཱཎཱཔགམསྶེཏཾ ཨདྷིཝཙནཾ། ཏཾ ཨཱཀིཉྩཉྙཾ ཨདྷིཊྛཱནཊྛེན ཨིམིསྶཱ སཉྙཱཡ ཨཱཡཏནནྟི ཨཱཀིཉྩཉྙཱཡཏནཾ། ཏསྨིཾ ཨཱཀིཉྩཉྙཱཡཏནེ པཝཏྟཱཡ སཉྙཱཡ སཧགཏནྟི ཨཱཀིཉྩཉྙཱཡཏནསཉྙཱསཧགཏཾ། ཨཱཀཱསེ པཝཏྟིཏཝིཉྙཱཎཱཔགམཱརམྨཎསྶ ཛྷཱནསྶེཏཾ ཨདྷིཝཙནཾ། ཨིདྷ ཝིཉྙཱཎཉྩཱཡཏནསམཱཔཏྟིཡཱ ནིཀནྟིཔརིཡཱདཱནདུཀྑཏཱཡ དུཀྑཱ པཊིཔདཱ, པརིཡཱདིནྣནིཀནྟིཀསྶ ཨཔྤནཱ པརིཝཱསདནྡྷཏཱཡ དནྡྷཱབྷིཉྙཱ། ཝིཔརིཡཱཡེན སུཁཱ པཊིཔདཱ ཁིཔྤཱབྷིཉྙཱ ཙ། པརིཏྟཀསིཎུགྒྷཱཊིམཱཀཱསེ པཝཏྟིཏཝིཉྙཱཎཱཔགམཱརམྨཎཏཱཡ པརིཏྟཱརམྨཎཏཱ, ཝིཔརིཡཱཡེན ཨཔྤམཱཎཱརམྨཎཏཱ ཝེདིཏབྦཱ། སེསཾ པུརིམསདིསམེཝ།
Ākiñcaññāyatanasaññāsahagatanti ettha pana nāssa kiñcananti akiñcanaṃ; antamaso bhaṅgamattampi assa avasiṭṭhaṃ natthīti vuttaṃ hoti. Akiñcanassa bhāvo ākiñcaññaṃ. Ākāsānañcāyatanaviññāṇāpagamassetaṃ adhivacanaṃ. Taṃ ākiñcaññaṃ adhiṭṭhānaṭṭhena imissā saññāya āyatananti ākiñcaññāyatanaṃ. Tasmiṃ ākiñcaññāyatane pavattāya saññāya sahagatanti ākiñcaññāyatanasaññāsahagataṃ. Ākāse pavattitaviññāṇāpagamārammaṇassa jhānassetaṃ adhivacanaṃ. Idha viññāṇañcāyatanasamāpattiyā nikantipariyādānadukkhatāya dukkhā paṭipadā, pariyādinnanikantikassa appanā parivāsadandhatāya dandhābhiññā. Vipariyāyena sukhā paṭipadā khippābhiññā ca. Parittakasiṇugghāṭimākāse pavattitaviññāṇāpagamārammaṇatāya parittārammaṇatā, vipariyāyena appamāṇārammaṇatā veditabbā. Sesaṃ purimasadisameva.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / དྷམྨསངྒཎཱིཔཱལི༹ • Dhammasaṅgaṇīpāḷi / ཨརཱུཔཱཝཙརཀུསལཾ • Arūpāvacarakusalaṃ
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / དྷམྨསངྒཎཱི-མཱུལཊཱིཀཱ • Dhammasaṅgaṇī-mūlaṭīkā / ཨརཱུཔཱཝཙརཀུསལཀཐཱཝཎྞནཱ • Arūpāvacarakusalakathāvaṇṇanā
