| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২৭. পদুমুক্খিপৰগ্গো
27. Padumukkhipavaggo
১-১০. আকাসুক্খিপিযত্থেরঅপদানাদিৰণ্ণনা
1-10. Ākāsukkhipiyattheraapadānādivaṇṇanā
১-২. সত্তৰীসতিমে ৰগ্গে পঠমাপদানে জলজগ্গে দুৰে গয্হাতি জলে উদকে জাতে অগ্গে উপ্পলাদযো দ্ৰে পুপ্ফে গহেত্ৰা বুদ্ধস্স সমীপং গন্ত্ৰা একং পুপ্ফং পাদেসু নিক্খিপিং পূজেসিং, একং পুপ্ফং আকাসে খিপিন্তি অত্থো।
1-2. Sattavīsatime vagge paṭhamāpadāne jalajagge duve gayhāti jale udake jāte agge uppalādayo dve pupphe gahetvā buddhassa samīpaṃ gantvā ekaṃ pupphaṃ pādesu nikkhipiṃ pūjesiṃ, ekaṃ pupphaṃ ākāse khipinti attho.
দুতিযাপদানং পাকটমেৰ।
Dutiyāpadānaṃ pākaṭameva.
১০. ততিযাপদানে বোধিযা পাদপুত্তমেতি উত্তমে বোধিপাদপে। অড্ঢচন্দং মযা দিন্নন্তি তস্মিং বোধিমূলে অড্ঢচন্দাকারেন মযা অনেকপুপ্ফানি পূজিতানীতি অত্থো। ধরণীরুহপাদপেতি রুক্খপব্বতরতনাদযো ধারেতীতি ধরণী, পথৰী, ধরণিযা রুহতি পতিট্ঠহতীতি ধরণীরুহো, পাদসঙ্খাতেন মূলেন উদকং পিৰতি খন্ধৰিটপাদীসু পত্থরিযতীতি পাদপো, ধরণীরুহো চ সো পাদপো চেতি ধরণীরুহপাদপো, তস্মিং ধরণীরুহপাদপে পুপ্ফং মযা পূজিতন্তি অত্থো।
10. Tatiyāpadāne bodhiyā pādaputtameti uttame bodhipādape. Aḍḍhacandaṃ mayā dinnanti tasmiṃ bodhimūle aḍḍhacandākārena mayā anekapupphāni pūjitānīti attho. Dharaṇīruhapādapeti rukkhapabbataratanādayo dhāretīti dharaṇī, pathavī, dharaṇiyā ruhati patiṭṭhahatīti dharaṇīruho, pādasaṅkhātena mūlena udakaṃ pivati khandhaviṭapādīsu patthariyatīti pādapo, dharaṇīruho ca so pādapo ceti dharaṇīruhapādapo, tasmiṃ dharaṇīruhapādape pupphaṃ mayā pūjitanti attho.
চতুত্থাপদানং উত্তানত্থমেৰ।
Catutthāpadānaṃ uttānatthameva.
১৮-১৯. পঞ্চমাপদানে হিমৰন্তস্সাৰিদূরেতি হিমৰন্তস্স আসন্নে। রোমসো নাম পব্বতোতি রুক্খলতাগুম্বাভাৰা কেৰলং দব্বতিণাদিসঞ্ছন্নত্তা রোমসো নাম পব্বতো অহোসি। তম্হি পব্বতপাদম্হীতি তস্মিং পব্বতপরিযন্তে। সমণো ভাৰিতিন্দ্রিযোতি সমিতপাপো ৰূপসন্তকিলেসো সমণো ৰড্ঢিতইন্দ্রিযো, রক্খিতচক্খুন্দ্রিযাদিইন্দ্রিযোতি অত্থো। অথ ৰা ৰড্ঢিতইন্দ্রিযো ৰড্ঢিতসদ্ধিন্দ্রিযাদিইন্দ্রিযোতি অত্থো। তস্স সমণস্স অহং বিল়ালিআলুৰে গহেত্ৰা অদাসিন্তি অত্থো।
18-19. Pañcamāpadāne himavantassāvidūreti himavantassa āsanne. Romaso nāma pabbatoti rukkhalatāgumbābhāvā kevalaṃ dabbatiṇādisañchannattā romaso nāma pabbato ahosi. Tamhi pabbatapādamhīti tasmiṃ pabbatapariyante. Samaṇo bhāvitindriyoti samitapāpo vūpasantakileso samaṇo vaḍḍhitaindriyo, rakkhitacakkhundriyādiindriyoti attho. Atha vā vaḍḍhitaindriyo vaḍḍhitasaddhindriyādiindriyoti attho. Tassa samaṇassa ahaṃ biḷāliāluve gahetvā adāsinti attho.
ছট্ঠসত্তমট্ঠমনৰমদসমাপদানানি উত্তানত্থানেৰাতি।
Chaṭṭhasattamaṭṭhamanavamadasamāpadānāni uttānatthānevāti.
সত্তৰীসতিমৰগ্গৰণ্ণনা সমত্তা।
Sattavīsatimavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi
১. আকাসুক্খিপিযত্থেরঅপদানং • 1. Ākāsukkhipiyattheraapadānaṃ
৩. অড্ঢচন্দিযত্থেরঅপদানং • 3. Aḍḍhacandiyattheraapadānaṃ
৫. বিল়ালিদাযকত্থেরঅপদানং • 5. Biḷālidāyakattheraapadānaṃ
