| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၆. ဆဋ္ဌဝဂ္ဂော
6. Chaṭṭhavaggo
(၅၉) ၇. အာကာသော သနိဒသ္သနောတိကထာ
(59) 7. Ākāso sanidassanotikathā
၄၆၃. အာကာသော သနိဒသ္သနောတိ? အာမန္တာ။ ရူပံ ရူပာယတနံ ရူပဓာတု နီလံ ပီတကံ လောဟိတကံ ဩဒာတံ စက္ခုဝိညေယ္ယံ စက္ခုသ္မိံ ပဋိဟညတိ စက္ခုသ္သ အာပာထံ အာဂစ္ဆတီတိ? န ဟေဝံ ဝတ္တဗ္ဗေ။ပေ.။။
463. Ākāso sanidassanoti? Āmantā. Rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti? Na hevaṃ vattabbe…pe….
အာကာသော သနိဒသ္သနောတိ? အာမန္တာ။ စက္ခုဉ္စ ပဋိစ္စ အာကာသဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ ။ပေ.။။
Ākāso sanidassanoti? Āmantā. Cakkhuñca paṭicca ākāsañca uppajjati cakkhuviññāṇanti? Na hevaṃ vattabbe …pe….
စက္ခုဉ္စ ပဋိစ္စ အာကာသဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ။ ‘‘စက္ခုဉ္စ ပဋိစ္စ အာကာသဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ 1 သုတ္တန္တောတိ? နတ္ထိ။ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ 2 – အတ္ထေဝ သုတ္တန္တောတိ? အာမန္တာ။ ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ အာကာသဉ္စ ဥပ္ပဇ္ဇတိ စက္ခုဝိညာဏ’’န္တိ။
Cakkhuñca paṭicca ākāsañca uppajjati cakkhuviññāṇanti? Āmantā. ‘‘Cakkhuñca paṭicca ākāsañca uppajjati cakkhuviññāṇa’’nti – attheva 3 suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti 4 – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca ākāsañca uppajjati cakkhuviññāṇa’’nti.
၄၆၄. န ဝတ္တဗ္ဗံ – ‘‘အာကာသော သနိဒသ္သနော’’တိ? အာမန္တာ။ နနု ပသ္သတိ ဒ္ဝိန္နံ ရုက္ခာနံ အန္တရံ, ဒ္ဝိန္နံ ထမ္ဘာနံ အန္တရံ, တာဠစ္ဆိဒ္ဒံ ဝာတပာနစ္ဆိဒ္ဒန္တိ? အာမန္တာ ။ ဟဉ္စိ ပသ္သတိ ဒ္ဝိန္နံ ရုက္ခာနံ အန္တရံ, ဒ္ဝိန္နံ ထမ္ဘာနံ အန္တရံ, တာဠစ္ဆိဒ္ဒံ ဝာတပာနစ္ဆိဒ္ဒံ, တေန ဝတ ရေ ဝတ္တဗ္ဗေ – ‘‘အာကာသော သနိဒသ္သနော’’တိ။
464. Na vattabbaṃ – ‘‘ākāso sanidassano’’ti? Āmantā. Nanu passati dvinnaṃ rukkhānaṃ antaraṃ, dvinnaṃ thambhānaṃ antaraṃ, tāḷacchiddaṃ vātapānacchiddanti? Āmantā . Hañci passati dvinnaṃ rukkhānaṃ antaraṃ, dvinnaṃ thambhānaṃ antaraṃ, tāḷacchiddaṃ vātapānacchiddaṃ, tena vata re vattabbe – ‘‘ākāso sanidassano’’ti.
အာကာသော သနိဒသ္သနောတိကထာ နိဋ္ဌိတာ။
Ākāso sanidassanotikathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၇. အာကာသော သနိဒသ္သနောတိကထာဝဏ္ဏနာ • 7. Ākāso sanidassanotikathāvaṇṇanā
