| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
25. අකප්පියසයනනිද්දෙසො
25. Akappiyasayananiddeso
අකප්පියසයනානීති –
Akappiyasayanānīti –
187.
187.
ආසන්දී තූලී පල්ලඞ්කො, පටිකං ගොනචිත්තකං;
Āsandī tūlī pallaṅko, paṭikaṃ gonacittakaṃ;
පටලී විකතී උද්ද-ලොමී එකන්තලොමිකා.
Paṭalī vikatī udda-lomī ekantalomikā.
188.
188.
කුත්තං කොසෙය්යං කට්ටිස්සං, හත්ථිඅස්සරථත්ථරා;
Kuttaṃ koseyyaṃ kaṭṭissaṃ, hatthiassarathattharā;
ජිනප්පවෙණිකදලී-මිගප්පවරඅත්ථරා.
Jinappaveṇikadalī-migappavaraattharā.
189.
189.
සලොහිතවිතානඤ්චු-භතොරත්තූපධානකං ;
Salohitavitānañcu-bhatorattūpadhānakaṃ ;
අකප්පියානි එතානි, දුක්කටං පරිභුඤ්ජතො.
Akappiyāni etāni, dukkaṭaṃ paribhuñjato.
190.
190.
ආසන්දාදිත්තයා සෙසෙ, ලබ්භතෙ ගිහිසන්තකෙ;
Āsandādittayā sese, labbhate gihisantake;
ධම්මාසනෙ ච භත්තග්ගෙ, ඝරෙ චාපි නිසීදිතුං;
Dhammāsane ca bhattagge, ghare cāpi nisīdituṃ;
භූමත්ථරණසඞ්ඛෙපෙ, සයිතුඤ්චාපි කප්පති.
Bhūmattharaṇasaṅkhepe, sayituñcāpi kappati.
191.
191.
චතුරංසපීඨා සත්තඞ්ගා, පඤ්චඞ්ගා උච්චපාදකා;
Caturaṃsapīṭhā sattaṅgā, pañcaṅgā uccapādakā;
තූලොනද්ධා ඝරෙයෙව, මඤ්චපීඨා නිසීදිතුං.
Tūlonaddhā ghareyeva, mañcapīṭhā nisīdituṃ.
192.
192.
චොළවාකුණ්ණපණ්ණානං, තිණානඤ්චෙව පූරිතා;
Coḷavākuṇṇapaṇṇānaṃ, tiṇānañceva pūritā;
චීවරච්ඡවියො පඤ්ච, භිසී සබ්බත්ථ කප්පියා.
Cīvaracchaviyo pañca, bhisī sabbattha kappiyā.
193.
193.
තූලත්තයං භිසිගබ්භො, ලොමානි මිගපක්ඛිනං;
Tūlattayaṃ bhisigabbho, lomāni migapakkhinaṃ;
බිම්බොහනෙ අනුඤ්ඤාතං, තූලවජ්ජා මසූරකෙ.
Bimbohane anuññātaṃ, tūlavajjā masūrake.
194.
194.
මනුස්සලොමමුණ්ණායං, පණ්ණෙ පුප්ඵං තමාලකං;
Manussalomamuṇṇāyaṃ, paṇṇe pupphaṃ tamālakaṃ;
සුද්ධං න ආසනඤ්චෙව, ලබ්භමප්පටිවෙක්ඛිතන්ති.
Suddhaṃ na āsanañceva, labbhamappaṭivekkhitanti.
