| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
১০. অকপ্পিযমংসনিদ্দেসৰণ্ণনা
10. Akappiyamaṃsaniddesavaṇṇanā
১১৩. ইদানি মংসেসু পটিপজ্জিতব্বাকারং দস্সেতুং ‘‘মংসেসু চ অকপ্পিয’’ন্তি উদ্ধটং। অকপ্পিযমংসম্হি দস্সিতে কপ্পিযমংসং দস্সিতমেৰ হোতি পারিসেসনযেন। উরগস্স চাতি এত্থ সব্বোপি উরগো ন কপ্পতি।
113. Idāni maṃsesu paṭipajjitabbākāraṃ dassetuṃ ‘‘maṃsesu ca akappiya’’nti uddhaṭaṃ. Akappiyamaṃsamhi dassite kappiyamaṃsaṃ dassitameva hoti pārisesanayena. Uragassa cāti ettha sabbopi urago na kappati.
১১৪. এত্তাৰতা জাতিৰসেন দসৰিধম্পি অকপ্পিযমংসং দস্সেত্ৰা ইদানি কপ্পিযমংসেসুপি অকপ্পিযৰিধিং দস্সেতুং ‘‘উদ্দিস্সকতমংসঞ্চ, যঞ্চ অপ্পটিৰেক্খিত’’ন্তি ৰুত্তং। তত্থ পঞ্চসু সহধম্মিকেসু যস্স কস্সচি যং কিঞ্চি উদ্দিস্স কতং উদ্দিস্সকতং নাম, তং পন জানিত্ৰা পরিভুঞ্জিতুং সব্বেসম্পি ন ৰট্টতি, অজানন্তানং অনাপত্তি। মচ্ছেসুপি এসেৰ নযো। অপ্পটিৰেক্খিতন্তি অনুপপরিক্খিতং, অনাপুচ্ছিতন্তি অত্থো। ‘‘ন ভিক্খৰে অপ্পটিৰেক্খিত্ৰা মংসং পরিভুঞ্জিতব্বং, যো পরিভুঞ্জেয্য, আপত্তি দুক্কটস্সা’’তি (মহাৰ॰ ২৮১) ৰুত্তং। মচ্ছেসু পন আপুচ্ছনকিচ্চং নত্থি অকপ্পিযমচ্ছানং নত্থিতাযাতি ৰদন্তি। ইদানি এতেসু আপত্তিভেদং দস্সেতুং ‘‘থুল্লচ্চয’’ন্তিআদিমাহ। তং সব্বং (কঙ্খা॰ অট্ঠ॰ সন্নিধিকারকসিক্খাপদৰণ্ণনা) উত্তানমেৰ।
114. Ettāvatā jātivasena dasavidhampi akappiyamaṃsaṃ dassetvā idāni kappiyamaṃsesupi akappiyavidhiṃ dassetuṃ ‘‘uddissakatamaṃsañca, yañca appaṭivekkhita’’nti vuttaṃ. Tattha pañcasu sahadhammikesu yassa kassaci yaṃ kiñci uddissa kataṃ uddissakataṃ nāma, taṃ pana jānitvā paribhuñjituṃ sabbesampi na vaṭṭati, ajānantānaṃ anāpatti. Macchesupi eseva nayo. Appaṭivekkhitanti anupaparikkhitaṃ, anāpucchitanti attho. ‘‘Na bhikkhave appaṭivekkhitvā maṃsaṃ paribhuñjitabbaṃ, yo paribhuñjeyya, āpatti dukkaṭassā’’ti (mahāva. 281) vuttaṃ. Macchesu pana āpucchanakiccaṃ natthi akappiyamacchānaṃ natthitāyāti vadanti. Idāni etesu āpattibhedaṃ dassetuṃ ‘‘thullaccaya’’ntiādimāha. Taṃ sabbaṃ (kaṅkhā. aṭṭha. sannidhikārakasikkhāpadavaṇṇanā) uttānameva.
১১৫. ইদানি ন কেৰলং ইমেসং মনুস্সাদীনং মংসমেৰ অকপ্পিযং, অট্ঠিআদীনিপি অকপ্পিযানীতি দস্সেতুং ‘‘অট্ঠীপী’’তিআদি ৰুত্তং। তত্থ (মহাৰ॰ অট্ঠ ২৮১) লোমম্পেসন্তি লোমম্পি এসং অকপ্পিযমংসৰত্থূনন্তি অত্থো। সচিত্তকং ৰাতি এতেসু পন উদ্দিস্সকতমেৰ সচিত্তকং, সেসা অচিত্তকাতি। অকপ্পিযমংসৰিনিচ্ছযো।
115. Idāni na kevalaṃ imesaṃ manussādīnaṃ maṃsameva akappiyaṃ, aṭṭhiādīnipi akappiyānīti dassetuṃ ‘‘aṭṭhīpī’’tiādi vuttaṃ. Tattha (mahāva. aṭṭha 281) lomampesanti lomampi esaṃ akappiyamaṃsavatthūnanti attho. Sacittakaṃ vāti etesu pana uddissakatameva sacittakaṃ, sesā acittakāti. Akappiyamaṃsavinicchayo.
অকপ্পিযমংসনিদ্দেসৰণ্ণনা নিট্ঠিতা।
Akappiyamaṃsaniddesavaṇṇanā niṭṭhitā.
