| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
10. அகப்பியமங்ஸனித்³தே³ஸவண்ணனா
10. Akappiyamaṃsaniddesavaṇṇanā
113-4. மனுஸ்ஸஹத்தி²அஸ்ஸானஞ்ச …பே॰… உரக³ஸ்ஸ ச யங் மங்ஸஞ்ச, யங் உத்³தி³ஸ்ஸகதமங்ஸஞ்ச, அப்படிவெக்கி²தங் யஞ்ச மங்ஸங், தேஸு மங்ஸேஸூதி ஏவங் யோஜெத்வா அத்தோ² வேதி³தப்³போ³. தத்த² ஸீஸகீ³வாதரங்கே³ன சரந்தா அச்ச²விஸேஸாவ தரச்சா². உரக³ஸ்ஸாதி இமினா ஸப்³பா³பி தீ³க⁴ஜாதி ஸங்க³ஹிதா. உத்³தி³ஸ்ஸகதமங்ஸந்தி பி⁴க்கு²ங் உத்³தி³ஸித்வா கதங் உத்³தி³ஸ்ஸகதங், தஞ்ச தங் மங்ஸஞ்ச. எத்த² ச மங்ஸ-க்³க³ஹணேன மச்சா²னம்பி க³ஹணங் வேதி³தப்³ப³ங் உபலக்க²ணவஸேன, ச-ஸத்³தே³ன வா. பஞ்சஸுபி ஸஹத⁴ம்மிகேஸு யங் கிஞ்சி உத்³தி³ஸ்ஸகதங் ஸப்³பே³ஸம்பி ந கப்பதி, தம்பி அதி³ட்ட²அஸுதஅபரிஸங்கிததாய திகோடிபரிஸுத்³த⁴ங் வட்டதி. அப்படிவெக்கி²தந்தி அனுபபரிக்கி²தங், அனாபுச்சி²தந்தி அத்தோ². ஆபத்திபீ⁴ருகேன ஹி ரூபங் ஸல்லக்கெ²ந்தேனாபி புச்சி²த்வா படிக்³க³ஹேதப்³ப³ங் பரிபு⁴ஞ்ஜிதப்³ப³ஞ்ச. மனுஸ்ஸானங் மங்ஸேஸு து²ல்லச்சயந்தி யோஜனா. தூ²லோ அச்சயோ எத்தா²தி ரஸ்ஸே, த்³வித்தே ச து²ல்லச்சயங். பாராஜிகஸங்கா⁴தி³ஸேஸேஹி ட²பெத்வா இதோ அதி⁴கங் வஜ்ஜங் நத்தி². ஸேஸேஸூதி அவஸேஸேஸு ஏகாத³ஸஸு.
113-4. Manussahatthiassānañca …pe… uragassa ca yaṃ maṃsañca, yaṃ uddissakatamaṃsañca, appaṭivekkhitaṃ yañca maṃsaṃ, tesu maṃsesūti evaṃ yojetvā attho veditabbo. Tattha sīsagīvātaraṅgena carantā acchavisesāva taracchā. Uragassāti iminā sabbāpi dīghajāti saṅgahitā. Uddissakatamaṃsanti bhikkhuṃ uddisitvā kataṃ uddissakataṃ, tañca taṃ maṃsañca. Ettha ca maṃsa-ggahaṇena macchānampi gahaṇaṃ veditabbaṃ upalakkhaṇavasena, ca-saddena vā. Pañcasupi sahadhammikesu yaṃ kiñci uddissakataṃ sabbesampi na kappati, tampi adiṭṭhaasutaaparisaṅkitatāya tikoṭiparisuddhaṃ vaṭṭati. Appaṭivekkhitanti anupaparikkhitaṃ, anāpucchitanti attho. Āpattibhīrukena hi rūpaṃ sallakkhentenāpi pucchitvā paṭiggahetabbaṃ paribhuñjitabbañca. Manussānaṃ maṃsesu thullaccayanti yojanā. Thūlo accayo etthāti rasse, dvitte ca thullaccayaṃ. Pārājikasaṅghādisesehi ṭhapetvā ito adhikaṃ vajjaṃ natthi. Sesesūti avasesesu ekādasasu.
115. இதா³னி மனுஸ்ஸாதீ³னங் அட்டி²ஆதீ³னிபி அகப்பியானீதி த³ஸ்ஸேதுங் ‘‘அட்டி²பீ’’திஆதி³மாஹ. பி-ஸத்³தோ³ ‘‘லோஹித’’ந்திஆதீ³ஸுபி அனுவத்தேதப்³போ³. ஏஸந்தி மனுஸ்ஸாதீ³னங் த³ஸன்னங். வஸாஸு பன ஏகா மனுஸ்ஸவஸா ந வட்டதி. கீ²ராதீ³ஸு அகப்பியங் நாம நத்தி². உத்³தி³ஸ்ஸகதங்யேவ ஸசித்தகந்தி யோஜனா. ஸசித்தகந்தி உத்³தி³ஸ்ஸகதபா⁴வஜானநசித்தேன ஸஹ வத்ததீதி ஸசித்தகங். வத்து²வீதிக்கமவிஜானநசித்தேன ஹி ஸசித்தகத்தங். எத்த² ச ஸசித்தகத்தங் ஆபத்தியா ஏவ, ந ச மங்ஸஸ்ஸ, ததா²பி மங்ஸஸீஸேன ஆபத்தி ஏவ வுத்தாதி விஞ்ஞாதப்³ப³ந்தி.
115. Idāni manussādīnaṃ aṭṭhiādīnipi akappiyānīti dassetuṃ ‘‘aṭṭhipī’’tiādimāha. Pi-saddo ‘‘lohita’’ntiādīsupi anuvattetabbo. Esanti manussādīnaṃ dasannaṃ. Vasāsu pana ekā manussavasā na vaṭṭati. Khīrādīsu akappiyaṃ nāma natthi. Uddissakataṃyeva sacittakanti yojanā. Sacittakanti uddissakatabhāvajānanacittena saha vattatīti sacittakaṃ. Vatthuvītikkamavijānanacittena hi sacittakattaṃ. Ettha ca sacittakattaṃ āpattiyā eva, na ca maṃsassa, tathāpi maṃsasīsena āpatti eva vuttāti viññātabbanti.
அகப்பியமங்ஸனித்³தே³ஸவண்ணனா நிட்டி²தா.
Akappiyamaṃsaniddesavaṇṇanā niṭṭhitā.
