| Library / Tipiṭaka / ತಿಪಿಟಕ • Tipiṭaka / ಮಿಲಿನ್ದಪಞ್ಹಪಾಳಿ • Milindapañhapāḷi |
೧೦. ಅಜಗರಙ್ಗಪಞ್ಹೋ
10. Ajagaraṅgapañho
೧೦. ‘‘ಭನ್ತೇ ನಾಗಸೇನ, ‘ಅಜಗರಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಅಜಗರೋ ಮಹತಿಮಹಾಕಾಯೋ ಬಹೂಪಿ ದಿವಸೇ ಊನೂದರೋ ದೀನತರೋ ಕುಚ್ಛಿಪೂರಂ ಆಹಾರಂ ನ ಲಭತಿ, ಅಪರಿಪುಣ್ಣೋ ಯೇವ ಯಾವದೇವ ಸರೀರಯಾಪನಮತ್ತಕೇನ ಯಾಪೇತಿ, ಏವಮೇವ ಖೋ, ಮಹಾರಾಜ, ಯೋಗಿನೋ ಯೋಗಾವಚರಸ್ಸ ಭಿಕ್ಖಾಚರಿಯಪ್ಪಸುತಸ್ಸ ಪರಪಿಣ್ಡಮುಪಗತಸ್ಸ ಪರದಿನ್ನಪ್ಪಾಟಿಕಙ್ಖಿಸ್ಸ ಸಯಂಗಾಹಪ್ಪಟಿವಿರತಸ್ಸ ದುಲ್ಲಭಂ ಉದರಪರಿಪೂರಂ ಆಹಾರಂ, ಅಪಿ ಚ ಅತ್ಥವಸಿಕೇನ ಕುಲಪುತ್ತೇನ ಚತ್ತಾರೋ ಪಞ್ಚ ಆಲೋಪೇ ಅಭುಞ್ಜಿತ್ವಾ ಅವಸೇಸಂ ಉದಕೇನ ಪರಿಪೂರೇತಬ್ಬಂ। ಇದಂ, ಮಹಾರಾಜ, ಅಜಗರಸ್ಸ ಏಕಂ ಅಙ್ಗಂ ಗಹೇತಬ್ಬಂ। ಭಾಸಿತಮ್ಪೇತಂ, ಮಹಾರಾಜ, ಥೇರೇನ ಸಾರಿಪುತ್ತೇನ ಧಮ್ಮಸೇನಾಪತಿನಾ –
10. ‘‘Bhante nāgasena, ‘ajagarassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, ajagaro mahatimahākāyo bahūpi divase ūnūdaro dīnataro kucchipūraṃ āhāraṃ na labhati, aparipuṇṇo yeva yāvadeva sarīrayāpanamattakena yāpeti, evameva kho, mahārāja, yogino yogāvacarassa bhikkhācariyappasutassa parapiṇḍamupagatassa paradinnappāṭikaṅkhissa sayaṃgāhappaṭiviratassa dullabhaṃ udaraparipūraṃ āhāraṃ, api ca atthavasikena kulaputtena cattāro pañca ālope abhuñjitvā avasesaṃ udakena paripūretabbaṃ. Idaṃ, mahārāja, ajagarassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ಅಲ್ಲಂ ಸುಕ್ಖಂ ವಾ ಭುಞ್ಜನ್ತೋ, ನ ಬಾಳ್ಹಂ ಸುಹಿತೋ ಸಿಯಾ।
‘‘‘Allaṃ sukkhaṃ vā bhuñjanto, na bāḷhaṃ suhito siyā;
ಊನೂದರೋ ಮಿತಾಹಾರೋ, ಸತೋ ಭಿಕ್ಖು ಪರಿಬ್ಬಜೇ॥
Ūnūdaro mitāhāro, sato bhikkhu paribbaje.
‘‘‘ಚತ್ತಾರೋ ಪಞ್ಚ ಆಲೋಪೇ, ಅಭುತ್ವಾ ಉದಕಂ ಪಿವೇ।
‘‘‘Cattāro pañca ālope, abhutvā udakaṃ pive;
ಅಲಂ ಫಾಸು ವಿಹಾರಾಯ, ಪಹಿತತ್ತಸ್ಸ ಭಿಕ್ಖುನೋ’’’ತಿ॥
Alaṃ phāsu vihārāya, pahitattassa bhikkhuno’’’ti.
ಅಜಗರಙ್ಗಪಞ್ಹೋ ದಸಮೋ।
Ajagaraṅgapañho dasamo.
ಸೀಹವಗ್ಗೋ ಪಞ್ಚಮೋ।
Sīhavaggo pañcamo.
ತಸ್ಸುದ್ದಾನಂ –
Tassuddānaṃ –
ಕೇಸರೀ ಚಕ್ಕವಾಕೋ ಚ, ಪೇಣಾಹಿ ಘರಕಪೋತಕೋ।
Kesarī cakkavāko ca, peṇāhi gharakapotako;
ಉಲೂಕೋ ಸತಪತ್ತೋ ಚ, ವಗ್ಗುಲಿ ಚ ಜಲೂಪಿಕಾ।
Ulūko satapatto ca, vagguli ca jalūpikā;
ಸಪ್ಪೋ ಅಜಗರೋ ಚೇವ, ವಗ್ಗೋ ತೇನ ಪವುಚ್ಚತೀತಿ॥
Sappo ajagaro ceva, vaggo tena pavuccatīti.
