| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[365] 5. அஹிதுண்டி³கஜாதகவண்ணனா
[365] 5. Ahituṇḍikajātakavaṇṇanā
து⁴த்தொம்ஹீதி இத³ங் ஸத்தா² ஜேதவனே விஹரந்தோ ஏகங் மஹல்லகபி⁴க்கு²ங் ஆரப்³ப⁴ கதே²ஸி. வத்து² ஹெட்டா² ஸாலூகஜாதகே (ஜா॰ 1.3.106 ஆத³யோ) வித்தா²ரிதங். இதா⁴பி ஸோ மஹல்லகோ ஏகங் கா³மதா³ரகங் பப்³பா³ஜெத்வா அக்கோஸதி பஹரதி. தா³ரகோ பலாயித்வா விப்³ப⁴மி. து³தியம்பி நங் பப்³பா³ஜெத்வா ததே²வாகாஸி. து³தியம்பி விப்³ப⁴மித்வா புன யாசியமானோ ஓலோகேதும்பி ந இச்சி². பி⁴க்கூ² த⁴ம்மஸபா⁴யங் கத²ங் ஸமுட்டா²பேஸுங் ‘‘ஆவுஸோ, அஸுகோ நாம மஹல்லகோ அத்தனோ ஸாமணேரேன ஸஹாபி வினாபி வத்திதுங் ந ஸக்கோதி, இதரோ தஸ்ஸ தோ³ஸங் தி³ஸ்வா புன ஓலோகேதும்பி ந இச்சி², ஸுஹத³யோ குமாரகோ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவ, புப்³பே³பேஸ ஸாமணேரோ ஸுஹத³யோவ, ஸகிங் தோ³ஸங் தி³ஸ்வா புன ஓலோகேதும்பி ந இச்சீ²’’தி வத்வா அதீதங் ஆஹரி.
Dhuttomhīti idaṃ satthā jetavane viharanto ekaṃ mahallakabhikkhuṃ ārabbha kathesi. Vatthu heṭṭhā sālūkajātake (jā. 1.3.106 ādayo) vitthāritaṃ. Idhāpi so mahallako ekaṃ gāmadārakaṃ pabbājetvā akkosati paharati. Dārako palāyitvā vibbhami. Dutiyampi naṃ pabbājetvā tathevākāsi. Dutiyampi vibbhamitvā puna yāciyamāno oloketumpi na icchi. Bhikkhū dhammasabhāyaṃ kathaṃ samuṭṭhāpesuṃ ‘‘āvuso, asuko nāma mahallako attano sāmaṇerena sahāpi vināpi vattituṃ na sakkoti, itaro tassa dosaṃ disvā puna oloketumpi na icchi, suhadayo kumārako’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva, pubbepesa sāmaṇero suhadayova, sakiṃ dosaṃ disvā puna oloketumpi na icchī’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ த⁴ஞ்ஞவாணிஜகுலே நிப்³ப³த்தித்வா வயப்பத்தோ த⁴ஞ்ஞவிக்கயேன ஜீவிகங் கப்பேஸி. அதே²கோ அஹிதுண்டி³கோ மக்கடங் க³ஹெத்வா ஸிக்கா²பெத்வா அஹிங் கீளாபெந்தோ பா³ராணஸியங் உஸ்ஸவே கு⁴ட்டே² தங் மக்கடங் த⁴ஞ்ஞவாணிஜகஸ்ஸ ஸந்திகே ட²பெத்வா அஹிங் கீளாபெந்தோ ஸத்த தி³வஸானி விசரி. ஸோபி வாணிஜோ மக்கடஸ்ஸ கா²த³னீயங் போ⁴ஜனீயங் அதா³ஸி. அஹிதுண்டி³கோ ஸத்தமே தி³வஸே உஸ்ஸவகீளனதோ ஆக³ந்த்வா தங் மக்கடங் வேளுபேஸிகாய திக்க²த்துங் பஹரித்வா தங் ஆதா³ய உய்யானங் க³ந்த்வா ப³ந்தி⁴த்வா நித்³த³ங் ஓக்கமி. மக்கடோ ப³ந்த⁴னங் மோசெத்வா அம்ப³ருக்க²ங் ஆருய்ஹ அம்பா³னி கா²த³ந்தோ நிஸீதி³. ஸோ பபு³த்³தோ⁴ ருக்கே² மக்கடங் தி³ஸ்வா ‘‘ஏதங் மயா உபலாபெத்வா க³ஹேதுங் வட்டதீ’’தி தேன ஸத்³தி⁴ங் ஸல்லபந்தோ பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto dhaññavāṇijakule nibbattitvā vayappatto dhaññavikkayena jīvikaṃ kappesi. Atheko ahituṇḍiko makkaṭaṃ gahetvā sikkhāpetvā ahiṃ kīḷāpento bārāṇasiyaṃ ussave ghuṭṭhe taṃ makkaṭaṃ dhaññavāṇijakassa santike ṭhapetvā ahiṃ kīḷāpento satta divasāni vicari. Sopi vāṇijo makkaṭassa khādanīyaṃ bhojanīyaṃ adāsi. Ahituṇḍiko sattame divase ussavakīḷanato āgantvā taṃ makkaṭaṃ veḷupesikāya tikkhattuṃ paharitvā taṃ ādāya uyyānaṃ gantvā bandhitvā niddaṃ okkami. Makkaṭo bandhanaṃ mocetvā ambarukkhaṃ āruyha ambāni khādanto nisīdi. So pabuddho rukkhe makkaṭaṃ disvā ‘‘etaṃ mayā upalāpetvā gahetuṃ vaṭṭatī’’ti tena saddhiṃ sallapanto paṭhamaṃ gāthamāha –
80.
80.
‘‘து⁴த்தொம்ஹி ஸம்ம ஸுமுக², ஜூதே அக்க²பராஜிதோ;
‘‘Dhuttomhi samma sumukha, jūte akkhaparājito;
ஹரேஹி அம்ப³பக்கானி, வீரியங் தே ப⁴க்க²யாமஸே’’தி.
Harehi ambapakkāni, vīriyaṃ te bhakkhayāmase’’ti.
தத்த² அக்க²பராஜிதோதி அக்கே²ஹி பராஜிதோ. ஹரேஹீதி பாதேஹி. அயமேவ வா பாடோ².
Tattha akkhaparājitoti akkhehi parājito. Harehīti pātehi. Ayameva vā pāṭho.
தங் ஸுத்வா மக்கடோ ஸேஸகா³தா² அபா⁴ஸி –
Taṃ sutvā makkaṭo sesagāthā abhāsi –
81.
81.
‘‘அலிகங் வத மங் ஸம்ம, அபூ⁴தேன பஸங்ஸஸி;
‘‘Alikaṃ vata maṃ samma, abhūtena pasaṃsasi;
கோ தே ஸுதோ வா தி³ட்டோ² வா, ஸுமுகோ² நாம மக்கடோ.
Ko te suto vā diṭṭho vā, sumukho nāma makkaṭo.
82.
82.
‘‘அஜ்ஜாபி மே தங் மனஸி, யங் மங் த்வங் அஹிதுண்டி³க;
‘‘Ajjāpi me taṃ manasi, yaṃ maṃ tvaṃ ahituṇḍika;
த⁴ஞ்ஞாபணங் பவிஸித்வா, மத்தோ சா²தங் ஹனாஸி மங்.
Dhaññāpaṇaṃ pavisitvā, matto chātaṃ hanāsi maṃ.
83.
83.
‘‘தாஹங் ஸரங் து³க்க²ஸெய்யங், அபி ரஜ்ஜம்பி காரயே;
‘‘Tāhaṃ saraṃ dukkhaseyyaṃ, api rajjampi kāraye;
நேவாஹங் யாசிதோ த³ஜ்ஜங், ததா² ஹி ப⁴யதஜ்ஜிதோ.
Nevāhaṃ yācito dajjaṃ, tathā hi bhayatajjito.
84.
84.
‘‘யஞ்ச ஜஞ்ஞா குலே ஜாதங், க³ப்³பே⁴ தித்தங் அமச்ச²ரிங்;
‘‘Yañca jaññā kule jātaṃ, gabbhe tittaṃ amacchariṃ;
தேன ஸகி²ஞ்ச மித்தஞ்ச, தீ⁴ரோ ஸந்தா⁴துமரஹதீ’’தி.
Tena sakhiñca mittañca, dhīro sandhātumarahatī’’ti.
தத்த² அலிகங் வதாதி முஸா வத. அபூ⁴தேனாதி அவிஜ்ஜமானேன. கோ தேதி க்வ தயா. ஸுமுகோ²தி ஸுந்த³ரமுகோ². அஹிதுண்டி³காதி தங் ஆலபதி. ‘‘அஹிகொண்டி³கா’’திபி பாடோ². சா²தந்தி ஜிக⁴ச்சா²பி⁴பூ⁴தங் து³ப்³ப³லங் கபணங். ஹனாஸீதி வேளுபேஸிகாய திக்க²த்துங் பஹரஸி. தாஹந்தி தங் அஹங். ஸரந்தி ஸரந்தோ. து³க்க²ஸெய்யந்தி தஸ்மிங் ஆபணே து³க்க²ஸயனங். அபி ரஜ்ஜம்பி காரயேதி ஸசேபி பா³ராணஸிரஜ்ஜங் க³ஹெத்வா மய்ஹங் த³த்வா மங் ரஜ்ஜங் காரெய்யாஸி, ஏவம்பி தங் நேவாஹங் யாசிதோ த³ஜ்ஜங், தங் ஏகம்பி அம்ப³பக்கங் அஹங் தயா யாசிதோ ந த³தெ³ய்யங். கிங்காரணா? ததா² ஹி ப⁴யதஜ்ஜிதோதி, ததா² ஹி அஹங் தயா ப⁴யேன தஜ்ஜிதோதி அத்தோ².
Tattha alikaṃ vatāti musā vata. Abhūtenāti avijjamānena. Ko teti kva tayā. Sumukhoti sundaramukho. Ahituṇḍikāti taṃ ālapati. ‘‘Ahikoṇḍikā’’tipi pāṭho. Chātanti jighacchābhibhūtaṃ dubbalaṃ kapaṇaṃ. Hanāsīti veḷupesikāya tikkhattuṃ paharasi. Tāhanti taṃ ahaṃ. Saranti saranto. Dukkhaseyyanti tasmiṃ āpaṇe dukkhasayanaṃ. Api rajjampi kārayeti sacepi bārāṇasirajjaṃ gahetvā mayhaṃ datvā maṃ rajjaṃ kāreyyāsi, evampi taṃ nevāhaṃ yācito dajjaṃ, taṃ ekampi ambapakkaṃ ahaṃ tayā yācito na dadeyyaṃ. Kiṃkāraṇā? Tathā hi bhayatajjitoti, tathā hi ahaṃ tayā bhayena tajjitoti attho.
க³ப்³பே⁴ தித்தந்தி ஸுபோ⁴ஜனரஸேன மாதுகுச்சி²யங்யேவ அலங்கதபடியத்தே ஸயனக³ப்³பே⁴யேவ வா தித்தங் போ⁴கா³ஸாய அகபணங். ஸகி²ஞ்ச மித்தஞ்சாதி ஸகி²பா⁴வஞ்ச மித்தபா⁴வஞ்ச ததா²ரூபேன குலஜாதேன தித்தேன அகபணேன அமச்ச²ரினா ஸத்³தி⁴ங் பண்டி³தோ ஸந்தா⁴துங் புன க⁴டேதுங் அரஹதி, தயா பன கபணேன அஹிதுண்டி³கேன ஸத்³தி⁴ங் கோ மித்தபா⁴வங் புன க⁴டேதுந்தி அத்தோ². ஏவஞ்ச பன வத்வா வானரோ வனங் ஸஹஸா பாவிஸி.
Gabbhe tittanti subhojanarasena mātukucchiyaṃyeva alaṅkatapaṭiyatte sayanagabbheyeva vā tittaṃ bhogāsāya akapaṇaṃ. Sakhiñca mittañcāti sakhibhāvañca mittabhāvañca tathārūpena kulajātena tittena akapaṇena amaccharinā saddhiṃ paṇḍito sandhātuṃ puna ghaṭetuṃ arahati, tayā pana kapaṇena ahituṇḍikena saddhiṃ ko mittabhāvaṃ puna ghaṭetunti attho. Evañca pana vatvā vānaro vanaṃ sahasā pāvisi.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ அஹிதுண்டி³கோ மஹல்லகோ அஹோஸி, மக்கடோ ஸாமணேரோ, த⁴ஞ்ஞவாணிஜோ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā ahituṇḍiko mahallako ahosi, makkaṭo sāmaṇero, dhaññavāṇijo pana ahameva ahosi’’nti.
அஹிதுண்டி³கஜாதகவண்ணனா பஞ்சமா.
Ahituṇḍikajātakavaṇṇanā pañcamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 365. அஹிதுண்டி³கஜாதகங் • 365. Ahituṇḍikajātakaṃ
