| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. အဟိံသကသုတ္တံ
5. Ahiṃsakasuttaṃ
၁၉၁. သာဝတ္ထိနိဒာနံ။ အထ ခော အဟိံသကဘာရဒ္ဝာဇော ဗ္ရာဟ္မဏော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝတာ သဒ္ဓိံ သမ္မောဒိ။ သမ္မောဒနီယံ ကထံ သာရဏီယံ ဝီတိသာရေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော အဟိံသကဘာရဒ္ဝာဇော ဗ္ရာဟ္မဏော ဘဂဝန္တံ ဧတဒဝောစ – ‘‘အဟိံသကာဟံ, ဘော ဂောတမ, အဟိံသကာဟံ, ဘော ဂောတမာ’’တိ။
191. Sāvatthinidānaṃ. Atha kho ahiṃsakabhāradvājo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho ahiṃsakabhāradvājo brāhmaṇo bhagavantaṃ etadavoca – ‘‘ahiṃsakāhaṃ, bho gotama, ahiṃsakāhaṃ, bho gotamā’’ti.
‘‘ယထာ နာမံ တထာ စသ္သ၊ သိယာ ခော တ္ဝံ အဟိံသကော။
‘‘Yathā nāmaṃ tathā cassa, siyā kho tvaṃ ahiṃsako;
ယော စ ကာယေန ဝာစာယ၊ မနသာ စ န ဟိံသတိ။
Yo ca kāyena vācāya, manasā ca na hiṃsati;
သ ဝေ အဟိံသကော ဟောတိ၊ ယော ပရံ န ဝိဟိံသတီ’’တိ။
Sa ve ahiṃsako hoti, yo paraṃ na vihiṃsatī’’ti.
ဧဝံ ဝုတ္တေ, အဟိံသကဘာရဒ္ဝာဇော ဗ္ရာဟ္မဏော ဘဂဝန္တံ ဧတဒဝောစ – ‘‘အဘိက္ကန္တံ, ဘော ဂောတမ။ပေ.။ အဗ္ဘညာသိ။ အညတရော စ ပနာယသ္မာ အဟိံသကဘာရဒ္ဝာဇော အရဟတံ အဟောသီ’’တိ။
Evaṃ vutte, ahiṃsakabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… abbhaññāsi. Aññataro ca panāyasmā ahiṃsakabhāradvājo arahataṃ ahosī’’ti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. အဟိံသကသုတ္တဝဏ္ဏနာ • 5. Ahiṃsakasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. အဟိံသကသုတ္တဝဏ္ဏနာ • 5. Ahiṃsakasuttavaṇṇanā
