| Library / Tipiṭaka / တိပိဋက • Tipiṭaka / ပဉ္စပကရဏ-အနုဋီကာ • Pañcapakaraṇa-anuṭīkā |
၁၅. အာဟာရပစ္စယနိဒ္ဒေသဝဏ္ဏနာ
15. Āhārapaccayaniddesavaṇṇanā
၁၅. ကေဝလာယ ဩဇာယ အဇ္ဈောဟရဏသ္သ အဘာဝာ ‘‘အသိတပီတာဒိဝတ္ထူဟိ သဟ အဇ္ဈောဟရိတောဝာ’’တိ ဝုတ္တံ။ ခာဒနီယဘောဇနီယပ္ပဘေဒေ အသိတေ တာဝ ကဗဠီကာရတာ ဟောတု, ပာတဗ္ဗာဒိကေ ပန ကထန္တိ အာဟ ‘‘ပာတဗ္ဗ။ပေ.။ ဟောန္တီ’’တိ။ ယေဘုယ္ယဝသေန ဝာ ဧဝံ ဝုတ္တန္တိ ဝေဒိတဗ္ဗံ။
15. Kevalāya ojāya ajjhoharaṇassa abhāvā ‘‘asitapītādivatthūhi saha ajjhoharitovā’’ti vuttaṃ. Khādanīyabhojanīyappabhede asite tāva kabaḷīkāratā hotu, pātabbādike pana kathanti āha ‘‘pātabba…pe… hontī’’ti. Yebhuyyavasena vā evaṃ vuttanti veditabbaṃ.
အနုပာလကောတိ ဥပတ္ထမ္ဘကော။ စိတ္တသမုဋ္ဌာနသ္သ ကာယသ္သ အာဟာရပစ္စယဘာဝော ကဗဠီကာရာဟာရသ္သ ဝိစာရေတ္ဝာ ဂဟေတဗ္ဗော။ ကသ္မာတိ စေ? ဧတ္ထ ကာရဏမာဟ ‘‘န ဟီ’’တိအာဒိနာ။ သတိ ဟိ ပစ္စယဘာဝေ ‘‘စိတ္တသမုဋ္ဌာနော ကဗဠီကာရာဟာရော စိတ္တသမုဋ္ဌာနသ္သ ကာယသ္သ အာဟာရပစ္စယေန ပစ္စယော’’တိအာဒိ ဝတ္တဗ္ဗံ သိယာ, န ပန ဝုတ္တံ, နောစိတ္တသမုဋ္ဌာနသ္သ ပန ဝုတ္တံ။ တေနာဟ ‘‘တိဝိဓောပိ။ပေ.။ ဝုတ္တော’’တိ။
Anupālakoti upatthambhako. Cittasamuṭṭhānassa kāyassa āhārapaccayabhāvo kabaḷīkārāhārassa vicāretvā gahetabbo. Kasmāti ce? Ettha kāraṇamāha ‘‘na hī’’tiādinā. Sati hi paccayabhāve ‘‘cittasamuṭṭhāno kabaḷīkārāhāro cittasamuṭṭhānassa kāyassa āhārapaccayena paccayo’’tiādi vattabbaṃ siyā, na pana vuttaṃ, nocittasamuṭṭhānassa pana vuttaṃ. Tenāha ‘‘tividhopi…pe… vutto’’ti.
အာဟာရပစ္စယနိဒ္ဒေသဝဏ္ဏနာ နိဋ္ဌိတာ။
Āhārapaccayaniddesavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ပဋ္ဌာနပာဠိ • Paṭṭhānapāḷi / (၂) ပစ္စယနိဒ္ဒေသော • (2) Paccayaniddeso
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁၅. အာဟာရပစ္စယနိဒ္ဒေသဝဏ္ဏနာ • 15. Āhārapaccayaniddesavaṇṇanā
