| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. အာဃာတပဋိဝိနယသုတ္တံ
10. Āghātapaṭivinayasuttaṃ
၈၀. ‘‘ဒသယိမေ , ဘိက္ခဝေ, အာဃာတပဋိဝိနယာ။ ကတမေ ဒသ? ‘အနတ္ထံ မေ အစရိ, တံ ကုတေတ္ထ လဗ္ဘာ’တိ အာဃာတံ ပဋိဝိနေတိ , ‘အနတ္ထံ မေ စရတိ, တံ ကုတေတ္ထ လဗ္ဘာ’တိ အာဃာတံ ပဋိဝိနေတိ, ‘အနတ္ထံ မေ စရိသ္သတိ, တံ ကုတေတ္ထ လဗ္ဘာ’တိ အာဃာတံ ပဋိဝိနေတိ, ပိယသ္သ မေ မနာပသ္သ အနတ္ထံ အစရိ။ပေ.။ စရတိ။ပေ.။ စရိသ္သတိ, တံ ကုတေတ္ထ လဗ္ဘာတိ အာဃာတံ ပဋိဝိနေတိ , အပ္ပိယသ္သ မေ အမနာပသ္သ အတ္ထံ အစရိ။ပေ.။ အတ္ထံ စရတိ။ပေ.။ အတ္ထံ စရိသ္သတိ, တံ ကုတေတ္ထ လဗ္ဘာတိ အာဃာတံ ပဋိဝိနေတိ, အဋ္ဌာနေ စ န ကုပ္ပတိ – ဣမေ ခော, ဘိက္ခဝေ, ဒသ အာဃာတပဋိဝိနယာ’’တိ။ ဒသမံ။
80. ‘‘Dasayime , bhikkhave, āghātapaṭivinayā. Katame dasa? ‘Anatthaṃ me acari, taṃ kutettha labbhā’ti āghātaṃ paṭivineti , ‘anatthaṃ me carati, taṃ kutettha labbhā’ti āghātaṃ paṭivineti, ‘anatthaṃ me carissati, taṃ kutettha labbhā’ti āghātaṃ paṭivineti, piyassa me manāpassa anatthaṃ acari…pe… carati…pe… carissati, taṃ kutettha labbhāti āghātaṃ paṭivineti , appiyassa me amanāpassa atthaṃ acari…pe… atthaṃ carati…pe… atthaṃ carissati, taṃ kutettha labbhāti āghātaṃ paṭivineti, aṭṭhāne ca na kuppati – ime kho, bhikkhave, dasa āghātapaṭivinayā’’ti. Dasamaṃ.
အာကင္ခဝဂ္ဂော တတိယော။
Ākaṅkhavaggo tatiyo.
တသ္သုဒ္ဒာနံ –
Tassuddānaṃ –
အာကင္ခော ကဏ္ဋကော ဣဋ္ဌာ၊ ဝဍ္ဎိ စ မိဂသာလာယ။
Ākaṅkho kaṇṭako iṭṭhā, vaḍḍhi ca migasālāya;
တယော ဓမ္မာ စ ကာကော စ၊ နိဂဏ္ဌာ ဒ္ဝေ စ အာဃာတာတိ။
Tayo dhammā ca kāko ca, nigaṇṭhā dve ca āghātāti.
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅-၁၀. မိဂသာလာသုတ္တာဒိဝဏ္ဏနာ • 5-10. Migasālāsuttādivaṇṇanā
