| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. អឃមូលសុត្តំ
10. Aghamūlasuttaṃ
៣១. សាវត្ថិនិទានំ។ ‘‘អឃញ្ច, ភិក្ខវេ, ទេសេស្សាមិ អឃមូលញ្ច។ តំ សុណាថ។ កតមញ្ច ភិក្ខវេ អឃំ? រូបំ, ភិក្ខវេ, អឃំ, វេទនា អឃំ, សញ្ញា អឃំ, សង្ខារា អឃំ, វិញ្ញាណំ អឃំ។ ឥទំ វុច្ចតិ, ភិក្ខវេ, អឃំ។ កតមញ្ច, ភិក្ខវេ, អឃមូលំ? យាយំ តណ្ហា បោនោភវិកា នន្ទីរាគសហគតា 1 តត្រតត្រាភិនន្ទិនី; សេយ្យថិទំ – កាមតណ្ហា, ភវតណ្ហា, វិភវតណ្ហា។ ឥទំ វុច្ចតិ, ភិក្ខវេ, អឃមូល’’ន្តិ។ ទសមំ។
31. Sāvatthinidānaṃ. ‘‘Aghañca, bhikkhave, desessāmi aghamūlañca. Taṃ suṇātha. Katamañca bhikkhave aghaṃ? Rūpaṃ, bhikkhave, aghaṃ, vedanā aghaṃ, saññā aghaṃ, saṅkhārā aghaṃ, viññāṇaṃ aghaṃ. Idaṃ vuccati, bhikkhave, aghaṃ. Katamañca, bhikkhave, aghamūlaṃ? Yāyaṃ taṇhā ponobhavikā nandīrāgasahagatā 2 tatratatrābhinandinī; seyyathidaṃ – kāmataṇhā, bhavataṇhā, vibhavataṇhā. Idaṃ vuccati, bhikkhave, aghamūla’’nti. Dasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. អឃមូលសុត្តវណ្ណនា • 10. Aghamūlasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. អឃមូលសុត្តវណ្ណនា • 10. Aghamūlasuttavaṇṇanā
