| Library / Tipiṭaka / තිපිටක • Tipiṭaka / ඉතිවුත්තකපාළි • Itivuttakapāḷi |
4. අග්ගිසුත්තං
4. Aggisuttaṃ
93. වුත්තඤ්හෙතං භගවතා, වුත්තමරහතාති මෙ සුතං –
93. Vuttañhetaṃ bhagavatā, vuttamarahatāti me sutaṃ –
‘‘තයොමෙ, භික්ඛවෙ, අග්ගී. කතමෙ තයො? රාගග්ගි, දොසග්ගි, මොහග්ගි – ඉමෙ ඛො, භික්ඛවෙ, තයො අග්ගී’’ති. එතමත්ථං භගවා අවොච. තත්ථෙතං ඉති වුච්චති –
‘‘Tayome, bhikkhave, aggī. Katame tayo? Rāgaggi, dosaggi, mohaggi – ime kho, bhikkhave, tayo aggī’’ti. Etamatthaṃ bhagavā avoca. Tatthetaṃ iti vuccati –
‘‘රාගග්ගි දහති මච්චෙ, රත්තෙ කාමෙසු මුච්ඡිතෙ;
‘‘Rāgaggi dahati macce, ratte kāmesu mucchite;
දොසග්ගි පන බ්යාපන්නෙ, නරෙ පාණාතිපාතිනො.
Dosaggi pana byāpanne, nare pāṇātipātino.
‘‘මොහග්ගි පන සම්මූළ්හෙ, අරියධම්මෙ අකොවිදෙ;
‘‘Mohaggi pana sammūḷhe, ariyadhamme akovide;
එතෙ අග්ගී අජානන්තා, සක්කායාභිරතා පජා.
Ete aggī ajānantā, sakkāyābhiratā pajā.
‘‘තෙ වඩ්ඪයන්ති නිරයං, තිරච්ඡානඤ්ච යොනියො;
‘‘Te vaḍḍhayanti nirayaṃ, tiracchānañca yoniyo;
අසුරං පෙත්තිවිසයං, අමුත්තා මාරබන්ධනා.
Asuraṃ pettivisayaṃ, amuttā mārabandhanā.
‘‘යෙ ච රත්තින්දිවා යුත්තා, සම්මාසම්බුද්ධසාසනෙ;
‘‘Ye ca rattindivā yuttā, sammāsambuddhasāsane;
තෙ නිබ්බාපෙන්ති රාගග්ගිං, නිච්චං අසුභසඤ්ඤිනො.
Te nibbāpenti rāgaggiṃ, niccaṃ asubhasaññino.
‘‘දොසග්ගිං පන මෙත්තාය, නිබ්බාපෙන්ති නරුත්තමා;
‘‘Dosaggiṃ pana mettāya, nibbāpenti naruttamā;
මොහග්ගිං පන පඤ්ඤාය, යායං නිබ්බෙධගාමිනී.
Mohaggiṃ pana paññāya, yāyaṃ nibbedhagāminī.
‘‘තෙ නිබ්බාපෙත්වා නිපකා, රත්තින්දිවමතන්දිතා;
‘‘Te nibbāpetvā nipakā, rattindivamatanditā;
අසෙසං පරිනිබ්බන්ති, අසෙසං දුක්ඛමච්චගුං.
Asesaṃ parinibbanti, asesaṃ dukkhamaccaguṃ.
‘‘අරියද්දසා වෙදගුනො, සම්මදඤ්ඤාය පණ්ඩිතා;
‘‘Ariyaddasā vedaguno, sammadaññāya paṇḍitā;
ජාතික්ඛයමභිඤ්ඤාය, නාගච්ඡන්ති පුනබ්භව’’න්ති.
Jātikkhayamabhiññāya, nāgacchanti punabbhava’’nti.
අයම්පි අත්ථො වුත්තො භගවතා, ඉති මෙ සුතන්ති. චතුත්ථං.
Ayampi attho vutto bhagavatā, iti me sutanti. Catutthaṃ.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ඉතිවුත්තක-අට්ඨකථා • Itivuttaka-aṭṭhakathā / 4. අග්ගිසුත්තවණ්ණනා • 4. Aggisuttavaṇṇanā
