| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៨. អគ្គិកសុត្តំ
8. Aggikasuttaṃ
១៩៤. ឯកំ សមយំ ភគវា រាជគហេ វិហរតិ វេឡុវនេ កលន្ទកនិវាបេ។ តេន ខោ បន សមយេន អគ្គិកភារទ្វាជស្ស ព្រាហ្មណស្ស សប្បិនា បាយសោ សន្និហិតោ ហោតិ – ‘‘អគ្គិំ ជុហិស្សាមិ, អគ្គិហុត្តំ បរិចរិស្សាមី’’តិ។
194. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena aggikabhāradvājassa brāhmaṇassa sappinā pāyaso sannihito hoti – ‘‘aggiṃ juhissāmi, aggihuttaṃ paricarissāmī’’ti.
អថ ខោ ភគវា បុព្ពណ្ហសមយំ និវាសេត្វា បត្តចីវរមាទាយ រាជគហំ បិណ្ឌាយ បាវិសិ។ រាជគហេ សបទានំ បិណ្ឌាយ ចរមានោ យេន អគ្គិកភារទ្វាជស្ស ព្រាហ្មណស្ស និវេសនំ តេនុបសង្កមិ ; ឧបសង្កមិត្វា ឯកមន្តំ អដ្ឋាសិ។ អទ្ទសា ខោ អគ្គិកភារទ្វាជោ ព្រាហ្មណោ ភគវន្តំ បិណ្ឌាយ ឋិតំ។ ទិស្វាន ភគវន្តំ គាថាយ អជ្ឈភាសិ –
Atha kho bhagavā pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi. Rājagahe sapadānaṃ piṇḍāya caramāno yena aggikabhāradvājassa brāhmaṇassa nivesanaṃ tenupasaṅkami ; upasaṅkamitvā ekamantaṃ aṭṭhāsi. Addasā kho aggikabhāradvājo brāhmaṇo bhagavantaṃ piṇḍāya ṭhitaṃ. Disvāna bhagavantaṃ gāthāya ajjhabhāsi –
‘‘តីហិ វិជ្ជាហិ សម្បន្នោ, ជាតិមា សុតវា ពហូ;
‘‘Tīhi vijjāhi sampanno, jātimā sutavā bahū;
វិជ្ជាចរណសម្បន្នោ, សោមំ ភុញ្ជេយ្យ បាយស’’ន្តិ។
Vijjācaraṇasampanno, somaṃ bhuñjeyya pāyasa’’nti.
‘‘ពហុម្បិ បលបំ ជប្បំ, ន ជច្ចា ហោតិ ព្រាហ្មណោ;
‘‘Bahumpi palapaṃ jappaṃ, na jaccā hoti brāhmaṇo;
អន្តោកសម្ពុ សំកិលិដ្ឋោ, កុហនាបរិវារិតោ។
Antokasambu saṃkiliṭṭho, kuhanāparivārito.
‘‘បុព្ពេនិវាសំ យោ វេទី, សគ្គាបាយញ្ច បស្សតិ;
‘‘Pubbenivāsaṃ yo vedī, saggāpāyañca passati;
អថោ ជាតិក្ខយំ បត្តោ, អភិញ្ញាវោសិតោ មុនិ។
Atho jātikkhayaṃ patto, abhiññāvosito muni.
‘‘ឯតាហិ តីហិ វិជ្ជាហិ, តេវិជ្ជោ ហោតិ ព្រាហ្មណោ;
‘‘Etāhi tīhi vijjāhi, tevijjo hoti brāhmaṇo;
វិជ្ជាចរណសម្បន្នោ, សោមំ ភុញ្ជេយ្យ បាយស’’ន្តិ។
Vijjācaraṇasampanno, somaṃ bhuñjeyya pāyasa’’nti.
‘‘ភុញ្ជតុ ភវំ គោតមោ។ ព្រាហ្មណោ ភវ’’ន្តិ។
‘‘Bhuñjatu bhavaṃ gotamo. Brāhmaṇo bhava’’nti.
‘‘គាថាភិគីតំ មេ អភោជនេយ្យំ,
‘‘Gāthābhigītaṃ me abhojaneyyaṃ,
សម្បស្សតំ ព្រាហ្មណ នេស ធម្មោ;
Sampassataṃ brāhmaṇa nesa dhammo;
គាថាភិគីតំ បនុទន្តិ ពុទ្ធា,
Gāthābhigītaṃ panudanti buddhā,
ធម្មេ សតិ ព្រាហ្មណ វុត្តិរេសា។
Dhamme sati brāhmaṇa vuttiresā.
‘‘អញ្ញេន ច កេវលិនំ មហេសិំ,
‘‘Aññena ca kevalinaṃ mahesiṃ,
ខីណាសវំ កុក្កុច្ចវូបសន្តំ;
Khīṇāsavaṃ kukkuccavūpasantaṃ;
អន្នេន បានេន ឧបដ្ឋហស្សុ,
Annena pānena upaṭṭhahassu,
ខេត្តញ្ហិ តំ បុញ្ញបេក្ខស្ស ហោតី’’តិ។
Khettañhi taṃ puññapekkhassa hotī’’ti.
ឯវំ វុត្តេ, អគ្គិកភារទ្វាជោ ព្រាហ្មណោ ភគវន្តំ ឯតទវោច – ‘‘អភិក្កន្តំ, ភោ គោតម…បេ.… អញ្ញតរោ ច បនាយស្មា អគ្គិកភារទ្វាជោ អរហតំ អហោសី’’តិ។
Evaṃ vutte, aggikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… aññataro ca panāyasmā aggikabhāradvājo arahataṃ ahosī’’ti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. អគ្គិកសុត្តវណ្ណនា • 8. Aggikasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៨. អគ្គិកសុត្តវណ្ណនា • 8. Aggikasuttavaṇṇanā
