| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๘. อคฺคิกสุตฺตํ
8. Aggikasuttaṃ
๑๙๔. เอกํ สมยํ ภควา ราชคเห วิหรติ เวฬุวเน กลนฺทกนิวาเปฯ เตน โข ปน สมเยน อคฺคิกภารทฺวาชสฺส พฺราหฺมณสฺส สปฺปินา ปายโส สนฺนิหิโต โหติ – ‘‘อคฺคิํ ชุหิสฺสามิ, อคฺคิหุตฺตํ ปริจริสฺสามี’’ติฯ
194. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena aggikabhāradvājassa brāhmaṇassa sappinā pāyaso sannihito hoti – ‘‘aggiṃ juhissāmi, aggihuttaṃ paricarissāmī’’ti.
อถ โข ภควา ปุพฺพณฺหสมยํ นิวาเสตฺวา ปตฺตจีวรมาทาย ราชคหํ ปิณฺฑาย ปาวิสิฯ ราชคเห สปทานํ ปิณฺฑาย จรมาโน เยน อคฺคิกภารทฺวาชสฺส พฺราหฺมณสฺส นิเวสนํ เตนุปสงฺกมิ ; อุปสงฺกมิตฺวา เอกมนฺตํ อฎฺฐาสิฯ อทฺทสา โข อคฺคิกภารทฺวาโช พฺราหฺมโณ ภควนฺตํ ปิณฺฑาย ฐิตํฯ ทิสฺวาน ภควนฺตํ คาถาย อชฺฌภาสิ –
Atha kho bhagavā pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi. Rājagahe sapadānaṃ piṇḍāya caramāno yena aggikabhāradvājassa brāhmaṇassa nivesanaṃ tenupasaṅkami ; upasaṅkamitvā ekamantaṃ aṭṭhāsi. Addasā kho aggikabhāradvājo brāhmaṇo bhagavantaṃ piṇḍāya ṭhitaṃ. Disvāna bhagavantaṃ gāthāya ajjhabhāsi –
‘‘ตีหิ วิชฺชาหิ สมฺปโนฺน, ชาติมา สุตวา พหู;
‘‘Tīhi vijjāhi sampanno, jātimā sutavā bahū;
วิชฺชาจรณสมฺปโนฺน, โสมํ ภุเญฺชยฺย ปายส’’นฺติฯ
Vijjācaraṇasampanno, somaṃ bhuñjeyya pāyasa’’nti.
‘‘พหุมฺปิ ปลปํ ชปฺปํ, น ชจฺจา โหติ พฺราหฺมโณ;
‘‘Bahumpi palapaṃ jappaṃ, na jaccā hoti brāhmaṇo;
อโนฺตกสมฺพุ สํกิลิโฎฺฐ, กุหนาปริวาริโตฯ
Antokasambu saṃkiliṭṭho, kuhanāparivārito.
‘‘ปุเพฺพนิวาสํ โย เวที, สคฺคาปายญฺจ ปสฺสติ;
‘‘Pubbenivāsaṃ yo vedī, saggāpāyañca passati;
อโถ ชาติกฺขยํ ปโตฺต, อภิญฺญาโวสิโต มุนิฯ
Atho jātikkhayaṃ patto, abhiññāvosito muni.
‘‘เอตาหิ ตีหิ วิชฺชาหิ, เตวิโชฺช โหติ พฺราหฺมโณ;
‘‘Etāhi tīhi vijjāhi, tevijjo hoti brāhmaṇo;
วิชฺชาจรณสมฺปโนฺน, โสมํ ภุเญฺชยฺย ปายส’’นฺติฯ
Vijjācaraṇasampanno, somaṃ bhuñjeyya pāyasa’’nti.
‘‘ภุญฺชตุ ภวํ โคตโมฯ พฺราหฺมโณ ภว’’นฺติฯ
‘‘Bhuñjatu bhavaṃ gotamo. Brāhmaṇo bhava’’nti.
‘‘คาถาภิคีตํ เม อโภชเนยฺยํ,
‘‘Gāthābhigītaṃ me abhojaneyyaṃ,
สมฺปสฺสตํ พฺราหฺมณ เนส ธโมฺม;
Sampassataṃ brāhmaṇa nesa dhammo;
คาถาภิคีตํ ปนุทนฺติ พุทฺธา,
Gāthābhigītaṃ panudanti buddhā,
ธเมฺม สติ พฺราหฺมณ วุตฺติเรสาฯ
Dhamme sati brāhmaṇa vuttiresā.
‘‘อเญฺญน จ เกวลินํ มเหสิํ,
‘‘Aññena ca kevalinaṃ mahesiṃ,
ขีณาสวํ กุกฺกุจฺจวูปสนฺตํ;
Khīṇāsavaṃ kukkuccavūpasantaṃ;
อเนฺนน ปาเนน อุปฎฺฐหสฺสุ,
Annena pānena upaṭṭhahassu,
เขตฺตญฺหิ ตํ ปุญฺญเปกฺขสฺส โหตี’’ติฯ
Khettañhi taṃ puññapekkhassa hotī’’ti.
เอวํ วุเตฺต, อคฺคิกภารทฺวาโช พฺราหฺมโณ ภควนฺตํ เอตทโวจ – ‘‘อภิกฺกนฺตํ, โภ โคตม…เป.… อญฺญตโร จ ปนายสฺมา อคฺคิกภารทฺวาโช อรหตํ อโหสี’’ติฯ
Evaṃ vutte, aggikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… aññataro ca panāyasmā aggikabhāradvājo arahataṃ ahosī’’ti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๘. อคฺคิกสุตฺตวณฺณนา • 8. Aggikasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๘. อคฺคิกสุตฺตวณฺณนา • 8. Aggikasuttavaṇṇanā
