10. Aggapupphiyattheraapadānaṃ

37.

‘‘Suvaṇṇavaṇṇaṃ sambuddhaṃ, nisinnaṃ pabbatantare;

Obhāsayantaṃ raṃsena ², sikhinaṃ sikhinaṃ yathā.

38.

‘‘Aggajaṃ pupphamādāya, upāgacchiṃ naruttamaṃ;

Pasannacitto sumano, buddhassa abhiropayiṃ.

39.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

40.

‘‘Pañcavīsatikappamhi, ahosi amitogato ⁴;

Sattaratanasampanno, cakkavattī mahabbalo.

41.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā aggapupphiyo thero imā gāthāyo abhāsitthāti.

Aggapupphiyattherassāpadānaṃ dasamaṃ.

Thomakavaggo chabbīsatimo.

Tassuddānaṃ –

Thomakekāsanacitakaṃ, campako sattapāṭali;

Pānadhi ⁶ mañjarī paṇṇaṃ, kuṭido aggapupphiyo;

Gāthāyo gaṇitā cettha, ekatālīsameva cāti.