| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៥. អគទង្គបញ្ហោ
5. Agadaṅgapañho
៥. ‘‘ភន្តេ នាគសេន, ‘អគទស្ស ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ។ ‘‘យថា, មហារាជ, អគទេ កិមី ន សណ្ឋហន្តិ, ឯវមេវ ខោ, មហារាជ, យោគិនា យោគាវចរេន មានសេ កិលេសា ន សណ្ឋបេតព្ពា។ ឥទំ, មហារាជ, អគទស្ស បឋមំ អង្គំ គហេតព្ពំ។
5. ‘‘Bhante nāgasena, ‘agadassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti. ‘‘Yathā, mahārāja, agade kimī na saṇṭhahanti, evameva kho, mahārāja, yoginā yogāvacarena mānase kilesā na saṇṭhapetabbā. Idaṃ, mahārāja, agadassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, អគទោ ទដ្ឋផុដ្ឋទិដ្ឋអសិតបីតខាយិតសាយិតំ សព្ពំ វិសំ បដិហនតិ, ឯវមេវ ខោ, មហារាជ, យោគិនា យោគាវចរេន រាគទោសមោហមានទិដ្ឋិវិសំ សព្ពំ បដិហនិតព្ពំ។ ឥទំ, មហារាជ, អគទស្ស ទុតិយំ អង្គំ គហេតព្ពំ។ ភាសិតម្បេតំ, មហារាជ, ភគវតា ទេវាតិទេវេន –
‘‘Puna caparaṃ, mahārāja, agado daṭṭhaphuṭṭhadiṭṭhaasitapītakhāyitasāyitaṃ sabbaṃ visaṃ paṭihanati, evameva kho, mahārāja, yoginā yogāvacarena rāgadosamohamānadiṭṭhivisaṃ sabbaṃ paṭihanitabbaṃ. Idaṃ, mahārāja, agadassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘សង្ខារានំ សភាវត្ថំ, ទដ្ឋុកាមេន យោគិនា;
‘‘‘Saṅkhārānaṃ sabhāvatthaṃ, daṭṭhukāmena yoginā;
អគទេនេវ ហោតព្ពំ, កិលេសវិសនាសនេ’’’តិ។
Agadeneva hotabbaṃ, kilesavisanāsane’’’ti.
អគទង្គបញ្ហោ បញ្ចមោ។
Agadaṅgapañho pañcamo.
