| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২৬. অদুক্খমসুখীসুত্তং
26. Adukkhamasukhīsuttaṃ
২৪৯. ‘‘অদুক্খমসুখী অত্তা হোতি অরোগো পরং মরণা’’তি? ভগৰংমূলকা নো, ভন্তে, ধম্মা…পে॰… ‘‘রূপে খো, ভিক্খৰে, সতি, রূপং উপাদায, রূপং অভিনিৰিস্স এৰং দিট্ঠি উপ্পজ্জতি – ‘অদুক্খমসুখী অত্তা হোতি অরোগো পরং মরণা’তি। ৰেদনায সতি… সঞ্ঞায সতি… সঙ্খারেসু সতি… ৰিঞ্ঞাণে সতি, ৰিঞ্ঞাণং উপাদায, ৰিঞ্ঞাণং অভিনিৰিস্স এৰং দিট্ঠি উপ্পজ্জতি – ‘অদুক্খমসুখী অত্তা হোতি অরোগো পরং মরণা’’’তি।
249. ‘‘Adukkhamasukhī attā hoti arogo paraṃ maraṇā’’ti? Bhagavaṃmūlakā no, bhante, dhammā…pe… ‘‘rūpe kho, bhikkhave, sati, rūpaṃ upādāya, rūpaṃ abhinivissa evaṃ diṭṭhi uppajjati – ‘adukkhamasukhī attā hoti arogo paraṃ maraṇā’ti. Vedanāya sati… saññāya sati… saṅkhāresu sati… viññāṇe sati, viññāṇaṃ upādāya, viññāṇaṃ abhinivissa evaṃ diṭṭhi uppajjati – ‘adukkhamasukhī attā hoti arogo paraṃ maraṇā’’’ti.
‘‘তং কিং মঞ্ঞথ, ভিক্খৰে, রূপং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’…পে॰… ৰিপরিণামধম্মং, অপি নু তং অনুপাদায এৰং দিট্ঠি উপ্পজ্জেয্য – ‘অদুক্খমসুখী অত্তা হোতি অরোগো পরং মরণা’’’তি? ‘‘নো হেতং, ভন্তে’’। ‘‘ইতি খো, ভিক্খৰে, দুক্খে সতি, দুক্খং উপাদায, দুক্খং অভিনিৰিস্স এৰং দিট্ঠি উপ্পজ্জতি – ‘অদুক্খমসুখী অত্তা হোতি অরোগো পরং মরণা’’’তি। ‘‘ৰেদনা… সঞ্ঞা… সঙ্খারা… ৰিঞ্ঞাণং নিচ্চং ৰা অনিচ্চং ৰা’’তি? ‘‘অনিচ্চং, ভন্তে’’…পে॰… ৰিপরিণামধম্মং, অপি নু তং অনুপাদায এৰং দিট্ঠি উপ্পজ্জেয্য – ‘অদুক্খমসুখী অত্তা হোতি অরোগো পরং মরণা’’’তি? ‘‘নো হেতং, ভন্তে’’। ‘‘ইতি খো, ভিক্খৰে , দুক্খে সতি, দুক্খং উপাদায, দুক্খং অভিনিৰিস্স এৰং দিট্ঠি উপ্পজ্জতি – ‘অদুক্খমসুখী অত্তা হোতি অরোগো পরং মরণা’’’তি। ছব্বীসতিমং।
‘‘Taṃ kiṃ maññatha, bhikkhave, rūpaṃ niccaṃ vā aniccaṃ vā’’ti? ‘‘Aniccaṃ, bhante’’…pe… vipariṇāmadhammaṃ, api nu taṃ anupādāya evaṃ diṭṭhi uppajjeyya – ‘adukkhamasukhī attā hoti arogo paraṃ maraṇā’’’ti? ‘‘No hetaṃ, bhante’’. ‘‘Iti kho, bhikkhave, dukkhe sati, dukkhaṃ upādāya, dukkhaṃ abhinivissa evaṃ diṭṭhi uppajjati – ‘adukkhamasukhī attā hoti arogo paraṃ maraṇā’’’ti. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ, bhante’’…pe… vipariṇāmadhammaṃ, api nu taṃ anupādāya evaṃ diṭṭhi uppajjeyya – ‘adukkhamasukhī attā hoti arogo paraṃ maraṇā’’’ti? ‘‘No hetaṃ, bhante’’. ‘‘Iti kho, bhikkhave , dukkhe sati, dukkhaṃ upādāya, dukkhaṃ abhinivissa evaṃ diṭṭhi uppajjati – ‘adukkhamasukhī attā hoti arogo paraṃ maraṇā’’’ti. Chabbīsatimaṃ.
দুতিযপেয্যালো।
Dutiyapeyyālo.
তস্সুদ্দানং –
Tassuddānaṃ –
ৰাতং এতং মম সো, অত্তা নো চ মে সিযা।
Vātaṃ etaṃ mama so, attā no ca me siyā;
নত্থি করোতো হেতু চ, মহাদিট্ঠেন অট্ঠমং॥
Natthi karoto hetu ca, mahādiṭṭhena aṭṭhamaṃ.
সস্সতো অসস্সতো চেৰ, অন্তানন্তৰা চ ৰুচ্চতি।
Sassato asassato ceva, antānantavā ca vuccati;
তং জীৰং অঞ্ঞং জীৰঞ্চ, তথাগতেন চত্তারো॥
Taṃ jīvaṃ aññaṃ jīvañca, tathāgatena cattāro.
রূপী অত্তা হোতি, অরূপী চ অত্তা হোতি।
Rūpī attā hoti, arūpī ca attā hoti;
রূপী চ অরূপী চ অত্তা হোতি।
Rūpī ca arūpī ca attā hoti;
নেৰ রূপী নারূপী অত্তা হোতি, একন্তসুখী অত্তা হোতি॥
Neva rūpī nārūpī attā hoti, ekantasukhī attā hoti.
একন্তদুক্খী অত্তা হোতি, সুখদুক্খী অত্তা হোতি।
Ekantadukkhī attā hoti, sukhadukkhī attā hoti;
অদুক্খমসুখী অত্তা হোতি, অরোগো পরং মরণাতি।
Adukkhamasukhī attā hoti, arogo paraṃ maraṇāti;
ইমে ছব্বীসতি সুত্তা, দুতিযৰারেন দেসিতা॥
Ime chabbīsati suttā, dutiyavārena desitā.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. দুতিযগমনাদিৰগ্গৰণ্ণনা • 2. Dutiyagamanādivaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. দুতিযগমনাদিৰগ্গৰণ্ণনা • 2. Dutiyagamanādivaggavaṇṇanā
