| Library / Tipiṭaka / තිපිටක • Tipiṭaka / සංයුත්තනිකාය • Saṃyuttanikāya |
5. ආදිත්තවග්ගො
5. Ādittavaggo
1. ආදිත්තසුත්තං
1. Ādittasuttaṃ
41. එවං මෙ සුතං – එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි; උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවතො සන්තිකෙ ඉමා ගාථායො අභාසි –
41. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavato santike imā gāthāyo abhāsi –
‘‘ආදිත්තස්මිං අගාරස්මිං, යං නීහරති භාජනං;
‘‘Ādittasmiṃ agārasmiṃ, yaṃ nīharati bhājanaṃ;
තං තස්ස හොති අත්ථාය, නො ච යං තත්ථ ඩය්හති.
Taṃ tassa hoti atthāya, no ca yaṃ tattha ḍayhati.
‘‘එවං ආදිත්තකො ලොකො, ජරාය මරණෙන ච;
‘‘Evaṃ ādittako loko, jarāya maraṇena ca;
නීහරෙථෙව දානෙන, දින්නං හොති සුනීහතං.
Nīharetheva dānena, dinnaṃ hoti sunīhataṃ.
‘‘දින්නං සුඛඵලං හොති, නාදින්නං හොති තං තථා;
‘‘Dinnaṃ sukhaphalaṃ hoti, nādinnaṃ hoti taṃ tathā;
චොරා හරන්ති රාජානො, අග්ගි ඩහති නස්සති.
Corā haranti rājāno, aggi ḍahati nassati.
‘‘අථ අන්තෙන ජහති, සරීරං සපරිග්ගහං;
‘‘Atha antena jahati, sarīraṃ sapariggahaṃ;
එතදඤ්ඤාය මෙධාවී, භුඤ්ජෙථ ච දදෙථ ච;
Etadaññāya medhāvī, bhuñjetha ca dadetha ca;
දත්වා ච භුත්වා ච යථානුභාවං;
Datvā ca bhutvā ca yathānubhāvaṃ;
අනින්දිතො සග්ගමුපෙති ඨාන’’න්ති.
Anindito saggamupeti ṭhāna’’nti.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / සංයුත්තනිකාය (අට්ඨකථා) • Saṃyuttanikāya (aṭṭhakathā) / 1. ආදිත්තසුත්තවණ්ණනා • 1. Ādittasuttavaṇṇanā
ටීකා • Tīkā / සුත්තපිටක (ටීකා) • Suttapiṭaka (ṭīkā) / සංයුත්තනිකාය (ටීකා) • Saṃyuttanikāya (ṭīkā) / 1. ආදිත්තසුත්තවණ්ණනා • 1. Ādittasuttavaṇṇanā
