| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๕. อาทิตฺตวโคฺค
5. Ādittavaggo
๑. อาทิตฺตสุตฺตํ
1. Ādittasuttaṃ
๔๑. เอวํ เม สุตํ – เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเมฯ อถ โข อญฺญตรา เทวตา อภิกฺกนฺตาย รตฺติยา อภิกฺกนฺตวณฺณา เกวลกปฺปํ เชตวนํ โอภาเสตฺวา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฎฺฐาสิฯ เอกมนฺตํ ฐิตา โข สา เทวตา ภควโต สนฺติเก อิมา คาถาโย อภาสิ –
41. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavato santike imā gāthāyo abhāsi –
‘‘อาทิตฺตสฺมิํ อคารสฺมิํ, ยํ นีหรติ ภาชนํ;
‘‘Ādittasmiṃ agārasmiṃ, yaṃ nīharati bhājanaṃ;
ตํ ตสฺส โหติ อตฺถาย, โน จ ยํ ตตฺถ ฑยฺหติฯ
Taṃ tassa hoti atthāya, no ca yaṃ tattha ḍayhati.
‘‘เอวํ อาทิตฺตโก โลโก, ชราย มรเณน จ;
‘‘Evaṃ ādittako loko, jarāya maraṇena ca;
นีหเรเถว ทาเนน, ทินฺนํ โหติ สุนีหตํฯ
Nīharetheva dānena, dinnaṃ hoti sunīhataṃ.
‘‘ทินฺนํ สุขผลํ โหติ, นาทินฺนํ โหติ ตํ ตถา;
‘‘Dinnaṃ sukhaphalaṃ hoti, nādinnaṃ hoti taṃ tathā;
โจรา หรนฺติ ราชาโน, อคฺคิ ฑหติ นสฺสติฯ
Corā haranti rājāno, aggi ḍahati nassati.
‘‘อถ อเนฺตน ชหติ, สรีรํ สปริคฺคหํ;
‘‘Atha antena jahati, sarīraṃ sapariggahaṃ;
เอตทญฺญาย เมธาวี, ภุเญฺชถ จ ทเทถ จ;
Etadaññāya medhāvī, bhuñjetha ca dadetha ca;
ทตฺวา จ ภุตฺวา จ ยถานุภาวํ;
Datvā ca bhutvā ca yathānubhāvaṃ;
อนินฺทิโต สคฺคมุเปติ ฐาน’’นฺติฯ
Anindito saggamupeti ṭhāna’’nti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑. อาทิตฺตสุตฺตวณฺณนา • 1. Ādittasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑. อาทิตฺตสุตฺตวณฺณนา • 1. Ādittasuttavaṇṇanā
