| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၈. အာဒီနဝဉာဏနိဒ္ဒေသော
8. Ādīnavañāṇaniddeso
၅၃. ကထံ ဘယတုပဋ္ဌာနေ ပညာ အာဒီနဝေ ဉာဏံ? ဥပ္ပာဒော ဘယန္တိ – ဘယတုပဋ္ဌာနေ ပညာ အာဒီနဝေ ဉာဏံ။ ပဝတ္တံ ဘယန္တိ – ဘယတုပဋ္ဌာနေ ပညာ အာဒီနဝေ ဉာဏံ။ နိမိတ္တံ ဘယန္တိ။ပေ.။ အာယူဟနာ ဘယန္တိ။ပေ.။ ပဋိသန္ဓိ ဘယန္တိ။ ဂတိ ဘယန္တိ။ နိဗ္ဗတ္တိ ဘယန္တိ။ ဥပပတ္တိ ဘယန္တိ။ ဇာတိ ဘယန္တိ။ ဇရာ ဘယန္တိ။ ဗ္ယာဓိ ဘယန္တိ ။ မရဏံ ဘယန္တိ။ သောကော ဘယန္တိ။ ပရိဒေဝော ဘယန္တိ။ ဥပာယာသော ဘယန္တိ – ဘယတုပဋ္ဌာနေ ပညာ အာဒီနဝေ ဉာဏံ။
53. Kathaṃ bhayatupaṭṭhāne paññā ādīnave ñāṇaṃ? Uppādo bhayanti – bhayatupaṭṭhāne paññā ādīnave ñāṇaṃ. Pavattaṃ bhayanti – bhayatupaṭṭhāne paññā ādīnave ñāṇaṃ. Nimittaṃ bhayanti…pe… āyūhanā bhayanti…pe… paṭisandhi bhayanti… gati bhayanti… nibbatti bhayanti… upapatti bhayanti… jāti bhayanti… jarā bhayanti… byādhi bhayanti … maraṇaṃ bhayanti… soko bhayanti… paridevo bhayanti… upāyāso bhayanti – bhayatupaṭṭhāne paññā ādīnave ñāṇaṃ.
အနုပ္ပာဒော ခေမန္တိ – သန္တိပဒေ ဉာဏံ။ အပ္ပဝတ္တံ ခေမန္တိ – သန္တိပဒေ ဉာဏံ။ပေ.။ အနုပာယာသော ခေမန္တိ – သန္တိပဒေ ဉာဏံ။
Anuppādo khemanti – santipade ñāṇaṃ. Appavattaṃ khemanti – santipade ñāṇaṃ…pe… anupāyāso khemanti – santipade ñāṇaṃ.
ဥပ္ပာဒော ဘယံ, အနုပ္ပာဒော ခေမန္တိ – သန္တိပဒေ ဉာဏံ။ ပဝတ္တံ ဘယံ, အပ္ပဝတ္တံ ခေမန္တိ – သန္တိပဒေ ဉာဏံ။ပေ.။ ဥပာယာသော ဘယံ, အနုပာယာသော ခေမန္တိ – သန္တိပဒေ ဉာဏံ။
Uppādo bhayaṃ, anuppādo khemanti – santipade ñāṇaṃ. Pavattaṃ bhayaṃ, appavattaṃ khemanti – santipade ñāṇaṃ…pe… upāyāso bhayaṃ, anupāyāso khemanti – santipade ñāṇaṃ.
ဥပ္ပာဒော ဒုက္ခန္တိ – ဘယတုပဋ္ဌာနေ ပညာ အာဒီနဝေ ဉာဏံ။ ပဝတ္တံ ဒုက္ခန္တိ – ဘယတုပဋ္ဌာနေ ပညာ အာဒီနဝေ ဉာဏံ။ပေ.။ ဥပာယာသော ဒုက္ခန္တိ – ဘယတုပဋ္ဌာနေ ပညာ အာဒီနဝေ ဉာဏံ။
Uppādo dukkhanti – bhayatupaṭṭhāne paññā ādīnave ñāṇaṃ. Pavattaṃ dukkhanti – bhayatupaṭṭhāne paññā ādīnave ñāṇaṃ…pe… upāyāso dukkhanti – bhayatupaṭṭhāne paññā ādīnave ñāṇaṃ.
အနုပ္ပာဒော သုခန္တိ – သန္တိပဒေ ဉာဏံ။ အပ္ပဝတ္တံ သုခန္တိ – သန္တိပဒေ ဉာဏံ။ပေ.။ အနုပာယာသော သုခန္တိ – သန္တိပဒေ ဉာဏံ။
Anuppādo sukhanti – santipade ñāṇaṃ. Appavattaṃ sukhanti – santipade ñāṇaṃ…pe… anupāyāso sukhanti – santipade ñāṇaṃ.
ဥပ္ပာဒော ဒုက္ခံ, အနုပ္ပာဒော သုခန္တိ – သန္တိပဒေ ဉာဏံ။ ပဝတ္တံ ဒုက္ခံ, အပ္ပဝတ္တံ သုခန္တိ – သန္တိပဒေ ဉာဏံ။ပေ.။ ဥပာယာသော ဒုက္ခံ, အနုပာယာသော သုခန္တိ – သန္တိပဒေ ဉာဏံ။
Uppādo dukkhaṃ, anuppādo sukhanti – santipade ñāṇaṃ. Pavattaṃ dukkhaṃ, appavattaṃ sukhanti – santipade ñāṇaṃ…pe… upāyāso dukkhaṃ, anupāyāso sukhanti – santipade ñāṇaṃ.
ဥပ္ပာဒော သာမိသန္တိ – ဘယတုပဋ္ဌာနေ ပညာ အာဒီနဝေ ဉာဏံ။ ပဝတ္တံ သာမိသန္တိ – ဘယတုပဋ္ဌာနေ ပညာ အာဒီနဝေ ဉာဏံ။ပေ.။ ဥပာယာသော သာမိသန္တိ – ဘယတုပဋ္ဌာနေ ပညာ အာဒီနဝေ ဉာဏံ။
Uppādo sāmisanti – bhayatupaṭṭhāne paññā ādīnave ñāṇaṃ. Pavattaṃ sāmisanti – bhayatupaṭṭhāne paññā ādīnave ñāṇaṃ…pe… upāyāso sāmisanti – bhayatupaṭṭhāne paññā ādīnave ñāṇaṃ.
အနုပ္ပာဒော နိရာမိသန္တိ – သန္တိပဒေ ဉာဏံ။ အပ္ပဝတ္တံ နိရာမိသန္တိ – သန္တိပဒေ ဉာဏံ။ပေ.။ အနုပာယာသော နိရာမိသန္တိ – သန္တိပဒေ ဉာဏံ။
Anuppādo nirāmisanti – santipade ñāṇaṃ. Appavattaṃ nirāmisanti – santipade ñāṇaṃ…pe… anupāyāso nirāmisanti – santipade ñāṇaṃ.
ဥပ္ပာဒော သာမိသံ, အနုပ္ပာဒော နိရာမိသန္တိ – သန္တိပဒေ ဉာဏံ။ ပဝတ္တံ သာမိသံ, အပ္ပဝတ္တံ နိရာမိသန္တိ – သန္တိပဒေ ဉာဏံ။ပေ.။ ဥပာယာသော သာမိသံ, အနုပာယာသော နိရာမိသန္တိ – သန္တိပဒေ ဉာဏံ။
Uppādo sāmisaṃ, anuppādo nirāmisanti – santipade ñāṇaṃ. Pavattaṃ sāmisaṃ, appavattaṃ nirāmisanti – santipade ñāṇaṃ…pe… upāyāso sāmisaṃ, anupāyāso nirāmisanti – santipade ñāṇaṃ.
ဥပ္ပာဒော သင္ခာရာတိ – ဘယတုပဋ္ဌာနေ ပညာ အာဒီနဝေ ဉာဏံ။ ပဝတ္တံ သင္ခာရာတိ – ဘယတုပဋ္ဌာနေ ပညာ အာဒီနဝေ ဉာဏံ။ပေ.။ ဥပာယာသော သင္ခာရာတိ – ဘယတုပဋ္ဌာနေ ပညာ အာဒီနဝေ ဉာဏံ။
Uppādo saṅkhārāti – bhayatupaṭṭhāne paññā ādīnave ñāṇaṃ. Pavattaṃ saṅkhārāti – bhayatupaṭṭhāne paññā ādīnave ñāṇaṃ…pe… upāyāso saṅkhārāti – bhayatupaṭṭhāne paññā ādīnave ñāṇaṃ.
အနုပ္ပာဒော နိဗ္ဗာနန္တိ – သန္တိပဒေ ဉာဏံ။ အပ္ပဝတ္တံ နိဗ္ဗာနန္တိ – သန္တိပဒေ ဉာဏံ။ပေ.။ အနုပာယာသော နိဗ္ဗာနန္တိ – သန္တိပဒေ ဉာဏံ။
Anuppādo nibbānanti – santipade ñāṇaṃ. Appavattaṃ nibbānanti – santipade ñāṇaṃ…pe… anupāyāso nibbānanti – santipade ñāṇaṃ.
ဥပ္ပာဒော သင္ခာရာ, အနုပ္ပာဒော နိဗ္ဗာနန္တိ – သန္တိပဒေ ဉာဏံ။ ပဝတ္တံ သင္ခာရာ, အပ္ပဝတ္တံ နိဗ္ဗာနန္တိ – သန္တိပဒေ ဉာဏံ။ပေ.။ ဥပာယာသော သင္ခာရာ, အနုပာယာသော နိဗ္ဗာနန္တိ – သန္တိပဒေ ဉာဏံ။
Uppādo saṅkhārā, anuppādo nibbānanti – santipade ñāṇaṃ. Pavattaṃ saṅkhārā, appavattaṃ nibbānanti – santipade ñāṇaṃ…pe… upāyāso saṅkhārā, anupāyāso nibbānanti – santipade ñāṇaṃ.
ဥပ္ပာဒဉ္စ ပဝတ္တဉ္စ၊ နိမိတ္တံ ဒုက္ခန္တိ ပသ္သတိ။
Uppādañca pavattañca, nimittaṃ dukkhanti passati;
အာယူဟနံ ပဋိသန္ဓိံ၊ ဉာဏံ အာဒီနဝေ ဣဒံ။
Āyūhanaṃ paṭisandhiṃ, ñāṇaṃ ādīnave idaṃ.
အနုပ္ပာဒံ အပ္ပဝတ္တံ၊ အနိမိတ္တံ သုခန္တိ စ။
Anuppādaṃ appavattaṃ, animittaṃ sukhanti ca;
အနာယူဟနံ အပ္ပဋိသန္ဓိံ၊ ဉာဏံ သန္တိပဒေ ဣဒံ။
Anāyūhanaṃ appaṭisandhiṃ, ñāṇaṃ santipade idaṃ.
ဣဒံ အာဒီနဝေ ဉာဏံ၊ ပဉ္စဌာနေသု ဇာယတိ။
Idaṃ ādīnave ñāṇaṃ, pañcaṭhānesu jāyati;
ပဉ္စဌာနေ သန္တိပဒေ၊ ဒသ ဉာဏေ ပဇာနာတိ။
Pañcaṭhāne santipade, dasa ñāṇe pajānāti;
ဒ္ဝိန္နံ ဉာဏာနံ ကုသလတာ၊ နာနာဒိဋ္ဌီသု န ကမ္ပတီတိ။
Dvinnaṃ ñāṇānaṃ kusalatā, nānādiṭṭhīsu na kampatīti.
တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဘယတုပဋ္ဌာနေ ပညာ အာဒီနဝေ ဉာဏံ’’။
Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘bhayatupaṭṭhāne paññā ādīnave ñāṇaṃ’’.
အာဒီနဝဉာဏနိဒ္ဒေသော အဋ္ဌမော။
Ādīnavañāṇaniddeso aṭṭhamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၈. အာဒီနဝဉာဏနိဒ္ဒေသဝဏ္ဏနာ • 8. Ādīnavañāṇaniddesavaṇṇanā
