| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
8. ஆதீ³னவஞாணனித்³தே³ஸவண்ணனா
8. Ādīnavañāṇaniddesavaṇṇanā
53. ஆதீ³னவஞாணனித்³தே³ஸே உப்பாதோ³தி புரிமகம்மபச்சயா இத⁴ உப்பத்தி. பவத்தந்தி ததா²உப்பன்னஸ்ஸ பவத்தி. நிமித்தந்தி ஸப்³ப³ம்பி ஸங்கா²ரனிமித்தங். ஆயூஹனாதி ஆயதிங் படிஸந்தி⁴ஹேதுபூ⁴தங் கம்மங். படிஸந்தீ⁴தி ஆயதிங் உப்பத்தி. க³தீதி யாய க³தியா ஸா படிஸந்தி⁴ ஹோதி. நிப்³ப³த்தீதி க²ந்தா⁴னங் நிப்³ப³த்தனங். உபபத்தீதி ‘‘ஸமாபன்னஸ்ஸ வா உபபன்னஸ்ஸ வா’’தி (த⁴॰ ஸ॰ 1289) ஏவங் வுத்தா விபாகப்பவத்தி . ஜாதீதி ஜராதீ³னங் பச்சயபூ⁴தா ப⁴வபச்சயா ஜாதி. நிப்பரியாயதோ தத்த² தத்த² நிப்³ப³த்தமானானங் ஸத்தானங் யே யே க²ந்தா⁴ பாதுப⁴வந்தி, தேஸங் பட²மபாதுபா⁴வோ ஜாதி. ஜராதி க²ண்டி³ச்சாதி³ஸம்மதோ ஸந்ததியங் ஏகப⁴வபரியாபன்னக²ந்த⁴ஸந்தானஸ்ஸ புராணபா⁴வோ. ஸோகோதி ஞாதிப்³யஸனாதீ³ஹி பு²ட்ட²ஸ்ஸ சித்தஸந்தாபோ. பரிதே³வோதி ஞாதிப்³யஸனாதீ³ஹி பு²ட்ட²ஸ்ஸ வசீபலாபோ. உபாயாஸோதி பு⁴ஸோ ஆயாஸோ, ஞாதிப்³யஸனாதீ³ஹி பு²ட்ட²ஸ்ஸ அதி⁴மத்தசேதோது³க்க²ப்பபா⁴விதோ தோ³ஸோயேவ. எத்த² ச உப்பாதா³த³யோ பஞ்சேவ ஆதீ³னவஞாணஸ்ஸ வத்து²வஸேன வுத்தா, ஸேஸா தேஸங் வேவசனவஸேன. ‘‘நிப்³ப³த்தி ஜாதீ’’தி இத³ஞ்ஹி த்³வயங் உப்பாத³ஸ்ஸ சேவ படிஸந்தி⁴யா ச வேவசனங், ‘‘க³தி உபபத்தீ’’தி இத³ங் த்³வயங் பவத்தஸ்ஸ, ஜராத³யோ நிமித்தஸ்ஸாதி. தேனாஹ –
53. Ādīnavañāṇaniddese uppādoti purimakammapaccayā idha uppatti. Pavattanti tathāuppannassa pavatti. Nimittanti sabbampi saṅkhāranimittaṃ. Āyūhanāti āyatiṃ paṭisandhihetubhūtaṃ kammaṃ. Paṭisandhīti āyatiṃ uppatti. Gatīti yāya gatiyā sā paṭisandhi hoti. Nibbattīti khandhānaṃ nibbattanaṃ. Upapattīti ‘‘samāpannassa vā upapannassa vā’’ti (dha. sa. 1289) evaṃ vuttā vipākappavatti . Jātīti jarādīnaṃ paccayabhūtā bhavapaccayā jāti. Nippariyāyato tattha tattha nibbattamānānaṃ sattānaṃ ye ye khandhā pātubhavanti, tesaṃ paṭhamapātubhāvo jāti. Jarāti khaṇḍiccādisammato santatiyaṃ ekabhavapariyāpannakhandhasantānassa purāṇabhāvo. Sokoti ñātibyasanādīhi phuṭṭhassa cittasantāpo. Paridevoti ñātibyasanādīhi phuṭṭhassa vacīpalāpo. Upāyāsoti bhuso āyāso, ñātibyasanādīhi phuṭṭhassa adhimattacetodukkhappabhāvito dosoyeva. Ettha ca uppādādayo pañceva ādīnavañāṇassa vatthuvasena vuttā, sesā tesaṃ vevacanavasena. ‘‘Nibbatti jātī’’ti idañhi dvayaṃ uppādassa ceva paṭisandhiyā ca vevacanaṃ, ‘‘gati upapattī’’ti idaṃ dvayaṃ pavattassa, jarādayo nimittassāti. Tenāha –
‘‘உப்பாத³ஞ்ச பவத்தஞ்ச, நிமித்தங் து³க்க²ந்தி பஸ்ஸதி;
‘‘Uppādañca pavattañca, nimittaṃ dukkhanti passati;
ஆயூஹனங் படிஸந்தி⁴ங், ஞாணங் ஆதீ³னவே இத³’’ந்தி. ச
Āyūhanaṃ paṭisandhiṃ, ñāṇaṃ ādīnave ida’’nti. ca
‘‘இத³ங் ஆதீ³னவே ஞாணங், பஞ்சடா²னேஸு ஜாயதீ’’தி. ச
‘‘Idaṃ ādīnave ñāṇaṃ, pañcaṭhānesu jāyatī’’ti. ca
ஸப்³ப³பதே³ஸு ச ப⁴யந்தி இச்சேதஸ்ஸ வசனஸ்ஸ ப⁴யங் இதீதி பத³ச்சே²தோ³ . ப⁴யந்தி பீளாயோக³தோ ஸப்படிப⁴யதாய ப⁴யங். இதீதி ப⁴யதுபட்டா²னஸ்ஸ காரணனித்³தே³ஸோ.
Sabbapadesu ca bhayanti iccetassa vacanassa bhayaṃ itīti padacchedo . Bhayanti pīḷāyogato sappaṭibhayatāya bhayaṃ. Itīti bhayatupaṭṭhānassa kāraṇaniddeso.
அனுப்பாதோ³ கே²மந்தி ஸந்திபதே³ ஞாணந்திஆதி³ பன ஆதீ³னவஞாணஸ்ஸ படிபக்க²ஞாணத³ஸ்ஸனத்த²ங் வுத்தங். ப⁴யதுபட்டா²னேன வா ஆதீ³னவங் தி³ஸ்வா உப்³பி³க்³க³ஹத³யானங் அப⁴யம்பி அத்தி² கே²மங் நிராதீ³னவந்தி அஸ்ஸாஸஜனநத்த²ம்பி ஏதங் வுத்தங். யஸ்மா வா யஸ்ஸ உப்பாதா³த³யோ ப⁴யதோ ஸூபட்டி²தா ஹொந்தி, தஸ்ஸ தப்படிபக்க²னின்னங் சித்தங் ஹோதி, தஸ்மா ப⁴யதுபட்டா²னவஸேன ஸித்³த⁴ஸ்ஸ ஆதீ³னவஞாணஸ்ஸ ஆனிஸங்ஸத³ஸ்ஸனத்த²ம்பேதங் வுத்தந்தி வேதி³தப்³ப³ங். அனுப்பாதோ³ அப்பவத்தந்திஆதி³ நிப்³பா³னமேவ. ஸந்திபதே³தி ஸந்திகொட்டா²ஸே, நிப்³பா³னேதி அத்தோ². அனுஸ்ஸவவஸேனாபி ஹி ஸந்திபத³ந்தி நாமமத்தங் க³ஹெத்வா உப்பன்னங் ஞாணம்பி ‘‘ஸந்திபதே³ ஞாண’’ந்தி வுத்தங்.
Anuppādo khemanti santipade ñāṇantiādi pana ādīnavañāṇassa paṭipakkhañāṇadassanatthaṃ vuttaṃ. Bhayatupaṭṭhānena vā ādīnavaṃ disvā ubbiggahadayānaṃ abhayampi atthi khemaṃ nirādīnavanti assāsajananatthampi etaṃ vuttaṃ. Yasmā vā yassa uppādādayo bhayato sūpaṭṭhitā honti, tassa tappaṭipakkhaninnaṃ cittaṃ hoti, tasmā bhayatupaṭṭhānavasena siddhassa ādīnavañāṇassa ānisaṃsadassanatthampetaṃ vuttanti veditabbaṃ. Anuppādo appavattantiādi nibbānameva. Santipadeti santikoṭṭhāse, nibbāneti attho. Anussavavasenāpi hi santipadanti nāmamattaṃ gahetvā uppannaṃ ñāṇampi ‘‘santipade ñāṇa’’nti vuttaṃ.
உப்பாதோ³ ப⁴யங், அனுப்பாதோ³ கே²மந்திஆதி³ விபக்க²படிபக்க²வஸேன உப⁴யங் ஸமாஸெத்வா உப்பஜ்ஜமானங் ஞாணங் க³ஹெத்வா வுத்தங். எத்த² ச யங் ப⁴யங், தங் யஸ்மா நியமதோ து³க்க²ங். யஞ்ச து³க்க²ங், தங் வட்டாமிஸலோகாமிஸகிலேஸாமிஸேஹி அவிப்பமுத்தத்தா ஸாமிஸமேவ. யஞ்ச ஸாமிஸங், தங் ஸங்கா²ரமத்தமேவ. தஸ்மா உப்பாதோ³ து³க்க²ந்தி ப⁴யதுபட்டா²னே பஞ்ஞா ஆதீ³னவே ஞாணந்திஆதி³ வுத்தங். ஏவங் ஸந்தேபி ப⁴யாகாரேன து³க்கா²காரேன ஸாமிஸாகாரேன ஸங்கா²ராகாரேனாதி ஏவங் ஆகாரனானத்ததோ பவத்திவஸேனெத்த² நானத்தங் வேதி³தப்³ப³ங். உப்பாதோ³ ப⁴யங், து³க்க²ங், ஸாமிஸங், ஸங்கா²ரா சாதி உப்பாதா³தி³லிங்க³மனபெக்கி²த்வா ‘‘நேதங் கோ² ஸரணங் கே²மங், நேதங் ஸரணமுத்தம’’ந்திஆதீ³ஸு (த⁴॰ ப॰ 189) விய அத்தனோ லிங்கா³பெக்க²மேவ வுத்தங். ஸங்கா²ராதி ச ஏகத்தமனபெக்கி²த்வா ‘‘அப்பச்சயா த⁴ம்மா, அஸங்க²தா த⁴ம்மா’’திஆதீ³ஸு (த⁴॰ ஸ॰ து³கமாதிகா 7-8) விய ப³ஹுவசனங் கதங், உப்பாதா³தீ³னங் வா ஸங்கா²ரேகதே³ஸத்தா ‘‘உத்தரே பஞ்சாலா, த³க்கி²ணே பஞ்சாலா’’திஆதீ³ஸு விய ப³ஹுன்னங் ஏகதே³ஸேபி ப³ஹுவசனங் கதந்தி வேதி³தப்³ப³ங். கே²மங் ஸுக²ங் நிராமிஸங் நிப்³பா³னந்தி நிப்³பா³னமேவ வுத்தாகாரானங் படிபக்க²வஸேன சதுதா⁴ வுத்தங். த³ஸ ஞாணே பஜானாதீதி ஆதீ³னவே ஞாணங் பஜானந்தோ உப்பாதா³தி³வத்து²கானி பஞ்ச, அனுப்பாதா³தி³வத்து²கானி பஞ்சாதி த³ஸ ஞாணே பஜானாதி படிவிஜ்ஜ²தி ஸச்சி²கரோதி. த்³வின்னங் ஞாணானங் குஸலதாதி ஆதீ³னவஞாணஸ்ஸ சேவ ஸந்திபத³ஞாணஸ்ஸ சாதி இமேஸங் த்³வின்னங் ஞாணானங் குஸலதாய. நானாதி³ட்டீ²ஸு ந கம்பதீதி பரமதி³ட்ட²த⁴ம்மனிப்³பா³னாதி³வஸேன பவத்தாஸு தி³ட்டீ²ஸு ந வேத⁴தீதி.
Uppādobhayaṃ, anuppādo khemantiādi vipakkhapaṭipakkhavasena ubhayaṃ samāsetvā uppajjamānaṃ ñāṇaṃ gahetvā vuttaṃ. Ettha ca yaṃ bhayaṃ, taṃ yasmā niyamato dukkhaṃ. Yañca dukkhaṃ, taṃ vaṭṭāmisalokāmisakilesāmisehi avippamuttattā sāmisameva. Yañca sāmisaṃ, taṃ saṅkhāramattameva. Tasmā uppādo dukkhanti bhayatupaṭṭhāne paññā ādīnave ñāṇantiādi vuttaṃ. Evaṃ santepi bhayākārena dukkhākārena sāmisākārena saṅkhārākārenāti evaṃ ākāranānattato pavattivasenettha nānattaṃ veditabbaṃ. Uppādo bhayaṃ, dukkhaṃ, sāmisaṃ, saṅkhārā cāti uppādādiliṅgamanapekkhitvā ‘‘netaṃ kho saraṇaṃ khemaṃ, netaṃ saraṇamuttama’’ntiādīsu (dha. pa. 189) viya attano liṅgāpekkhameva vuttaṃ. Saṅkhārāti ca ekattamanapekkhitvā ‘‘appaccayā dhammā, asaṅkhatā dhammā’’tiādīsu (dha. sa. dukamātikā 7-8) viya bahuvacanaṃ kataṃ, uppādādīnaṃ vā saṅkhārekadesattā ‘‘uttare pañcālā, dakkhiṇe pañcālā’’tiādīsu viya bahunnaṃ ekadesepi bahuvacanaṃ katanti veditabbaṃ. Khemaṃ sukhaṃ nirāmisaṃ nibbānanti nibbānameva vuttākārānaṃ paṭipakkhavasena catudhā vuttaṃ. Dasa ñāṇe pajānātīti ādīnave ñāṇaṃ pajānanto uppādādivatthukāni pañca, anuppādādivatthukāni pañcāti dasa ñāṇe pajānāti paṭivijjhati sacchikaroti. Dvinnaṃ ñāṇānaṃ kusalatāti ādīnavañāṇassa ceva santipadañāṇassa cāti imesaṃ dvinnaṃ ñāṇānaṃ kusalatāya. Nānādiṭṭhīsu na kampatīti paramadiṭṭhadhammanibbānādivasena pavattāsu diṭṭhīsu na vedhatīti.
ஆதீ³னவஞாணனித்³தே³ஸவண்ணனா நிட்டி²தா.
Ādīnavañāṇaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 8. ஆதீ³னவஞாணனித்³தே³ஸோ • 8. Ādīnavañāṇaniddeso
